Bhilali Bible
उबजाणनी किताप 31
याकुब लाबान धड़े सी डासीन जाय
अळतेन लाबानेन पुर्यान जी वात याकुब काजे सामळनेन आय, “याकुब हामरा बासेन आखो काय हापकी लेदु, ने बासेन माल-धन मांगीन आपसु मालदार बण ज्यु।” ने याकुब असु देख्यु की लाबान पेहलेन तसु परम भाव नी करे। तत्यार यहोवा भगवान याकुब सी कह्यु, “तुंद्रा डाहा-बुड़ान देस मां ने आपसा पयदावारीन जागा पर जाती रव, ने मे तारे साते रवीस।”
तत्यार याकुब, राहेल ने लीया काजे खयड़ा मां आपसान गाडरा-बुकड़ा धड़े बुलावीन कह्यु, “तुंद्रा बासेन मुंहडा काजे देखीन असो मालम पड़े, की हयु मेसे पेहलेन तसु हंय मेसे नी राखे; बाकुन मारा बासेन भगवान मारे साते छे।” तु बी जाणे की मे तारा बासेन सेवा पुरा ताकुत सी कर्यु। तेबी तारु बास मेसे धुकु दीन मारी दाहड़की काजे दस कावा बदली देदु; बाकुन भगवान मारे काय बी नुकसान नी करनी देदु। जत्यार हयु कह्लु, चीत्रा वाळा गाडरा-बुकड़ा तारी दाहड़की रवसे, तत्यार आखा गाडरा-बुकड़ा चीत्रा वाळात हवणे लाग्या; ने जत्यार हयु कह्यु, धार्या वाळा तारी दाहड़की रवसे, तत्यार आखा धार्या वाळा हवणे लाग्या। तसु करीन भगवान तारा बासेन घर माले लीन मेसेक आप देदा।
एक कावा मे सपना मां असु देखणे बाजी रहलु की, जे बुकड़ा, बुकड़ी पर कुदणे बाजी रहला, चे बुकड़ा धारीवाळा, ने काबर्या-चीतर्या हतला तत्यार भगवानेन सरगेन काहवाळ्यु सपना मां कह्यु ए याकुब, मे कह्यु, काय हुकुम छे। चु कह्यु, उचु भाळीन तीनु आखा बुकड़ा काजे जे तीनु बुकड़ी पछळ हतला तीनु काजे देख, की चे धारीवाळा, चीत्रा वाळा, ने दागवाळा छे; काहाकी जो काय लाबान तारे सी भुंडो करे, चो मे देखलु छे। मे तीना बेतेलेन भगवान छे, जां तु एक खंबा पर तेल नाखलु, ने मारी बादा लेदलु। हंय चाल, ईना देस सी नीकळीन आपणी पयदावारीन जागा पर जा।1
तत्यार राहेल ने लीया याकुब काजे जपाप आप्या, “काय हामरो हंय बी हामरा बासेन घर कायनी वाटु बच्यु? काय हामु तेरी नींगा मां पारका बण ज्या काय? देख, हयु हामुक ते वेच देदु, ने तसु करीन हामरो आखो धन सार देदु। तेरेमां भगवान हामरा बासेन जतरो बी धन ली लेदलु छे, चो हामरा ने हामरा पुर्यान छे; हंय जो काय भगवान तार सी कहे, चत कर।”
तत्यार याकुब आपसा पुर्याक ने बायराक उटड़ा पर बठाड़ देदु; ने जतरा बी माल-धन चु पद्दनराम मां भेळु करीन मालदार बण गुयलु, आखा तीनुक लीन कनान देस मां आपसा बास इसाक धड़े जाणेन मरजी सी, साते ली गुयलु। लाबान आपसा गाडरान कान्या कातरने करीन जाती रहलु, ने राहेल आपसा बासेन घरन्या देवे काजे चुट्टाये ली जाती रहली। तेरेमां याकुब अरामी माणसे धड़े सी चुरी सी ढासी ज्यु, बाकुन तीनाक बताड़्यु नी की मे ढास जाम। चु आपसान आखो काय लीन ढास्यु, ने फरात नदीन पली धड़े जाय्न गीलाद देस भीणी गुयु। तीसरे दाहड़े लाबान काजे खबर जड़ी की याकुब ढास ज्यु। तेरेमां चु आपसा माणसेक भेळा करीन सात दाहड़ा लग तेरे पछळ पड़्यु, ने गीलाद देसेन बयड़ा मां तीनाक धर लेदु। बाकुन भगवान रातेन सपना मां अरामी लाबान धड़े आवीन कह्यु, “चेतीन रव, तु याकुब काजे वारु कवजी ने नी भुंडो कवजी।” ने लाबान धड़े जाती र्यु। याकुब आपसान तम्बुक गीलाद नावेन बयड़ान देस मां उबु करलु हतलु; ने लाबान बी आपसा भायसे भेळे आपसान तम्बु तीनात देसेन बयड़ा मां उबु कर्यु।
तत्यार लाबान याकुब सी कहणे लाग्यु, “तु असु काय कर्यु की मारे धड़े सी चुरी सी आवती र्यु, ने मारी पुरेक असु ली आयु, मानु की चे लड़ाय मां धरायली पुरे हय? तु हुगलुत काहा ढासी आयु, ने मेसेक पुछ्यु नी ने मारेन्चां सी जाती र्यु; कदी तु कवतु ते मे खुसी सी खाणो खावाड़नी ने वाजा-गाजा ने गीते गावता जाय्न तुसेक मकेलतु? तु ते मेसे मारी पुरेन गुळा लग नी देणी देदु? तु असु करीन तु वारु नी कर्यु। तुहुंं काजे नुकसान करनेन मारे भीणी ताकुत ते छे; बाकुन तुंद्रा बासेन भगवान मारे सी गुये रात्ये कह्यु, ‘चेतीन रव, याकुब काजे नीते वारु कवजी ने नी भुंडो कवजी।’ मे जाणो की तु आपसा घर जाणे हींडतेलु तेरेमां तु जाती र्यु, बाकुन तु मारा घर सी देवता काजे चुट्टाये काहा ली ज्यु?”
याकुब लाबान काजे जपाप आप्यु, “मे असु सुचीन बीही गुयलु की कांखुर माय्न मारी पुरे काजे ली जाती नी रहे। जीना भीणी बी तारा देवता जड़े, चु नी जीवे। मारे धड़े जो काय तारो नीकळे, तीनाक मारा गवा माणसे अगळ उलखीन ली ले।” काहाकी याकुब नी जाणतेलु राहेल घरेन देवता काजे चुट्टाये ली आवली।
असु सामळीन लाबान, याकुब ने लीया ने दुयु पावरनीन तम्बु मां गुयु; ने काय नी जड़्यो। तत्यार लीयान तम्बुम सी नीकळीन राहेलेन तम्बु मां गुयु। राहेल ते घरेन देवता काजे उटड़ा पर झुळनो मेकीन तेर पर बठी रहली। लाबान तींद्रा आखा तम्बु हेर्यु तेबी नी जड़्या। राहेल आपसान बास सी कय, “ए मारा बास; मार पर मां रीसवाये। मे तार अगळ उभी नी हय; काहाकी छेटे हय रहली।” तेरेमां तीनाक घर सी देवता हेर्यु तेबी नी जड़्या।
तत्यार याकुब रीसवाय्न लाबान सी लड़ाय करने लाग्यु, “मारु काय गुनु छे? मारु काय पाप छे की तु मारे पछळ पड़्यु ने रुकणेन हक कसु हयु? तु मारा आखा समान्या मां हेर्यु, ती तुसे मारा घरेन आखा समान्या मां सी काय जड़्यो? काहींग जड़्यो हय ती तीनाक आपणे घर ने आपणा भायस अगळ मेक दे, ने चे आपणे ईचमां नीयाव करे। ईनु वीस साल लग मे तारे धड़े रह्यु; तेरेम नी ते तारा बुकड़ा-गाडरा गाबण नाख्या, ने नी मे तारा पाठड़्यान मास खादु। जीनाक बयड़ा माय्न जानवर्या मार्या तीनुक तार धड़े नी लावतेलु, ने तीनीत कीमत मां देतलु; चाहे वीजाळे चुरी हवे, चाहे रात्ये, तेबी मारे सी ली लेतलु। मारी ते असी हालत हतली की दीसु ते तपे ने रात्ये काय उस्टा मां मेसेक नींद नी आवतेली। वीस साल लग मे तारे घर रह्यु; चोवदे साल लग ते मे तारी दुयु पुरे वाटे, ने छव साल तारा गाडरा-बुकड़ा वाटे सेवा कर्यु; ने तु मारी धाड़की काजे दस कावा बदली देदु। मारा बासेन घर, मतलब अब्राहमेन भगवान, तेरो बीहाणो इसाक बी माने, कदी मार भीणी नी रवतु ते छाचलीन तु हंय मेसे खाली हाते जाणी देतु। मारा दुख ने मारा हातेन काठा काम काजे देखीन भगवान काल रात्ये तुसेक लड़्यु।”
याकुब ने लाबानेन ईचमां वादु
लाबान याकुब सी कह्यु, “जी पुरे ते मारीत छे, ने जे पुर्या बी मारात छे, ने जे गाडरा-बुकड़ा बी मारात छे। बाकुन हय मे ईनु पुरे, ने अवल्यात सी काय कर सको? हंय आव, मे ने तु वादु करजे, ने चो तारे ने मारे ईचमां गवा बणीन रहे।”
तत्यार याकुब एक दगड़ु लीन खंबु उबु कर्यु। तत्यार याकुब आपसा भाय बेटा सी कह्यु, “दगड़ा भेळा करु,” असा सामळीन चे दगड़ा भेळा करीन एक ढेर बणाया, ने हीनात ढेर धड़े चे खाणो खादा। तीना ढेरेन नाव लाबान ते यजर सहादुथा पाड़्यु, बाकुन याकुब तेरो नाव गीलीयाद पाड़्यु। लाबान कह्यु, “जु ढेर तारे मे मारे ईचमां गवा रवसे।” तेरेमां तेरो नाव गीलीयाद पाड़्या, ने मीजपा बी; काहाकी हयु कह्यु, “जत्यार आपणु छेटे-छेटे रवजे तत्यार यहोवा भगवान मारी ने तारी नीगा राखतु रहे। कदी तु मारी पुरे काजे दमे नीते तीनुक छुड़ीन दीसरी सी ईयाव करे, ती आपणे साते काहनुक माणुस ते नी रवसे; बाकुन देख, मारे तारे ईचमां भगवान गवा रवसे।” अळतेन लाबान याकुब सी कह्यु, “ईना ढेर काजे देख ने ईना खंबा काजे देख, जीनाक मे मारे ने तारे वाटे हेर करने करीन बणावला छे। जु ढेर ने जु खांबु दुयु, ईनी वातेन गवा छे की लड़ाय करनेन मन सी नीते ते ईना ढेरेन पली आवीस ने नी तु ईनी धड़े आवसी। अब्राहम ने नाहोर ने तेरु बास; तींद्रु जु भगवान छे, हयुत आपणु दुयुन ईचमां नीयाव करे।” तत्यार याकुब तेरी सगुन खादु ने हेरो बीहाणो तेरु बास इसाक बी मानतेलु; ने याकुब तीना बयड़ा पर जानवर्यान बादा चड़ायु, ने आपसा भाय-बेटा काजे खाणो खाणे करीन बुलायु, तत्यार चे खाणो खायन तीना बयड़ा पर रात रुक्या। ने लाबान एगुत उठ्यु, ने आपसा पुरे-पुर्यान गुळा देदु ने संयबरकत आपीन जाती र्यु, ने आपसे घर जाती र्यु।
Source notes (1)
- Cross-reference उबजाणनी किताप 28:18-22
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.