Bhilali Bible
उबजाणनी किताप 24
इसाकेन ईयाव
अब्राहम जत्यार डाहु हय गुयलु ने तेरा बेसका साल हय गुयला, ने यहोवा भगवान आखी वात मां तीनाक संयबरकत आप्यु। अब्राहम आपसा डाहला पावर्याक जु तेरा घरेन ने आखी चीजेक समाळनेन तेर हक मां हतलो, तीनाक बुलायन कह्यु, “तारु हात मार सातळ्या तळे मेक; ने मारे सी सरग ने धरतीन भगवान यहोवान अगळ ईनी वात मां सगुन खा, की तु मारा पुर्या वाटे कनानी माणसेन पुरे मां सी, जींद्रा ईचमां मे रह, चां सी काहनी काजे बी घुण लावु। बाकुन तु मारा देस मां मारात कुटुम्या मां जाय्न मारा पुर्या इसाक वाटे लाडी बणावजी।”
पावर्यु तीनाक कह्यु, “कदी ची पुरे ईना देस मां मार भेळे नी आवणे चाहसे; ती काय मेसे तारा पुर्या काजे तीना देस मां जासी तु आयु, चां ली जाणु पड़से?”
अब्राहम तीनाक कह्यु, “संभ्ळीन रव, मारा पुर्या काजे चां कदी घुण ली जाजी।” सरगेन भगवान यहोवा, जु मेसेक मारा बासेन घर सी ने मारी पयदावारीन जागे सी ली आवीन मार सी सगुन खायन कह्यु, की “मे ज देस तारा अवल्यात काजे आप दीस; हयुत सरग काहवाळ्यु तारे अगळ-अगळ मकलसे, काहाकी तु मारा पुर्या वाटे चां सी एक लाडी ली आवे। ने कदी ची पुरे तार भेळे नी आवणे चाहे तत्यार ते तु मारी सगुन सी छुट जासी; बाकुन मारा पुर्या काजे चां घुण ली जाय।” तत्यार चु पावर्यु आपसा मालीक अब्राहमेन सातळ्या तळे आपसान हात मेकीन तीना भेळे ईनी वातेन बारामां सगुन खादु।
तत्यार चु पावर्यु आपसा मालीकेन उटड़ा मां सी दस उटड़ा छाटीन ने तेरा वारु-वारु चीज मां सी काहींन-काहींन लीन गुयु; ने मेसोपोटामीया मुलुक मां नाहोर नावेन सहर धड़े पुग्यु। ने हयु उटड़ा काजे सहरेन बाहर एक कुवा धड़े बठाड़्यु। तत्यार सांती वेळाय हतलो, तीने टेमे पुरे पाणी भरने नीकळे। चु कहणे लाग्यु, “ए मारा मालीक अब्राहमेन भगवान यहोवा, आज मारा काम काजे पुरो कर, ने मारा, मालीक अब्राहम पर दया कर। देख, मे पाणीन ईना कुवा धड़े उबु हय र्यु; ने सहर मां रहण्यान पुरे पाणी भरने करीन आवणे बाजी रय तेरेमां असो हवणे दे की मे जीनी पुरे सी कहों, तारो गुळो मार भीणी कर ने मे पीणे हय र्यु, ने ची कहे, ‘ले पी ले, अळतेन तारा उटड़ा काजे बी पाय दीस,’ ची हयीत हवणु चाहजे जीनीक तु आपसा इसाक वाटे ठहरावलु छे; तत्यार मे जाणी लीस की तु मारा मालीक पर दया करलु छे।”
ने असो हयो की जत्यार चु कय रहलु ने रीबका, जी अब्राहमेन भाय नाहोर सी पयदा हवली ने मील्कान पुर्यु, बतुएलेन पुरे हतली, ची खांदे पर गुळो मेकीन आवी। रीबका बेसकी घाटाळी, ने कुवारली हतली, ने काहना बी पुर्यान मुंहडो नी देखली। ची कुवा मां पाणी धड़े उतरी, ने आपसीत गुळा काजे भरीन बाहर नीकळी। तत्यार चु पावर्यु तीनीक भेळु हवणे दवड़्यु, ने कह्यु, “तारा गुळा मायन पाणी मेसेक ईतरोक पाव।”
ची कय, “ए मारा मालीक, ले, पी ले,” ने ची मामार गुळाक हेटी उतारीन हातेम ली-लीन तीनाक पाणी पाय। जत्यार ची तीनाक पाय देदी, तत्यार कय, “मे तारा उटड़ा काजे बी पाणी भरीन पाय दीस जां लग चे पीसे।” तत्यार ची मामार आपसा गुळाक खाली करीन पछी ची कुवे पाणी भरने गुय; ने तेरा आखा उटड़ा काजे पीणेन पाणी भर देदी। ने चु पावर्यु तेर भीणी एक-हेट्यु हयन भाळतु जाय्न असु वीचार कर्यु की यहोवा मारा काम काजे कर देदु की नी।
जत्यार उटड़ा पाणी पी लेदला, तत्यार चु पावर्यु छव गराम सोनान नाकेन काटु हेड़ीन तीनीक आप्यु, ने सोव गराम सोनान दुय कड़ा बी आप्यु; ने पुछ्यु, “तु कुणीन पुरे छे? मेसेक बताड़। काय तारा बासेन घर हामरे वाटे रहणेन जागु छे?”
ची जपाप आपी, “मे ते नाहोर सी पयदा हवली मील्कान पुर्यु बतुएलेन पुरे छे।” अळतेन ची तीनाक कय, “हामरेन्चां आखा पुळा ने चारु रेट छे, ने रहणे वाटे जागु बी छे।”
तत्यार यहोवा काजे चु पावर्यु पाये पड़ीन आंधीन कह्यु, “अब्राहमेन यहोवा भगवानेन बड़ाय हवे, जु आपसा दया ने खराय काजे मारा मालीक सी छेटु नी कर्यु: यहोवा मेसेक वारलु वाटे चालाड़ीन मारा मालीकेन कुटुमेन घर पर लायु।”
तत्यार ची जुवान पुरे दवड़ीन आपसी माय काजे ईनी वातेन बारामां आखो काय बताड़ देदी। तत्यार रीबकान भायस लाबान हतलु चु बाहर कुवा भीणी दवड़ीन गुयु जां अब्राहमेन पावर्यु हतलु। रीबकान भाय हतलु लाबान चु नाकेन काटु ने आपसान बहणीसेन हाते कड़ा बी देख्यु, ने तेरी असी वात बी सामळ्यु की चु माणुस मारे सी असी वात कह्यु; तत्यार चु तीना माणुस धड़े गुयु; ने असु देख्यु की चु पाणी धड़े उटड़ान चां उबु हय र्यु। ती चु कह्यु, “ए यहोवा भीणी सी संयबरकत वाळा माणुस माहीं आव तु काहा बाहर उबु हय र्या? मे तार वाटे रहणे करीन घरमां जागु तीयार कर देदलु छे, ने उटड़ा वाटे बी जागु तीयार कर देदलु छे।”
ईनी वात पर चु माणुस घर मां गुयु; ने लाबान उटड़ान झुळनो छुड़ीन पुळा ने चारु आप्यु; ने तेरा ने तेरे साते आवला माणसेन बी पाय धुवणे करीन पाणी आप्यु। तत्यार अब्राहम पावर्या अगळ खाणे-पीणेन काहींन मेक्या; बाकुन चु असु कह्यु “मे जत्यार लग मे काहा आयु चो नी कहों तत्यार लग मे नी खाम।”
लाबान कह्यु, “कय दे।”
तत्यार चु कह्यु, मे ते अब्राहमेन पावर्यु छे। यहोवा मारा मालीक काजे बेसकु मटु संयबरकत आपलु छे; तेरेमां चु बेसकु माल-धन वाळु माणुस हय ज्यु; ने चु तीनाक गाडरा-बुकड़ा, गावड़ी-बेल, सोनो-चांदी, पावर-पावरनी, उटड़ा ने गदड़ा बी आप्यु। ने मारा मालीकेन घरवाळी सारान डाहवारा मां तीनीक एक पुर्यु हयु; ने तीना पुर्या काजे अब्राहम आपसान हतलो चो आखो चीज आप देदलु छे। मारु मालीक मार सी असु सगुन खावाड़लु छे की मे तारा पुर्या वाटे कनानी जातीन पुरे मां सी जां मे रह, चां सी नी लावो। मे तेरा बासेन माणसे, ने कुटुमेन माणसेन्चां जाय्न तेरा पुर्या वाटे एक कुवारली पुरे ली आवीस। तत्यार मे मारा मालीक सी कह्यु, कदी ची पुरे मार पछळ नी आवे। तत्यार चु मेसेक कह्यु, यहोवा, तेर अगळ मे चालतु आवलु छे, चु तारे साते सरगेन काहवाळ्याक मकलीन तारा काम काजे पुरो करसे; ने तु मारा माणसे, ने मारा बासेन घरन्यात मां सी मार पुर्या वाटे लाडी ली आवजी। तु तत्यारुत मारी ईनी सगुन सी छुटसी, जत्यार लग तु मारा कुटुमेन माणसे धड़े नी जासी; ने कदी चे तुसेक पुरे नी आपे, ती तु मारी सगुन सी छुट जासी।
तेरेमां मे आज तीना कुवा धड़े आवीन कहणे लाग्यु, ए मारा मालीक अब्राहमेन भगवान यहोवा, कदी तु मारा ईना काम काजे पुरो करतु हय; ती देख मे पाणीन ईना कुवा धड़े उबु हय र्यु; ने असो हवे की जी पुरे पाणी भरने करीन आवे, ने मे तीनीक कहों, “तारा गुळा मां सी थुड़क पाणी पाव,” ने ची मेसेक कहे, “पी ले, ने मे तारा उटड़ा वाटे बी पीणेन पाणी भर दीस,” ची हयीत पुरे हवणु चाहजे जीनीक तु मारा मालीकेन पुर्या वाटे ठहरावलु छे। मे मन मां असु कय रहलु, ने तत्यारुत रीबका खांदा पर गुळो लीन आवतेली; अळतेन ची पाणी धड़े उतरीन भरने लागी। मे तीनीक कह्यु, मेसेक पाणी पाव। ने ची मामार आपसा गुळा काजे खांदे सी उतारीन कय, ले, पी ले, अळतेन मे तारा उटड़ा काजे बी पाय दीस, तसु करीन मे पी लेदु, ने ची उटड़ा काजे बी पाय देदी। तत्यार मे तीनीक पुछ्यु, तु कुणीन पुरे छे? ने ची कय, मे ते नाहोर सी पयदा हवली मील्कान पुर्यु बतुएलेन पुरे छे, तत्यार मे तीनीक नाकेम पेहरन्यु काटु, ने तेरा हातेम पेहरन्या कड़ा बी आप देदु। अळतेन मे पाये पड़ीन यहोवा भगवान काजे आंध्यु, ने मारा मालीक अब्राहमेन भगवान यहोवा काजे वारु कह्यु, काहाकी चु मेसेक वारलु वाटे पर लायु की मे मारा मालीकेन पुर्या वाटे सगासाय मां सी पुरे ली आवों। तेरेमां हंय, कदी तुहुंं मारा मालीक साते दया ने खरायन वेहवार करने चाहे, ती मेसेक कहु; ने कदी नी चाहता, तेबी मेसेक कय देवु; काहाकी मे जेवड़्ये नीते डाखर्ये हात भीणी जाम।
तत्यार लाबान ने बतुएल जपाप आप्या, “जी वात यहोवा भगवानेन मरजी सी हवली छे; तेरेमां हामु तारे सी भलो कय सकसे ने नीते बुरो। देख, रीबका तारे अगळ छे, तीनीक ली जा, ने ची यहोवान बुलेन अनसारे, तारा मालीकेन पुर्यान लाडी बण जाय।” जत्यार अब्राहमेन पावर्यु तींद्री वात सामळ्यु, तत्यार चु पाये पड़ीन यहोवा काजे आंध्यु। अळतेन चु पावर्यु सोनान ने चांदीन रकम, पुथल्या हेड़ीन रीबका काजे आप्यु; ने तेरा भायस काजे ने माय काजे बी चु महंगली रकम आप्यु।
तत्यार चु ने तेरा साती पुठ्ये खादा ने पीदा। चे चांत रात रया, जत्यार चे संदारे सुयन उठ्या ती पावर्यु कह्यु, हंय मेसे मारा मालीक धड़े जाणेन हुकुम आप दे।
रीबकान भाय ने माय कह्या, पुरे काजे हाल थुड़ाक दाहड़ा मतलब दसेक दाहड़ा लग हामरे धड़े रहणी दे। तेर पछेन ची जां सी जाय सके।
बाकुन चु कह्यु तीनुक कह्यु, मेसेक मां रुकु, काहाकी यहोवा मारा काम काजे पुरो करलु छे।
चे कह्या, हामु पुरे काजे बुलायन पुछी लेजे की ची काय कहे।
ने चे रीबका काजे बुलाया ने पुछ्या, “काय तु ईना माणीस पुठ्ये जासी?” ची कय।
“हव मे जायस।”
तत्यार चे रीबका, ने तेरी डाहली पावरनी ने अब्राहमेन पावर ने तेरा साती आखा काजे मकली देदा। ने रीबका काजे संयबरकत आपीन कह्या, ओ हामरी बहणीस,
तु हजारु लाखु माणसेन डाहली माय छे,
ने तारा अवल्यात तींद्रा दुसमनेन सहर काजे जीत लेय।
तत्यार रीबका आपसीन जुवान साती वाळी भेळे चाल पड़ी; ने उटड़ा पर चहड़ीन तीनु माणसे पुठ्ये बठ गुय। तसा करीन चु पावर्यु रीबका काजे भेळे लीन चाल पड़्यु।
इसाक जु की दखणाव देस मां रवतेलु, चु लहेरोई नावेन कुवा धड़े नेगेव नावेन उजाड़्या बयड़ा मां आयु। सांतीन टेमे चु खळदान मां चालने-फीरने नीकळ्यु ने चु उंचु भाळीन भाळ्यु ती असु देख्यु की उटड़ा आवणे बाजी र्या। रीबका उची भाळी ती इसाक देखाव पड़्यु, देखतेत चु उटड़ा पर सी उतरी पड़ी। तत्यार ची अब्राहमेन पावर्या सी पुछी की, जु माणुस खळदान मायन हामरे सी भेळु हवणे आवणे बाजी र्यु, चु कुण छे?
पावर्यु कह्यु, हयु ते मारु मालीक छे। तत्यार रीबका घुमतु करीन आपसा मुंहडा काजे ढाक लेदी।
पावर्यु इसाक काजे जो काय आपसा साते वीत्यो चो आखो कह्यु। तत्यार इसाक रीबका काजे तम्बु मां ली ज्यु जां तेरी माय रवतेली, ने तीनी सी ईयाव करीन तेरेसी परम कर्यु। तत्यार चु खुस हयु, काहाकी तेरी माय सारा मर गुय करीन दुखी हतलु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.