Bhilali Bible
उबजाणनी किताप 23
सारान मुत ने अगा कर्या
जत्यार सारा एक सोव सत्तावीस साल लग जीन्दी रय, तत्यार ची हेबरोन मां मर गुय, जो कनान देस मां छे, तेरेमां अब्राहम चां गुयु ने रड़्यु।
तत्यार अब्राहम धड़ेन चां सी उठीन हीत्यु माणसे सी कहणे लाग्यु,1 “मे तुंद्रेन चां पाहनत्यु ने पारकु छे; मेसेक तुहुंं हड़वाय वाटे जागु आपु, चु मारुत हय जाय, काहाकी मे ईनी धड़ काजे गाड़ीन मारा डुळा सी छेटु करों।”
ती हीत्ती जातीन माणसे अब्राहम काजे जपाप आप्या, “ए हामरा मालीक, हामरी सामळ; तु ते हामरु मुखी माणुस छे। हामरी हड़वाय मां जां तु चाहे चां धड़ काजे गाड़ दे, हामरेम सी काहनु बी हड़वायन जागु लेणे सी काहनु बी नी रुके, ने तु चां तारी घरवाळी काजे जां गाड़ सक्सी।”
तत्यार अब्राहम उठीन उबु हय ज्यु, ने हीत्या माणसे अगळ, जे तीना देस मां रवतेला, तींद्रे पाये पड़ीन कहणे लाग्यु, “कदी तुंद्री असी मरजी छे की मे ईना धड़ काजे गाड़ीन मार डुळा सी छेटे करों, ती मे लीलघाय्न कहो, की सोहरेन पुर्यु एपरोन काजे कहु, की चु तेरा मकपेला वाळी नावेन दर, चो तेरा खेत धड़े छे; मेसे काजे मुल आप दे, काहाकी चु जागु तुंद्रे चां हड़वाय मारुत जागु हय जाय।”
एपरोन ते हीत्तीयान ईचमां बठी रहलु, तेरेमां जतरा बी हीत्या माणसे तेरे सहरेन फाटक मायन माहीं जातला, तीनु आखा अगळ हयु अब्राहम काजे जपाप आप्यु, “ए मारा मालीक, असो नी, मारी सामळ; चु जागु तुसे आपो, ने तेरेम जु दर छे, चु बी आपो; आपणा जाती वाळा माणसे अगळ मे तुसे आपो; काहाकी तु तारा मरला काजे हड़वाये पर मेकी सके।”
तत्यार अब्राहम तीना देसेन रहणे वाळान माणसे अगळ पाये पड़्यु। ने तेरी सामळतु जाय्न एपरोन सी कह्यु, “कदी तु असु चाहे, ती मारी सामळ; तीना जागान जतरी कीमत छे, चो मे देणे हींडर्यु; ततरा पयस्या मारे सी ली ले, तत्यार मे ईना धड़ काजे चां गाड़ दीस।”
एपरोन अब्राहम काजे जपाप आप्यु, “ए मारा मालीक, मारी वात सामळ; तीना जागान कीमत ते चार सोव चांदीन सीक्का छे; बाकुन मारे ने तारे ईचमां अतरी कीमत ते काय नी हय,तेरेमां असुत ली ले ने तारा मरला काजे हड़वाय पर मेक दे।” अब्राहम एपरोनमेन वात मानीन तेरो कीमतेन सीक्का तुलीन आप देदु, जतरा हयु हीत्या माणसे अगळ कहलु, मतलब चार सोव चांदीन सीक्का जे लेण-देण मां करतेला।
तसु करीन एपरोनमेन जागु, जु मम्रे नावेन जागा अगळ मकपेला मां हतली, चांहान दर समेत, ने तीनु आखा झाड़का भेळे जे बी तेरेम हतला ने तेरे च्यारे-मेर सेडे लग आप देदु, ने जतरा हीत्या तेरे सहरेन फाटक मायन माहीं जातला, तीनु आखा अब्राहमेन हक मां आय गुय।2
तेरे पछेन अब्राहम आपसान घरवाळी सारान धड़ काजे तीना मकपेला वाळी जागेन दर मां जो मम्रे मतलब हेबरोन अगळ कनान देस मां हतली, चां गाड़्यु। तसु करीन चु जागाम दर समेत, जो तेरेम हतलो, हीत्या माणसेन मदत सी हड़वायन जागु अब्राहमेन हक मां आय ज्यु।
Source notes (2)
- Cross-reference ईब्रानीयो 11:9,13
- Cross-reference नेवताळान काम 7:6
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.