Skip to content
BibleKenya

Bhilali Bible

उबजाणनी किताप 39

युसुफ ने पोतीपरेन बायर

जत्‌यार युसुफ मीसर देस मां आयु, तत्‌यार पोतीपर नावेन एक मीसर देसेन जु फीरोनेन आफसर ने कीलान राखवाळ्‌यु हतला, तीनाक इस्‌माएली हाते सी जे हीनाक चां ली गुयला ने मुल ली लेदला। युसुफ आपसा मीसर देस वाळा मालीकेन घर मां रवतेलु। ने यहोवा तेरे साते रवतेलु तेरेमां फायदा वाळु माणुस बण ज्‌यु,1 ने युसुफेन मालीक देख्‌यु की यहोवा तेर भले रहे, ने जो काम हयु करे तीनाक यहोवा तेरा हात सी फायदु कर देय।2 पोतीपर तीने दाहड़े सी युसुफ काजे आपसा घरेन हकदार्‌यु बणायु, तीने दाहड़े सी यहोवा भगवान पतीपोर्‌यान घरमां ने खेते मां संयबरकत आपणे बाजी ज्‌यु। पतीपर तीने दाहड़े सी युसुफ काजे आपसा घरेन हकदार्‌यु बणायु, तीने दाहड़े सी यहोवा भगवान पतीपोर्‌यान घरमां ने खेते मां संयबरकत आपणे बाज-ज्‌यु। तेरेमां पोतीपुर्‌यु घरेन आखी रकम युसुफेन सुपरुत कर देदु। पतीपोर्‌यु आपसी काहनी बी रकमेन फीकुर नी करतेलु। बाकुन चु खाणो खाणेन अतरीत फीकुर करतेलु।

युसुफ पतीपोर्‌यान घरवाळी साते सोवसार करने सी मना करे युसुफ बेसकु वारु ने बेसकु घाटाळु हतलु। ईनु वातेन पछे हयो की तेरा मालीकेन घरवाळी युसुफ भीणी देखी ने कय, “मार भेळे सुव।” बाकुन युसुफ नीकारु करतु जाय्‌न आपसी मालीकेन काजे कह्‌यु, “सामळ जतरी बी रकम ईना घरमां छे। तेरे वाराम मालीक काजे काय बी मालम नी हय, ने मालीक आखो काय मारे सुपरुत कर देदलु छे। ने ईना घर मां, मारु मालीक, आखी रकम पर मेसेक हक आपलु छे, बाकुन तार पर मारु काय बी हक नी हय; तेरेमां मे तारे साते सोवसार करीन, यहोवा भगवानेन नींगा मां पाप नी करों।” ने असो हयो की ची दाहड़ीन युसुफ सी वात करती रय, बाकुन हयु नी गुयु ने तेरी वात नी मान्‌यु की तेर भेळे सुवे ने भेळे रहे।

एक दाहड़े असो हयो की युसुफ आपसान काम करने घरमां गुयु, ने घरेन पावर्‌या मां सी कुय बी नी हतलो। तत्‌यार ची तेरा पुथल्‌या धरीन कय, “मार भेळे सुव,” बाकुन चु आपसान पुथल्‌या तेर हातेम छुड़ीन ढास्‌यु ने बाहर नीकळ्‌यु ज्‌यु। ती ची वीच्‌यार करी की युसुफ ते आपसान पुथल्‌या मार हात मां छुड़ीन बाहर ढासी ज्‌यु, ती ची बायरी घरेन पावर्‌याक आयड़ीन कय, “देखु, मारु घरवाळु, ईना ईब्‌री जातीन माणुस काजे हामरा घरमां हामरी ईज्‌जत हळकी करने करीन लावलु। हयु ईब्‌री जातीन माणुस मारे साते सोवसार करनेन वीच्‌यार सी मांही घरमां आवलु, बाकुन मे जुर सी आयड़ी। ने मे जुर सी आयड़ी ती सामळीन चु आपसान पुथल्‌या छुड़ीन मार धड़े सी ढास्‌यु, ने बाहर नीकळी गुयु।”

ने ची तेरा पुथल्‌या तीनान घरवाळा काजे घर पुगणे लग आपसी धड़े मेक रहली। ने जत्‌यार तेरु घरवाळु आयु ती ची तीनाक जी वात कय, “चु ईब्‌री जातीन पावर तीनाक तु लावलु, चु मारे साते सोवसार करने करीन मारेन्‌चां आवलु। ने जत्‌यार मे जुर सी आयड़ी, तत्‌यार चु आपसान पुथल्‌या मार धड़े रहणीदीन ढास गुयु।”

युसुफेन मालीक आपसी घरवाळीन वात सामळीन बेसकु रीसवाय गुयु। ने युसुफेन मालीक तीनाक धरीन जेल मां जां राजान केदी जेल मां हतला, चां कुंड देदा; ने चु तीना जेल मां कुंडायलु रयु। बाकुन यहोवा भगवान युसुफ भेळु हतलु ने चु युसुफ पर गीण-दया कर्‌यु ने तेरेमां सीपायाड़ान डाहलु हदार्‌यु युसुफ पर गीण-दया कर्‌यु।3 अळतेन सीपायड़ान डाहलु, युसुफ काजे केदड़ान मुखी बणाय देदु, ने चे केदड़ा, युसुफ काजे कह्‌या मां आखो काम करतेला। सीपायड़ान डाहलु, युसुफ काजे, तीने दाहड़े सी केदड़ान डाहलु बणायु, ने तीने दाहड़े सी सीपायड़ान डाहलु जेलेन काहनी बी चीजेन देख-भाळ नी करतेलु; काहाकी आखो काम युसुफ कर लेतलु। यहोवा भगवान युसुफ साते हतलु, ने युसुफ जो बी करे तेरे मां चु संयबरकत आपतेलु।

Source notes (3)
  1. Cross-reference नेवताळान काम 7:9
  2. Cross-reference नेवताळान काम 7:9
  3. Cross-reference नेवताळान काम 7:9

Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.