Bhilali Bible
उबजाणनी किताप 33
याकुब ने एसावेन मेळनु
याकुब उचु भालीन देख्यु, की एसाव च्यार सोव माणसे लीन आवे। तत्यार हयु पुर्याक अलग-अलग वाटीन लीया ने राहेल ने तींद्री दुयु पावरनी काजे सुप देदु। ने चु आखा सी अगळ पुर्या भेळे पावरनी काजे, तेर पछळ पुर्या भेळे लीया काजे ने आखा सी पछळ राहेल ने युसुफ काजे मेक्या, ने आपसु तीनु आखा अगळ गुयु ने सांत कावा पाये पड़्यु, ने आपसा भायस धड़े गुयु। तत्यार एसाव तीनाक भेळु हवणे करीन दवड़्यु, ने तीनाक गळे लागाड़्यु, ने गळे लागीन गुळु देदु; अळतेन चे दुयु रड़ी पड़्या। तत्यार हयु उचु भाळीन बायरा ने पुर्या काजे देख्यु, ने पुछ्यु,
“जे तारा पावर्यान पुर्या छे, जीनुक भगवान गीण-दया करीन मेसे आप्यु।” तत्यार पुर्या भेळे पावर्या ने धड़े आवीन पाये पड़्यु। अळतेन पुर्या भेळे ने लीया धड़े आवी ने चे बी पाये पड़्या; आकरी मां युसुफ ने राहेल बी धड़े आवीन पाये पड़ी।
तत्यार एसाव्यु, याकुब काजे पुछ्यु, “मेसेक वाट्ये माणसेन ने ढुरेन टुळा भेळा हवला, एरो काय मतलब छे?”
याकुब कह्यु, “ए मालीक, तु मारे पर गीण करसी करीन जी तारे वाटे भेट छे।”
एसाव कह्यु, “मारा भाय, मारे धड़े रेट छे; जो काय तारो छे चो आखो तारोत रहे।”
याकुब कह्यु, “नी-नी, कदी तारी गीण-दया मार पर हय, ती मारी बादा काजे मान; काहाकी मेसे तु उजेंतु हयु, बाकुन मानु भगवान उजेंतु हयु असो लागे, ने तु मार सी खुस हवलु छे। तेरेमां जी भेट मकेल्लु छे, मान कर; काहाकी भगवान मार पर गीण-दया करलु छे, ने मारे धड़े रेट छे।” जत्यार हयु तेर सी बेसकु लीलघाय कर्यु, तत्यार हयु मारी भेट काजे मान कर्यु।
अळतेन एसाव कह्यु, “आव, आपणु अगा बड़जे; ने मे तारे अगळ-अगळ चालीस।”
बाकुन याकुब एसाव्या काजे कह्यु, “ए मालीक, तुसेक ते मालमुत छे की, पुर्या-पारी लुल्ला छे, ने मेसेक दुत आपण्या गाडरा, बुकड़ा ने गावड़ी देख-रेख करनु पड़े। कदी मे तीनुक एक दाहड़ा मां बेसके नांबे लग गेरीस, ती चे हार-पड़ीन मर जासे। तेरेमां मारु मालीक आपसा पावर्यान सी अघु बड़ जाय, ने ईनु मालेन चाल तत्रु जे मारे सी अगळ छे, ने पुर्यान चालेन तसु धीरु-धीरु चालीन सेईर सहर मां मारा मालीकेन चां जाती रय्स।”
एसाव कह्यु, “ती आपणा भायस मां सी काहनाक एक काजे तारे धड़े मेल जाम।” हयु कह्यु, “असु काहा?”
अतरो रेट छे, “की मारा मालीकेन दया नीगा मार पर बणीन रहे।” तत्यार एसाव तीनेत दाहड़े सेईर सहर जाणे करीन वाट्ये पड़्यु। ने याकुब सुक्कोत नावेन जागे गुयु, ने चां आपसा वाटे एक खपड़ी बणायु। ने ढुरे वाटे ढुरेन वाड़ो बणायु। तेरेमां याकुब तीना जागान नाव सुक्कोथ1 पाड़्यु।
याकुब, ते पद्दनराम सी आवलु, ने चु कनान देसेन सकेम नावेन सहर धड़े वारलु पुग ज्यु, ने चां आपसु तम्बु ताणीन डेरु नाख देदु। ने जागान जीना खुणा पर हयु तम्बु उबु कर्यु, तीनाक हयु सकेमेन बास हमोरेन पुर्यान हाते सी एक सोव चांदीन टका मुल लेदु। चां चड़ावान जागु बणायन तेरो नाव एल-एलोहे- इस्राएल2 पाड़्यु।3
Source notes (3)
- Footnote एना बुलेन मतलब खोपड़्या छे
- Footnote इस्राएलेन भगवान
- Cross-reference युहन्ना 4:5
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.