Bhilali Bible
उबजाणनी किताप 40
युसुफेन साहरे सपनान मतलब देखाड़नु
थुड़ाक दाहड़ा वीत ज्या ने अळतेन मीसर देसेन राजान दुय मुखी पावर्या काहींग गुनु कर्या। तीनु माय्न एक जणु खाणो रांदण्यान मुखी हतलु, ने एक जणु अंगुरेन रस पावण्यु मुखी हतलु। अळतेन फीरोन राजु, तीना रांदण्यान मुखी पर ने अंगुरेन रस पावण्या मुखी पर रीसवाय ज्यु। जीनी जेल मां युसुफ हतलु, तीनीत जेल मां राजा तीनु दुयु काजे कुंडाड़ देदु। ने राजान राखवाळ्या-सीपायड़ान मुखी पोतीपर बी तीनी जेलेन हकदार्यु हतलु। सीपायड़ान मुखी पोतीपर तीनु दुय केदड़ा काजे युसुफेन सुपरुत कर देदु, चु चाकरी करनु चालु कर देदु अळतेन चे बेसका दाहड़ा लग जेल मां रह्या।
मीसर देसेन राजा काजे अंगुरेन रस पावण्यान मुखी, ने रांदण्यान मुखी जे दुयु जेल मां हतला, ती एक दाहड़ु राती दुयु जणा सपनो देख्या, ने तीनु सपनान आंग्ये-आंग्ये मतलब हतलो। ने चो सपनो हींद्रे पर जो हवणे वाळो हतलो, तेरेत अनसारे हतलो। युसुफ संदारे एगुत तींद्रेन्चां गुयु, ती चु तीनुक बेसका फीकुर मां पड़ रहला देख्यु। ने फीरोन तीनुक पुछ्यु, “तुहुंं आज काहा फीकुर मां पड़ रह्या?”
चे जपाप आप्या, “हामु दुयु जणा सपनो देखला छे, ने तीनु सपनान मतलब देखाड़न्यु कुय नी हय।”
युसुफ तीनुक कह्यु, “सपनान मतलब देखाड़न्यु यहोवा भगवान अतरुत छे। तुहुंं कसो सपनो देखला, चो मेसेक कहु।”
अंगुरेन रस पावण्या मुखी आपसो सपनो कह्यु, “मे सपना मां अंगुरेन वेलु देखलु। तीना वेला मां तीन डाळ्या हतला, ने तीनु डाळ्या मे डीरा फुट्या, ने चे डाळ्या मां फुले आया ने अंगुरेन घुमचा लाग्या ने घुमचा पाक गुया। राजा फीरोनेन पीयालु मारा हातेम हतलु, ने मे तीना अंगुरेन घुमचा काजे फीरोन राजान पीयाला मां चीबदीन नीफळ्यु, ने पीयालु राजा काजे आप देदु।”
युसुफ, तीना अंगुरेन रस पावण्या काजे कह्यु, “तीन वेलान मतलब तीन दाहड़ा छे। तेरेमां तीन दाहड़ा हय जासे, ने अळतेन फीरोन राजु तुसेक माप कर देसे, ने तु पेहलेन तसु राजा काजे अंगुरेन रस, पीयाला आप्या करसे। जत्यार तु जेलेम सी छुट जाय, ती मेसेक हेर करजी, ने मारे पर गीण-दया करीन मारे बारामां फीरोन राजा काजे कवजी, ने ईना जेलेम सी मेसेक छुड़ाय लेजी। काहाकी छाचलीन चे मेसेक ईब्री जातीन देसेम सी चुराये ली आवला छे, ने मे काय बी गुनु नी कर्यु, तेबी असलुत जेल मां बुजाय जाम।”
ज देखीन तेरा सपनान मतलब वारु हतला करीन रांदण्यान मुखी, युसुफ काजे कह्यु, “मे बी सपनो देखलु छे। चो सपनो असो हतलो: मार मुणका पर रुटान तीन मसका हतला। आखान उपेरली मसकी मां फीरोन राजा वाटे छेल-भात्यो रांदलो खाणो हतलो। बाकुन तीना खाणा काजे चिरला खाणे बाजी रवला।”
युसुफ जपाप आप्यु, “तीन मसक्यान मतलब: तीन दाहड़ा छे। ने तीन दाहड़ा मां फीरोन तुसेक बी जेल मां सी नीकाळ देसे, बाकुन तारो मुणको काटाड़ देसे, ने तारा धड़ काजे एक झाड़का पर टांगाड़ देसे, ने चिरला तारा धड़ काजे खासे।”
तीन दाहड़ा हय ज्या, ने अळतेन फीरोन राजान पयदावारीन तीहवारेन दाहड़ु आयु। तीना तीहवार मां फीरोन राजु आखा पावर्या काजे पंगतेन खाणो खाणे बुलायु। ने रांदण्यान मुखी काजे ने अंगुरेन रस पावण्यान मुखी काजे बी जेलेम सी नीकाळ मांग्यु। राजा फीरोन, अंगुरेन रस पावण्यान मुखी काजे पछु नकरी पर लागाड़ लेदु, ने चु फीरोन राजा काजे पछु अंगुरेन रस पीयालु आपणे बाजी गुयु। बाकुन फीरोन राजा, रांदण्यान मुखी काजे मुणको तुड़ायन माराड़ नाख्यु। जसु युसुफ तीनाक सपनान मतलब देखाड़लु तसोत हयो। तेबी अंगुरेन रस पावण्यान मुख्यु युसुफ काजे वीसरी गुयु। ने तीनाक हेर नी कर्यु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.