Bhilali Bible
उबजाणनी किताप 41
युसुफेन साहरे फीरोन राजान सपनो बताड़नु
दुय साल वीत गुया ने अळतेन फीरोन राजु एक सपनो देख्यु, चो सपनो असो हतलो: राजु नीळ नदी धड़े उबु हय रहलु। ने तीनी नीळ नदी मां सी सात वारु बेसका वारु ने मातालीस गावड़्या नीकळ्या ने नदी धड़े चरने बाजी गुया। अळतेन तींद्रे पछळ सात कुड़ायला ने हाड़कायला गावड़्या नीळ नदी मां सी नीकळीन आया, ने मातला गावड़्या धड़े आवीन उबा हय ज्या। अळतेन चे सात कुड़ायला ने हाड़कायला गावड़ी, तीनु सात बेसका वारु ने मातला गावड़्या काजे खाय ज्या। ने ततरा मां फीरोन राजान नींद उघड़ी गुय। अळतेन राजु पछु सुय गुयु, ने दीसरो एक अळी सपनो देख्यु की, एक टटाळा मां, वारु पेड्ला दाणा भर सात उमब्या नीकळ्या। अळतेन तीनात टटाळा मां अळी सात पातेळ्ळा ने उगेण्ली झाल सी झळ्ळायला उमब्या नीकळ्या। जे सात पातेळ्ळा उमब्या, सांत वारु पेड्ला दाणा भरला उमब्या काजे गीळ गुया। अळतेन फीरोन राजु जाग गुयु। ती चु वीच्यार्यु की, ए! जो ते सपनो हतलो। संदारे एगुत, फीरोन राजु असो सपनो काहा देखाड़्यो हसे करीन फीकुर मां पड़ गुयु, ने चु, मीसर देसेन आखा कागळ पांड्या काजे, ने मंडळीन सहलाणी देखण्या काजे बुलायु, ने आपसा सपना सामळायु, बाकुन तीनु माय्न कुय बी तीनु सपनान मतलब नी देखाड़ सक्यो।1
तत्यार अंगुरेन रस पावण्यु मुखी फीरोन राजा काजे कह्यु, “हंय, मेसेक एक वात हेर आय रय, जी वात तुसेक पेहलुत कहणु हतलो। बाकुन ईस्राय गुयलो, हयु मारु गुनु छे। ए फीरोन राजा, एक दाहड़ु, जत्यार तु रीसवाय आवलु, ती मेसेक ने रांदण्यान मुख्या काजे धराड़ीन पोतीपरेन घरेन धड़े वाळी जेल मां कुंडाड़ देदलु। तत्यार एकुत राती हामु दुयु जणा सपनो देखला, ने हामरे साते जसो हवणे वाळो हतलो, तसोन-तसों हामरो सपनो बी हतलो। तीने टेमे जेल मां हामरे पुठ्ये एक ईब्री जातीन जुवान माणुस हतलु, जु जेलेन राखवाळ्या-सीपायड़ान मुखीन गुलाम-पावर हतलु; ने हामु तीना जुवान्या काजे हामरो सपनो देखाड़ला, ने चु हामरा एकेक सपनान मतलब देखाड़ देदलु। ने चु हामु काजे जसु देखाड़लु तसोत हामरे साते वीत्यो: तु मेसेक ते नकरी पर पछु लागाड़ लेदलु, बाकुन खावाड़नी मुखी काजे टांगाड़ीन माराय नाख्यु।”
अळतेन फीरोन राजु, युसुफ काजे बुलाय मांग्यु, ने सीपायड़ा युसुफ काजे तळ-घर वाळा जेल मां सी छाटुत नीकाळ लाया, ने युसुफ कान्या काटाड़्यु, ने तेरा पुथल्या बदलीन फीरोन राजा अगळ आयु। फीरोन राजु, युसुफ काजे कह्यु, “मे एक दाहड़ु सपना देखलु छे, तीनु सपनान मतलब देखाड़न्या कुय नी हय। ने मे तारे बारामां सामेळ्ळु छे की, तु सपनो सामेळतात तीना सपनान मतलब देखाड़ सके।”
युसुफ फीरोन राजा काजे कह्यु, “मे, नी, बाकुन भगवानुत सपनान छाचो मतलब देखाड़ सके।”
फीरोन राजु युसुफ काजे कह्यु, “मे सपना मां नीळ नदी धड़े उबु हय रहलु। ती सात बेसका वारु ने मातालीस गावड़ी काजे नदी मां सी नीकळीन नदी धड़े चरतेला देखलु। अळतेन तीनु सात गावड़ी पछळ दीसरा सात कुड़ायला ने हाड़कायला गावड़्या आवतेला देखलु। मीसर देस मां असला कुड़ायला ने हाड़कायला गावड़्या मे कदी नी देख्यु। ने चे कुड़ायला ने हाड़कायला गावड़्या, बेसका वारु ने माताला गावड़्या काजे खाय गुया। बाकुन चे हाड़कायला गावड़्या, मातली सांत गावड़ी काजे खाय गुया, तेबी चे हाड़कायला गावड़्या तसात कुड़ायला ने हाड़कायला देखाय तेला। तत्रा मां मारी नींद उगड़ी गुय। मे अळी दीसरो सपनो देख्यु, एक टटाळा मां, मटा ने वारु पेड्ला दाणा भर सात उमब्या नीकळ्या। अळतेन तीनात टटाळा मां अळी सात पातेळ्ळा ने उगेण्ली झाळ सी झळ्ळायला उमब्या नीकळ्या। जे सांत पातेळ्ळा उमब्या, सांत वारु पेड्ला दाणा भरला सांत उमब्या काजे गीळ गुया। मे आखा कागळ पांड्या काजे ने आखा मंडळीन सहलाणी देखण्या काजे बुलावीन चे सपना सामळायु, बाकुन तींद्रे माय्न कुय बी तीनु सपनान मतलब नी देखाड़ सक्यो।”
तत्यार युसुफ फीरोन राजा काजे कह्यु, दुयु सपनान मतलब एक जसा छे, यहोवा भगवान जो काम करने वाळु छे, तीना कामेन बारामां चु तुसेक देखाड़ देदलु छे। तीनु सात मातला गावड़्या ने तीनु सात वारु पेड्ला उमब्यान मतलब वारु पाक पाणीन सात साल छे; ईनु दुयु सपनान एकुत मतलब छे। ने सात हाड़कायला ने कुड़ायला गावड़्या मतलब ने उगेवणी झाळ सी झळ्ळायला सात उमब्यान मतलब आवणे वाळा काळेन सात साल छे। भगवान जो काम करने वाळु छे चत फीरोन अगळ देखाड़ देदलु छे; जीत वात मे पेहले देखाड़लु ने असो की असो हवणे वाळो छे: सामळ, सात साल लग मीसर देस मां बेसको अन पाक्से। बाकुन सात साल हय जासे ने अळतेन सात साल लग बेसकु काळ पड़से ने तीना काळ मां पेहली सात सालेन पाक पाणीक माणसे वीसरी जासे; ने काळ मां आखो मीसर देस उजड़ी जासे। काळ अतरो पड़से की, तीना काळ मां सात सालेन वारलु पाक पाणी लग हेर नी आवे। ने फीरोन जे दुय सपना देखलु, तीनु सपनान मतलब जत छे की, भगवान भीणी सी जो हवणे वाळो छे चो टाकाय गुयलो छे, ने भगवान जो छाटुत पुरो करसे।
तेरेमां हंय ए फीरोन तु एक समजदार ने अक्कल वाळा माणुस काजे देखीन नेवाड़, ने तीनाक मीसर देसेन मुखी मंत्री बणाव। ने ए फीरोन, जत्यार लगुन वारु पाके ती लग तु मीसर देस मां आखा माणसे भीणी मेरेन पांचवु हीस्सु भेळु करने करीन दीसरा हकदार्या काजे बी नेवाड़ ले। ने चे हकदार्या, खाणेन अन भेळो करसे, ने चे सहर-सहरे मां अन भेळो करीन अन काजे मट्ली-मट्ली कणगी मां ने मटला-मटला कुठा मां भरसे। ने चे फीरोनेन हकेम रवीन तीनु कणगीन राखवाळी करसे। चो भेळो करलो अन सात सालेन काळ मां काम देसे। ने मीसर देसेम काळ सी कुय बी नी मरे।
युसुफ काजे मीसरे देसेन मुखी मंत्री बणाय जाणु
युसुफ जी वात राजा फीरोन काजे ने तेरा आखा हकदार्या काजे वारु गम्यो। तेरेमां फीरोन राजु आपसा हकदार्या काजे कह्यु, “हेरेम ते भगवानेन जीव-आत्मा रवे। आपणुक एरेन तसलु माणुस अळी कांखुर जड़से काय?” फीरोन राजु युसुफ काजे कह्यु, “भगवान ते तारेत पर जो आखो उजेंतो करलु छे, तेरेमां हंय तारेन तसु समजवाळु ने अक्कल वाळु कांखुर नी जड़े; तेरेमां मे तुसेक मारा घरन्यान मुखी मंत्री बणायस ने मारा आखा माणसे तारु हुकुम मानसे। ने राजगादी समाळने मां अतरुत मे तारे सी मटु रय्स।” फीरोन राजु युसुफ काजे कह्यु, “सामळ, मे तुसे काजे मीसर देसेन मुखी मंत्री बणाय दम।” तत्यार फीरोन राजु आपसा हातेम सी आपसा नावेन सीलठप्पा वाळी मुंदी नीकाळीन युसुफेन हातेम पेहराय देदु; ने बेसका वारु चमकण्या पुथल्या पेहराय देदु, ने तेरा गळाम सनान साकळ पेहराय देदु; ने युसुफ काजे फीरोन राजु आपसी दीसरी घुड़ा-गाडी पर बसाड़्यु ने फीरोन राजान माणसे युसुफ अगळ असो परचार करता गुया, “युसुफ काजे वांद्या।” करीन फीरोन राजु युसुफ काजे आखा मीसर देसेन हकदार्यु मंत्री बणाय देदु। फीरोन राजा युसुफ काजे कह्यु, “फीरोन राजु ते मेत छे, बाकुन आखा मीसर देसेन माणसे तारात हुकुमेन अनसारे चालसे।” फीरोन राजु युसुफ नाव जाफेनात-पान्यु पाड़्यु। ओन सहरेन एक पुजारु हतलु, तेरो नाव पोतीपेरा हतलु ने तेरी आसनात नावेन पुरे हतली। फीरोन राजु तीनी पुरेन ईयाव युसुफ साते कराड़ देदु। तेरेमां युसुफ आखा मीसर देसेन हकदार्यु बण गुयु। जत्यार युसुफ मीसर देसेन, हकदार्यु मंत्री बन्लु, ती तेरी उमर तीस सालेन हतली। ने युसुफ फीरोन राजान हवेली काजे छुड़ीन तीना देस मां आखे दुर माणसेन हाल-चाल देखणे नीकळ्यु। मीसर देस मां सात साल लग बेसकी मेर पाकी। मीसर देस मां सात साल लग जतरो बी पाक्यो चो आखो युसुफ, सहर-सहर मां भेळो कराड़ीन मट्ली-मट्ली कणगीम ने मटला-मटला कुठाम भराड़ देदु। युसुफ दरीयान रेतळान तसों बेसको अन भेळो कराड़ लेदु। ने युसुफ अन काजे तुलीन हीसाब राखणेन छुड़ देदु काहाकी अनेन हीसाब नी राखाये ततरो हय गुयलो।
काळ पड़नेन पेहले साल युसुफ लाडी आसेनात, युसुफ सी भार पाये हय, ने तेरा दुय पुर्या हया। युसुफेन लाडी आसनात ओन सहरेन पुजारा पोतीपेरान पुरे हतली। युसुफ आपसा मटला पुर्यान नाव मनेस्यु पाड़्यु, ने कह्यु, “भगवान मेसेक आखो दुख, ने मारा बासेन घराणाक ईस्राड़ देदु।” ने दीसरा पुर्यान नाव एप्रेम पाड़्यु ने कह्यु, “दीना देस मां मेसेक बेसको दुख झेलनु पड़लो, तीनात देस मां भगवान मेसेक, कमी घटी नी हवणी देदु।”
मीसर देस मां सात साल लग बेसको पाक्यो ने चे सात साल वीत गुया। ने अळतेन युसुफ दसु कहलु तसुत मीसर देस मां ने दीसरा आखा देस मां बी सांत सालेन काळ पड़ने बाजी ज्यु; बाकुन आखा मीसर देस मां सांत साल लग बेसको पाक्लो चे दाणा भेळा करला हतला। जत्यार मीसर देसेन आखा माणसे भुकला घाबरायणे बाजी गुया, ती चे आयड़ी-आयड़ीन रड़ी-रड़ीन फीरोन सी अन मांगणे बाजी गुया: ने फीरोन राजा तीनु माणसेक असु कह्या करतेलु, “तुहुंं युसुफेन चां जावु, ने युसुफ जसो कवसे तसोत करजु।” मीसर देस मां बेसकु काळ पड़्यु ती युसुफ मटला-मटला कणगी मां सी भेळो करलो नीकाळी-नीकाळीन मीसर देसेम वाळा माणसे काजे मुल आपणे बाजी गुयु। आखी धरतीन देसेन माणसे दाणा मुल लेणे करीन, मीसर देस मां युसुफेन चां आवणे बाजी गुया, काहाकी आखी धरती पर बेसकु काळ पड़ रवलु।
Source notes (1)
- Cross-reference दानीयल 2:2
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.