Bhilali Bible
उबजाणनी किताप 29
याकुबेन लाबान सी मेळनु
अळतेन याकुब अघु वाट्ये पड़्यु, ने उगण वाळा देस मां आयु। हयु चां असु देख्यु की खयड़ा मां एक कुवु छे, ने तेर धड़े गाडरा-बुकड़ान तीन टुळा बठला छे; काहाकी जु दगड़ु तीना कुवान मुंहडा पर मेक्लु रवतेलु, तीना सी तीनु टुळा काजे पाणी पावतेला, चु भारलु दगड़ु हतलु। ने जत्यार आखा टुळा भेळा हय जातला, तत्यार गुवाळ्या तीना दगड़ा काजे कुवान मुंहडा पर सी गबड़ायान गाडरा-बुकड़ा काजे पाणी पावे, ने पछेन दगड़ा काजे कुवान मुंहडा पर जसु हतलु तसु मेक देय।
तेरेमां याकुब गुवाळ्या सी पुछ्यु, “एय मारा भायसे, तुहुंं कां वाळा छे?”
चे कह्या, “हामु हारान सहर वाळा छे।”
तत्यार चु तीनुक पुछ्यु, काय तुहुंं नाहोरेन लाबानेन पुर्या काजे उळखे?
चे कह्या, “हव हामु तीना काजे उळख्यु।”
तत्यार याकुब पुछ्यु, “चु वारलु ते छे की?” चे कह्या, चे वारलु छे।
आखो काय वारलु छे। देखु, “पली पुरे राहेल तेरा गाडरा पुठ्ये आवणे बाजी रय।”
याकुब कह्यु, “देखु, हाल दाहड़ु छे ने दाहड़ु डुबणेन बेसकी वार छे। माल-डर भेळा हवणेन टेम नी हय रय; तेरेमां गाडरा-बुकड़ा काजे पाणी पावीन पछा ली जाय्न चारु,”
चे कह्या, “हामु हंय असा नी कर सकजे; जत्यार आखा टुळा भेळा हवे, तत्यार दकड़ु कुवा पर सी अथा करे, ने तत्यार हामु गाडरा-बुकड़ा काजे पाणी पावजे।”
तींद्री असी वात चालीत रहली ने राहेल, जी माल-ढुरे चारतेली, ची आपसा बासेन गाडरा-बुकड़ा लीन आय। याकुब आपसा मामा लाबानेन पुरे राहेल, ने तेरा गाडरा-बुकड़ा काजे देख्यु ने कुवान मुंहडे सी दगड़ु अथु करी ने आपसा मामा लाबानेन गाडरा-बुकड़ा काजे पाणी पावी। तत्यार याकुब राहेलेन गुळा देदु, ने खुस हय्न जुरे आयड़्यु। ने याकुब राहेल काजे कय देदु, की मे तारा बासेन अवल्यात माय्न छे। राहेल काजे असु बी बताड़्यु की मे रीबकान पुर्यु छे।
तेरेमां राहेल घर भीणी दवड़ीन गुय ने आपसा बास काजे आखो बताड़ देदी। लाबान तीना याकुबेन खबर सामळीन तीनाक भेळु हवणे दवड़्यु, ने तीनाक गळे लागीन गुळा देदु, अळतेन आपसे घर ली ज्यु। ने याकुब आपसा बारामां आखो बताड़्यु। तत्यार लाबान याकुब सी कह्यु, “छाचलीन तु मारा हाटकान ने मास माय्न छे।” ने याकुब एक महनो भरीन चां रह्यु।
याकुब राहेल ने लीया: वाटे सेवा करे
तत्यार लाबान याकुब सी कह्यु, “मारु सगासायन तार सी असलुत सेवा करान्नु मार वाटे वारु नी हय; तेरेमां कव की सेवान बदले तुसे काय आपो?” लाबानेन दुय पुरे हतली, तींद्रेम सी मट्लीन नाव: लीया ने नानलीन नाव राहेल हतलो। लीयान ते डुळा कमजु हतला, बाकुन राहेल ते वारु ने घाटाळी हतली।
तेरेमां याकुब काजे राहेल गमतेली, तेरेमां कह्यु, “मे तारी नानली पुरे राहेल वाटे सांत साल लग तारी सेवा करीस।”
लाबान कह्यु, “तीनीक पारका पुर्याक आपणे सी तुसे देणु वारु रवसे; तेरेमां मार धड़े रव।” तेरेमां याकुब राहेल वाटे सांत साल लग सेवा कर्यु; ने तीनाक राहेल गमी तेरेमां थुड़ाक दाहड़ा लग रह्यु तसों लाग्यो।
तत्यार याकुब लाबान सी कह्यु, मारी बायर मेसे आप, ने मे तीनी धड़े जायस, “काहाकी मारा दाहड़ा पुरा हय ज्या।” तेरेमां लाबान तीना जागान आखा माणसे काजे भेळा कर्यु, ने खाणेन तीहवार राख्यु। राते आपसी पुरे लीया काजे याकुब धड़े ली ज्यु, ने चु तेरे धड़े गुयु। लाबान आपसी पुरे लीया काजे पावरनी बणे करीन आपसी पावरनी जील्पा काजे आप देदी। संदारे मालम पड़्यो की जी ते लीया छे, तेरेमां हयु लाबान सी कह्यु, “मार साते असु काय कर्यु? मे तार भेळे रय्न सेवा कर्यु, ती मे राहेल वाटे सेवा नी कर्यु काय? ती तु मेसे काजे असु काहा धुकु देदु?”
लाबान कह्यु, “हामरेन चां असी रीती हय नी की मट्ली काजे छुड़ीन नानली काजे पयणी देजे। बाकुन ईयाव करलान तसु पुरु हाप्तु एर धड़े रव ने मे तुसे राहेल साते बी तारु ईयाव कराड़ दीस। बाकुन तुसे अळी सांत साल लग मारी चाकरी करनु पड़से।”
याकुब तसुत कर्यु, ने लीयान हाप्ता काजे पुरो कर्यु, तत्यार लाबान तीनी राहेल काजे तेरी बायर बणे करीन आप देदु। लाबान आपसान पुरे राहेलेन पावरनी बणे करीन जी तेरी पावरनी तीनी बील्हा काजे आप देदु। तत्यार याकुब राहेल धड़े गुयु, ने तीनाक लीया सी अदु राहेल गमी, ने चु लाबान भेळे रय्न सांत साल अळी सेवा कर्यु।
याकुबेन अवल्यात
जत्यार यहोवा भगवान देख्यु की चु राहेल लीया सी अदु गमे, तत्यार तेरेमां चु तेरी कुख काजे खुल देदु, बाकुन राहेल आंझी रय गुय। तेरेमां लीया भार पाये हय ने एक पुर्यु हयु, ने तसु करीन तेरो नाव रुबेन पाड़्यु, “यहोवा मारा दुख काजे देख्यु, हंय मारु घर धेणी मेसे काजे वारु राखसे।” अळतेन ची अळी भार पाये हवी ने तीनीन एक पुर्यु हयु: तत्यार हयु असी कय, “काहाकी असी सामळी की मे वारु गमो, यहोवा मेसे काजे जु बी पुर्यु आप्यु।” तेरेमां हयी तेरो नाव सीमोन पाड़ी। अळी ची भार पाये हवी ने तेरो एक पुर्यो हयो; ने ची कय, “ईनी कावा ते मारु घर धेणी मेसे जड़ जासे, काहाकी हेरे सी मारा तीन पुर्या हया।” तेरेमां तेरो नाव लेवी पाड़्या। ने अळी ची भार पाये हवी ने अळी एक पुर्यु हयु, ने ची कय, “हंयन कावा मे भगवान काजे वारु कय्स।” तेरेमां ची तेरो नाव यहुदा पाड़ी; ती तेरो कुख बंद हय ज्यो।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.