Bhilali Bible
उबजाणनी किताप 44
चांदीन कटेवरु
युसुफ आपसा घरेन राखवाळ्या पावर काजे कह्यु, “ईनु माणसेन थयला मां दतरो अन भराये, ततरो अन भर दे, ने अन लेणे करीन चे, जे रुप्या आपला, तीनु रुप्याक तींद्रा आखान थयला-डीट मुंहडेस पर मेकीन बांद दे। ने छेंडला भायसेन थयला मां रुप्या भेळे मारु चांदीन पीयालु बी मेल दे।” जसु युसुफ कह्यु, तसुत चु कर्यु। ने चु पावर संदारे एगुत तीनु काजे तींद्रा गदड़ा भेळे मकली देदु। चे सहर सी थुड़ेस नांबे गुया अतरात, ने युसुफ आपसा घर राखवाळ्या पावर काजे कह्यु, “ईनु माणसेन पछळ पड़ीन, ने तीनुक हात करीन कव, तुहुंं भलायन बदले कुहराय काहा कर्या? तुहुंं हामरा मालीकेन चांदीन पीयालु चुरी करीन ली आवला छे, ने ईना पीयाला काजे चु ईसारु देखणेन कामे लावे। ने तुहुंं ईना पीयाला काजे चुरी करीन गुनु करला छे।”
तत्यार पावर युसुफेन हुकुम मानीन तीनुक हात कर लेदु, ने युसुफ कहलु, तसोत तीनुक कह्यु। चे तीना पावर काजे कह्या, “ए हामरा मालीक, तु हामुक असी वात काहा कहे? असो काम करनु तारा पावर्या छे छेटे रहे। हामरा थयला मां जे रुप्या हतला, चे रुप्या हामु कनान देस मां सी पछा लावीन आप देदला छे, जी वात तुसेक मालम छे। ती हामु तारा मालीकेन घरमां सी चांदी नीते सनो काहा चुरी करसु? ने तेरे वाटे बी तारा मालीकेन चांदीन पीयालु जड़े, तीनाक मार देजी, ने दीसरा हामु आखा तारा गुलाम पावर्या बण जासुन।”
चु पावर युसुफेन भाय काजे कह्यु, “हव, तुहुंं कय र्या, तसुत मे करीस, बाकुन तेरा थयलाम चांदीन पीयालु जड़से, तीनाक मे मारु, नी बाकुन तीनाक गुलाम बणाय लीस। ने दीसराक छुड़ दीस।” असो सामळीन चे आखा मामार-मामार आपसा-आपसा थयला गदड़ा पर सी हेटा उतारीन थयलान मुंहडा छुड़्या। तत्यार युसुफेन पावर तींद्रा एकेक थयला मां मटलानचां सी नानलान चां लग पीयाला हेरने बाजी ज्यु, ने पीयाला बीन्यामीन थयला मां जड़ ज्यो। अळतेन चे दुखी हय्न आपसा-आपसा पुथल्या फाड़्या, ने अळतेन थयला आपसा-आपसा गदड़ा पर मेल-लीन मीसर मां युसुफेन सहर गुया।
जत्यार यहुदा ने तेरा भायस युसुफेन घरमां गुया, ती युसुफ चांत हतलु, ने युसुफ अगळ पाये पड़ीन वांद्या। युसुफ तीनु काजे कह्यु, “तुहुंं जु चांदीन पीयालु काहा चुरी करला? तुहुंं काजे जी वात मालम नी हतली काय की, जु माणुस ईसारु देखीन हामरी वात जाण लेसे?”
यहुदा कह्यु, “हामु, हामरा मालीक काजे काय कवजे ने काय नी? हामु ‘चुरी नी कर्या’ एरु पुरावु देणे वाटे हामरे वाटे काय नी हय। ने तींद्रा थयला मां चांदीन पीयाला हतलो, चु ने हामु आखा तारा गुलाम पावर्यात छे। हंय काय करजे?”
युसुफ कह्यु, “मे तुहुंं आखा काजे गुलाम पावर्या नी बणावो। बाकुन जु माणुस मारु चांदीन पीयालु चुरी करलु छे। चु की चु मारु गुलाम-पावर बणसे। ने दीसरा तुहुंं आखा आपसा बासेन घर सुकने-मने जात रवु।”
बीन्यामीन वाटे यहुदान वीन्ती
असो सामळीन यहुदा युसुफेन चां जाय्न कह्यु, ए मारा मालीक, मे तारु गुलाम-पावर छे, बाकुन मेसेक एक वात कहणेन हुकुम आप, तु मारे पर रीसवाये घुण, काहाकी तु फीरोन राजा बराबर छे। ए मारा मालीक! हामु ते तारा गुलाम पावर्या छे। जत्यार हामु पेहले आवला ती तु हामुक पुछलु की, तुंद्रु बास नीते भायस छे काय? ने ए मालीक! तत्यार हामु तुसेक कहला की, हामरु बास छे, ने तेरु डाहवाराम हवलु एक पुर्यु छे, बाकुन तेरु सगु भायस मर गुयलु, ने हंय चु तेरी आय्सीन एकुत जीवतेलु पुर्यु छे, हेरे सी तेरु बास तीनाक वदु परम करे। ने तत्यार तु हामु गुलाम पावर्या काजे कहलु, तीनाक मे देखणे हींड र्यु, ने तीनाक जां ली आवु। ए मालीक! ती हामु तुसेक कहला की, चु पुर्यु आपसा बास काजे नी छुड़े; कदीक चु बासेक छुड़ देसे, ती तेरु बास मर जासे। ती तु हामु गुलाम पावर्याक कहलु की, तुहुंं छेंडला भायस काजे नी लावे, ती तुहुंं जां पछा पाय घुण मेकु।
ती तु हामु गुलाम पावर्याक कहलु की, तुहुंं छेंडेला भायस काजे नी लावे, तत्यार हामु तीनाक मालीकेन वात सामळ्या। थुड़ाक दाहड़ा वीत-ज्या ने अळतेन हामरु बास हामुक कहलु, अळी जाय्न, थुड़ाक दाणा ली आवु। ती हामु हामरा बासेक कहला कदी बी हामु, हामरा छेंडेला भायस पाखुर चां नी जाजे। हव, कदी चु भायस पुठ्ये जासे, तीत जासुन: काहाकी छेंडेला भायस पाखुर हामु काजे तीना माणसेन्चां नी जावाये। ती हामरु बास जु तारु गुलाम-पावर छे, चु हामुक कह्यु, तुहुंं काजे मालम छे की, मारे सी मारी बायर राहेलेन दुयु पुर्या हवला। ने तींद्रे माय्न एक ते पेहलेत मर ज्यु, ने मे समजी ज्यु की, तीनाक काहानास जंगली जानवर्या तातड़ीन खाय ज्यो हसे। ने ती सी चु मेसेक देखणे लग नी जड़्यु। ने कदी तुहुंं मारा दीसरा पुर्या काजे बी ली जाणे हींड र्यु, ने हेरो काहींग हय-ज्यो, ती ते मे हंय डाहवारा मां मर जायस।
“तेरेमां जत्यार मे मार बास तारा पावर्या धड़े आवों ने जु पुर्यु साते नी रहे, तेरु जीव ईनात पर अटकीन रहे, तेरेमां असु देखीन की पुर्यु नी हय हयु तत्यारुत मर जासे। तत्यार तारा आखा पावर्यान वजे सी तारु पावर्यु हामरु बास, जु डाहु हय ज्यु, दुख सी मरलान दुनीया मां उतरी जाय्स। मे, तारु गुलाम पावर, मार बास अगळ असु कहलु की, ईनाक पछु लावणेन काम मारे माथे रवसे, ने कदी मे ईना काजे तारेन्चां पछु नी लावो, ती ते मे जलम तारी नींगा मां गुनाळु रय्स। तेरेमां ए मालीक, मे तारु गुलाम-पावर, तारे सी लीलघाय करों की, मे ईना भायसेन बदले तारेन्चां गुलाम-पावर बणीन रय्स, ने ईना भाय काजे मारा दीसरा भाय पुठ्ये पछु मकली दे। मे ईना भाय पाखुर कसु मारा बासेन्चां जाम? मे मार बास काजे फीकुर करीन मरतेलु देखणे नी हींड्तु।”
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.