Bhilali Bible
उबजाणनी किताप 30
राहेल देखी की, याकुब सी मारा पुर्या नी हवता, ती ची आपसी बहणीस लीया पर कुहरायणे बाजी गुय: ने ची याकुब काजे कय, “मेसेक बी अवल्यात आप, नीते मे मर जायस।”
याकुब राहेल पर रीसवाय गुयु ने कह्यु, “मे भगवान छे काय? तारी कुख ते भगवानुत बंद कर देदलु छे।”
तत्यार राहेल याकुब काजे कय, “तु मारी पावरनी बील्हा साते सोवसार कर, ने तेरे सी मारे वाटे पुर्या हवसे, ने तेरेसी मारो बी घर वसे।” ने राहेल, याकुब काजे आपसी पावरनी बील्हा आप देदी ने तीनाक असी कय, ईनीक आपसी घरवाळी बणाय ले। ने याकुब तेरे साते सोवसार कर्यु। बील्हा याकुब सी भार पाये हय ने तेरु एक पुर्यु हयु। राहेल कय, “भगवान मारी दुवा सामळी लेदु। ने मेसेक एक पुर्यु आपलु छे।” तेरेमां ची तीना पुर्यान नाव दान1 पाड़ी। ने राहेलेन पावरनी बील्हा याकुब सी अळी भार पाये हय, ने तेरु एक पुर्यु अळी पयदा हयु। तत्यार राहेल कय, “मे मारी बहणीस साते बाथे-बात पड़ीन जीत गुयली छे।” ने ची तीना पुर्यान नाव नप्ताली पाड़ी।
लीया काजे मालम पड़्यो की, मे आंझी हय गुय, तत्यार ची याकुब काजे आपसी पावरनी जील्पा आप देदी। काहाकी, ची बी याकुबेन बायर बणे करीन। ने लीयान पावरनीन याकुब सी एक पुर्यु हयु। तत्यार लीया कय, “मे बेसकी भाग वाळी छे।” ने ची तीना पुर्यान नाव गाद पाड़ी। अळतेन याकुब सी लीयान पावरनी जील्पान एक अळी पुर्यु हयु। लीया कय, “मे बेसकी-खुस छे। जी वात सामळन्या आखा बायरा खुस हय्न मेसेक संयबरकत वाळी कवसे।” तेरेमां ची तीना पुर्यान नाव आसेर पाड़ी।
गहुं काटणेन टेमे रुबेन खेत मां गुयु, ती तीना काजे खयड़ा मां एक भातीन फळे जड़्या, तीनु काजे दुदाफळ2 कहे। चु चे दुदाफळ आपसी आय्स लीया काजे आप्यु। तत्यार राहेल लीया काजे कय, “तारु बेटु जे दुदाफळ लायु, तीनु माय्न थुड़ाक मेसेक आप दे।”
लीया राहेल काजे कय, “तु मारा धेणी काजे आपसा वाटे मांग लेदी, ने हंय मारा पुर्यान दुदाफळ बी मांगणे हींड र्यु?”
बाकुन राहेल लीया काजे कय, “कदी तु, तारु पुर्यु लावलु चे दुदाफळ मेसेक आपसी, ती तु आज राती याकुब पुठ्ये सुय सके।”
सांती वेळाय याकुब खेतेम सी आवणे बाजी रहलु, ती लीया तीनाक सांबी भेळी हवणे गुय ने कय, “आज राती तुसे काजे मार भेळे सुवणु पड़से, काहाकी मे मारु पुर्यु लावलु चे दुदाफळ राहेल काजे आपीन तुसेक मुल ली लेदली छे।” ने याकुब तीनी राती लीया भेळेत सुयु।
तत्यार भगवान लीयान दुवा सामळी लेदु, ने ची याकुब सी भार पाये हय गुय, ने याकुब सी तेरु पांचवु पुर्यु हयु। तत्यार लीया कय, “भगवान मेसेक असु करीन ईनाम आपलु छे, काहाकी मे मारा धेणी काजे मारी पावरनी आप देदी।” ने ची तीना पुर्यान नाव ईस्साकार पाड़ी। लीया अळी भारपाये हय, ने याकुब सी तेरु छटवु पुर्यु हयु। तत्यार लीया कय, “भगवान मेसेक एक बेसकु वारु वाटु आपलु छे। हंय ते मारु धेणी मारेत पुठ्ये रवसे, काहाकी तेरे सी मारा छव पुर्या हय गुयला छे।” तेरेमां ची तीना पुर्यान नाव जबुलुन पाड़ी। अळतेन याकुब सी लीयान एक पुरे बी हय, ने ची तेरो नाव दीना पाड़ी।
अळतेन भगवान राहेल काजे हेर करीन तेरे पर बी दया कर्यु। ने तेरी दुवा सामळीन तेरी कुख काजे उगाड़ देदु। राहेल भार पाये हय ने तेरु एक पुर्यु हयु; ने ची कय, “भगवान मारी नाव-बद्दी छेटे कर देदलु छे। ने यहोवा भगवान मेसेक एक अळी पुर्यु आपसे।” ने तेरो नाव युसुफ पाड़ी।
याकुब ने लाबानेन ईचमां समजतु करे
जत्यार राहेल सी युसुफ हयु, ती याकुब लाबान काजे कह्यु, “हंय मेसेक वळाय दे, ने मारा देसेम जाणी दे। मेसेक मारा बायरा-छुरा आप दे, तींद्रे वाटे मे तारो सेवान-काम करलु छे; एने मे तीनुक लीन जात रवीस। तु जाणे की, मे तारो कसो सेवान-काम करलु छे।”
लाबान, याकुब काजे कह्यु, “मेसेक असो लागे की, तार वाटेत यहोवा भगवान मारे पर गीण करीन मेसेक संयबरकत आपलु छे। देखाड़ की, तुसेक काय चाहजे ने मे तुसेक चत आपीस।”
याकुब लाबान काजे कह्यु, “तु ते जाणे की, मे तारा सेवान-काम बेसकु करलु छे, ने तारा बुकड़ान ने गाडरान मे कसु काय राखवाळी कर्यु। ने चे वारलु रवतेला छे।”
जत्यार मे आवलु तत्यार कतराक हतला, ने हंय ते बेसका वेल वदीन हय ज्या; मे आयु ती यहोवा भगवान तुसेक संयबरकत आप्यु: बाकुन वीच्यार कर मे मारा घरेन काम कत्यार करीस?
लाबान याकुब काजे कह्यु, “मे तुसेक काय आपो, कय दे?”
याकुब कह्यु, “तु मेसेक असलुत काय बी घुण आपतु; दाहड़की आप दीस ती, मे ती बी तारा गाडरा ने बुकड़ा चारीस ने तींद्री राखवाळी करीस। मे आज तारा गाडरा ने बुकड़ान ईचमां माय्न छरकीस, ने जे काबर्या-चीतर्या बुकड़ा ने गाडरा हसे, ने जे गाडरान पीला काळ्ळा हसे, चे मे आंग्ये कर लीस; ने चेत मारी दाहड़की रवसे। ने अळतेन जत्यार तु मारा गाडरा ने बुकड़ा देखणे आवसी; ती मारा गाडरान ने बुकड़ान टुळा मां काळ्ळा गाडराक ने काबर्या-चीतर्या बुकड़ाक छुड़ीन काहनो धवळ्यो गाडरो (नीते काळळो बुकड़ो) तुसेक नी जड़े। असला जड़से ती तु समजी जाजी, मे तारा गाडरा ने बुकड़ा चुरी कर र्यु। बाकुन आवणेवाळा दाहड़ा मां तुसेक पतु चाल जासे की, मे ईमानदार छे।”
याकुबेन वात सामळीन लाबान कह्यु, “हव, तु कहे तसोत करने करीन मे तीयार छे।” बाकुन तीनेत दाहड़े लाबान तीनु आखा काबर्या-चीतर्या बुकड़ा ने बुकड़ा काजे आंग्ये कर देदु, तींद्रे पर धवळ्या रेगटान सहलाणी हतला; काळ्ळा गाडरा काजे बी आंग्ये कर देदु ने आपसा पुर्या काजे बुलावीन तीनुक आप देदु। ने तीनुक आखा काबर्या-चीतर्या गाडरा ने बुकड़ा लीन दीसरे जागे मकली देदु। चे पुर्या, तीन दाहड़ान चाल चालीन जाय ने नांबे जात रया ने तींखुरुत चे काबर्या-चीतर्या गाडरा ने बुकड़ा चारने बाज-ज्या। बाकुन याकुब, लाबानेन बचला गाडरा ने बुकड़ा भेळे, तीनेत जागे उभा हय ज्या, ने याकुब ईंखुरुत लाबानेन बचला धवळ्या गाडरा ने काळ्ळा बुकड़ान देख-रेख करने बाजी ज्यु। बाकुन तीनु गाडरा ने बुकड़ा मां एक बी काबर्या-चीतर्या गाडरा ने बुकड़ा नी हतलो।
याकुब चीनार, बादाम ने ओर्मन नावेन झाड़कान नीळ्ळा डाळखा काट देदु। तीनु डाळखाम सी सुट्या काट लेदु ने तीनुक रेगाटा-रेगाटा बणावीन छुल देदु (ती चे सुट्या काळ्ळो-धवळ्यो छेल-भात्या दुय-रंग वाळा देखाव पड़्या।) ने याकुब तीनु छुल्ला रेगटाळ्या सुट्या काजे बुकड़ा जां बुकड़ा ने गाडरा पाणी पीये चां ली जाय्न उबा धर रह्यु; ने जत्यार चे पाणी पीणे आया, ती चां बुकड़ा ने गाडरा गेराय गुया। चे तीनु रेगटाळ्या सुट्या अगळ वाहळाया, ने चे काबर्या-चीतर्या ने रेगटाळ्या गीदल्या जे जण्या।
तत्यार याकुब गाडरान ने बुकड़ान गीदल्या आंग्ये-आंग्ये कर देदु। ने याकुब आपसा गाडरा ने बुकड़ा लाबान मामान गाडरा ने बुकड़ा मां भेसकायणे नी देदु।
जत्यार बी मातला गाडरा ने बुकड़ा गेरायतेला, तत्यार याकुब आपसा छुल्ला डाळखा काजे बुकड़ा पाणी पीये चां उबा कर देत्लु; ने चे गाडरा ने बुकड़ा गेराय जातला। जत्यार लुल्ला बुकड़ा ने गाडरा गेरायतेला ती चु तींद्रे अगळ छुल्ला डाळखान सुट्या नी मेलतु। तेरेमां लुल्ला-लुल्ला गाडरा ने बुकड़ा लाबान धड़े हतला, ने वारलु ने मातला याकुबेन हतला। ने याकुबेन बेसके जुरे गाडरा ने बुकड़ा हय ज्या। तेरेमां चु बेसकु मात-भर हय ज्यु। ने तेरे धड़े पावर्या ने पावरनी हतला, ने उटड़ा ने गदड़ा बी हतला।
Source notes (2)
- Footnote नीयाव करनु
- Footnote दुदाफळ दुदाफळ खाणे सी भार पाये हवणेन ताकत जड़े
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.