Bhilali Bible
उबजाणनी किताप 34
दीना काजे धरे
एक दाहड़े लीयान पुरे दीना, जी याकुब सी पयदा हवी, तीना कनान देसेन पुरे काजे भेळी हवणे नीकळी। तत्यार तीना देसेन मुखी हीव्वी हमोरेन पुर्यु सकेम तीनाक देख्यु, ने तीनीक धरीन जबर जस्ती कर्या ने तेरु अब्रु रहणी नी देदा। तत्यार तेरो मन याकुबेन पुरे दीना सी लागी ज्यु, ने हयु तीनी पुरे सी परमेन वात कर्यु, ने तेर सी वारु अदुस परम हय ज्यु। तेरेमां सकेम आपसा बास हमोर सी कह्यु, “मेसे ईनी पुरे काजे मारी घरवाळी बन्ने करीन दी देवु।”
ने याकुब सामळ्यु की सकेम मारी पुरे दीना साते सोवसार कर्यु; बाकुन तेरा पुर्या तीने टेमे माले भेळे खयड़ा मां हतला, तेरेमां हयु तीनुक आवणे लग हुगु रह्यु। तत्यार सकेमेन बास हमोर नीकळीन याकुब सी वात करने करीन तेरे धड़े गुयु। याकुबेन पुर्या, खयड़ाम सी आवतात जी आखी वात सामळ्या ने बेसकु रीसवाया पड़्या; काहाकी सकेम याकुबेन बेटी दीना साते जबरान धरीन सोवसार करलु ने हयु इस्राएलेन घराणा साते भुंड्ला काम करलु छे। हमोर तीनु आखा सी कह्यु, “मारा पुर्या सकेमेन मन तारी पुरे पर बेसको लागलो छे, तेरेमां तीनीक तेरी बायर हवणे करीन तीनाक दी देवु। ने तुंद्रा ने हामरा पुर्या ने पुरे आंबा-सांबा ईयाव कर्या करसुन। हामरे चां वस जावु; ने जो देस तुंद्रे अगळ छे, जां रय्न लेण-देणु कर्या करु, ने जी जागा ली लेवु।”
सकेम बी दीनान बास ने भाय सी कह्यु, “कदी मारे पर तुंद्री दया हय, ती जो काय तुहुंं मारे सी कहु, चो मे दीस। तुहुंं मार सी कतरा बी कीमत ने बदलु मांगे, तेबी मे तुहुंंक कवे तीनी अनसारे आपीस, काहाकी तीनी पुरे काजे घरवाळी हवणे करीन मेसे देवु।”
तत्यार असु वीचार कर्यु की हामरी बहणीस दीना सात जबरान सोवसार कर्यु, याकुबेन पुर्या सकेम ने तेरु बास हमोर काजे ठगणे करीन असु जपाप देदु, “हामु असो काम नी कर सकजे की काहनीन फतरी नी काटाल्ला पुर्या काजे कुवारी पुरे आपजे, काहाकी हामरी नाव-बद्दी हवे। ईनी वात पर हामु तुंद्री मान लेसुन की हामरेन तसात तुहुंं बी आखा माणसे फतरी काटाड़्यु। तत्यार हामु हामरी पुरे तुंद्रे सी ईयाव कर देसुन, ने तुंद्री पुरे सी साते हामरा पुर्यान ईयाव करसुन, ने तुंद्रे भेळे ईना देस मां रवसुन बी, ने आपणु एक आखा एक जसा माणसे बण जासुन। बाकुन कदी तुहुंं हामरी वात नी मानीन फतरी नी काटाड़्यु, ती हामु हामरी पुरेक लीन जां ली आवसुन।”
तींद्री ईनी वात पर हमोर ने तेरु पुर्यु सकेम खुस हया। सकेम याकुबेन पुर्यान राया मानीन छाटुत तीयार हय ज्यु। काहाकी चु याकुबेन पुरे काजे बणावणे करीन बेसकु हर करतेलु। चु ते तेरा घराणा मां आखा सी अदु नाव वाळु मटु हतलु।
तेरेमां हमोर ने तेरु पुर्यु सकेम आपसा सहरेन फाटक धड़े जाय्न सहरेम रहण्या काजे असु समजाड़ने लाग्यु, “जे माणसे हामरे भेळे वारु रहणे चाह र्या, तेरेमां तीनुक ईना देस मां रय्न लेण-देणु करनी देय; देखु, जो देस बी तींद्रे वाटे रेट छे; अळतेन हामु माणसे तींद्रे पुरे सी ईयाव करसुन, ने हामरी पुरे तीनुक आपसुन। चे माणसे ईनी वात पर अतरात हामरे भेळे रहणे ने एकुत कुटुमेन माणसे बण जाणे सी खुस छे की तींद्रेन तसा हामरा आखा माणसे बी फतरी काटाड़ लेवु। आपणु तींद्री वात मान लेसु, ती आपणु तींद्रा गाडरा ने बुकड़ा, ने गावड़ी, ने बेल ने माल-धन सी मालदार हय जासुन।” तेरेमां जतरा तीना सहरेन फाटक सी नीकळतेला, चे आखा हमोरेन ने तेरु पुर्यु सकेमेन वात मान्या; ने आखा माणसे फतरी काटाड़्या, अतरा तीना सहरेन फाटक सी नीकळतेला।
तीसरे दाहड़े, जत्यार चे माणसे मादा हतला, तत्यार असो हयो की सीमोन ने लेवी नावेन याकुबेन दुय पुर्या, जु दीनान भायस हतलु, आपणी-आपणी तलवार लीन तीना सहर मां बीह्या नी ने भराइन आखा माणसे काजे मार नाख्या। हमोर ने तेरु पुर्यु सकेम काजे मार नाख्या, ने दीना काजे सकेमेन घर सी नीकाळीन ली ज्या। याकुबेन पुर्या मार नाख्या तेबी सहर मां भराइन असा करीन लुट्या की तेरेम तींद्री बहणीस सोवसार कर्यु। चे गाडरा-बुकड़ा, ने गावड़ी-बेल, ने गदड़ा, ने सहर ने खयड़ा मां जतरा बी माल ली लेदा। तीनु आखा काजे ने तींद्रा पुर्या-पारी, ने बायरा काजे बी ली जाती र्या, मतलब घरमा बी जो काय हतलो तीनुक बी ली जाती र्या।
अळतेन याकुब, आपसा पुर्या सीमोन ने लेवी काजे कह्यु, “तुहुंं मेसेक बेसका दुखी करला छे, काहाकी तुहुंं असा कर्या ने कनानी ने परीज्जी जातीन माणसे हंय आपणे सी भुंडा रवसे। आपणु ते बेसका कामका छे। ने चे आपणे वीरुद मां भेळा हय्न आवसे, ने लड़ाय करसे। ने आपणे भेळता आपणा आखा घरन्याक बी, खत्तम कर देसे।”
चे कह्या, “काय चु हामरी बहणीस भेळे रंडीन तसा वेहवार कर्या?”
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.