Bhilali Bible
उबजाणनी किताप 22
अब्राहम पारख मां पड़े
ईनु वातेन पछेन मां असो हयो की भगवान, अब्राहम सी असु कयन तेरी पारख कर्यु, ए अब्राहम! चु कह्यु, “देख, मे जां छे।”1
भगवान कह्यु, “तारा पुर्या काजे जु तारु एकुत लाड़कु पुर्यु इसाक काजे, तेरे सी तु बेसकु परम करे, तीनाक लीन मोरीया देस मां जाती रव, ने चां तीनाक एक बयड़ा पर जो मे तुसेक बताड़ीस चां बाळीन चड़ाव।”
तेरेमां अब्राहम संदारे एगुत उठ्यु ने तेरा गदड़ा पर लाकड़ा फुड़ीन फाचरा बांदीन तीयार कर लेदु, ने तेरा दुय पावर्या, ने तेरा पुर्या इसाक काजे बी भेळे लेदु, ने बाळीन चड़ावणे करीन लाकड़ा चीर लेदु, तत्यार नीकळीन तीना जागा भीणी चाल पड़्यु, तीना बारामां भगवान वात करलु। तीसरे दाहड़े अब्राहम उंचु भाळीन तीना जागा काजे लांबे सी देख्यु। ने चु तेरा पावर्या काजे कह्यु, “गदड़ा धड़े जांत तु रव; पुर्यु ने मे चां लग जाय्न, ने आंधीन, पछा तुंद्रे धड़े आय जासुन।”
तत्यार अब्राहम बाळीन चड़ावु करने करीन लाकड़ा लीन आपसा पुर्या इसाक पर मेक्यु, ने आकठो ने छुरु आपसा हात मां लेदु; ने चे दुयु भेळात चाल पड़्या। इसाक आपसा बास अब्राहम सी कह्यु, “ए मारा बास,”
चु कह्यु देख, आकठो ने लाकड़ा ते छे;
बाकुन भाळीन चड़ावा वाटे गाडरो कां छे?
अब्राहम कह्यु, “ए मारा पुर्या, भगवान बादा चड़ावणेन करीन गाडरान तज्बु भगवानुत कर देसे।” ने दुयु भेळे-भेळे अगा चालता गुया।
जत्यार चे तीना जागा काजे जीनाक भगवान बताड़लु चां पुग ज्या; तत्यार अब्राहम चां चड़ावान जागु बणायन लाकड़ा काजे वारु जमाड़ीन मेक्यु, ने आपसा पुर्याक इसाक काजे बांदीन चड़ावान जागे मेकला लाकड़ा पर मेक देदु।2 अळतेन अब्राहम अघुस हात करीन चक्कु लेदु काहाकी आपसा पुर्याक चड़ावु करे। तत्यार यहोवान सरगेन काहवाळ्यु हीनाक आयड़ीन कह्यु,
अब्राहम हीयु जपाप आप्यु काय मे जान छे।
हीयु कह्यु, “तार पुर्या पर चक्कु घुण मेके ने नी तेरो काहींन करे, काहाकी तु मेसे काजे तारा पुर्या काजे देणे बी तीयार हय ज्यु, मतलब तारु एकुत पुर्यु जु तारु लाटेकलु छे, तेरेसी मे जाणी ज्यु की तु भगवानेन धाक माने।”
तत्यार अब्राहम च्यारे-मेर देखणे लाग्यु ती देखाव पड़्यो, की तेर पछळ एक गाडरो आपसा सींगड़ा सी झाड़का मां गुताय रवलो, ने अब्राहम जाय्न तीना केवड़ा काजे लायु, ने आपसा पुर्यान जागे तीना काजे भाळीन चड़ायु। अब्राहम तीना जागान नाव यहोवा यीरे पाड़्यु, तेरेमां आज बी कहे की, “यहोवान बयड़ा पर देणे वाळु बणसे।”
अळतेन यहोवान सरग काहवाळ्यु अळी बी सरग सी अब्राहम काजे कह्यु, “यहोवा भगवान असु कहे की, मे मारीत सगुन खायन कहो की तु असो काम कर्यु की तारा पुर्याक, मतलब एकुत पुर्यु जु तारु लाड़कु हतलु तीनाक बी देणे करीन तीयार हय ज्यु;3 तेरेमां छाचलीन तुसे संयबरकत आपीस, ने छाचलीन तारी अवल्यात काजे तारान तसा, ने दरीयान आड़े-धड़ेन रेतळा मां पीठीन तसु जीनाक गीणाये नी तसु करीस ने तारा अवल्यात दुसमन्यान सहरेक जीत्या करसी;4 ने धरतीन आखा जात्या तुसे तारा अवल्यातेन वजे सी बरकत वाळु मानसे, काहाकी तु मारी वात मान्यु।” तत्यार अब्राहम आपसा पावर्या धड़े जाती र्यु, ने चे आखा बेरसेबा भीणी भेळा गुया; ने अब्राहम बेरसेबा मां रहणे लाग्यु।
नाहोरेन खानदानी
ईनी वातेन पछेन असो हयो की अब्राहम काजे खबर जड़ी, “तारा भायस नाहोर तेरी घरवाळी मील्का सी पुर्या हया।” मीलकान पुर्या जे छे मतलब तेरु पेहलु पुर्यु, उस, ने उसेन भायस बुज, ने कमुएल, जु अरामेन बास छे। अळी केसेद, हजो, पीलदास, यीदलाप ने बतुएल। ईनु आठु काजे मील्का ने अब्राहमेन भायस नाहोर सी पयदा हया। ने बतुएल सी रीबकान बास हतलु। नाहोर एक अळी पावरनी काजे बणावलु, तेरो नाव रुमा हतलो, तीनी पावरनीन च्यार पुर्या हया; तेब्यु, गहम, तहस ने माक्यु हयु।
Source notes (4)
- Cross-reference ईब्रानीयो 11:17
- Cross-reference याकुब 2:21
- Cross-reference ईब्रानीयो 6:13,14
- Cross-reference ईब्रानीयो 11:12
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.