Bhilali Bible
उबजाणनी किताप 19
सदोमेन पाप
सांती वेळाय हवतेत चे दुय सरगेन काहवाळ्या सदोम सहर मां आया, ने लुत सदोमेन फाटक धड़े बसी रहलु। तीनुक देखीन अब्राहम तींद्रे सी भेळु हवणे करीन उठ्यु, ने पाये पड़ीन आंध्यु। ने कह्यु, “ए मालीक, तुहुंं मारे घर आवु, ने पाय धुवीन मारे घर रात रहु ने अगास उठीन जाजु।”
बाकुन चे जपाप आप्या, “नीही, हामु ते सहरेन चवराया पर राते सुवसुन।”
बाकुन लुत ते लीलघाय्न बेसकु कवतुत रह्यु, तत्यार चे लुतेन वात मानीन तेरे घर गुया, ने लुत तींद्रे वाटे खाणों, नी खमीर वाळा रुटा बणाय्न तीनुक खावाड़्यु।
सुवणे सी पेहेल, सदोम सहरेन माणसे ने, जुवान्या सी लागाड़ीन डाहला लग, मतलब आखे दुरेन आखा माणसे तीना लुतेन घर काजे घेरवी लेदा। चे मट्ये अवाज सी आयड़ीन लुत सी कहणे लाग्यु, “कां छे चे माणसे, जे आज रात मां जां रुकला छे? तीनुक बाहर ली आव ने तींद्रे भेळे सुवीन सोवसार करजी।”
लुत बाहर नीकळ्यु ने बारनो लागाड़ीन तींद्रे सी लीलघाय्न कह्यु, “ए मारा भायस, मारो कहणु छे, असलो काम घुण करु। देखु, मारी दुय पुरे छे,चे हाल लग काहना बी पुर्यान मुंहडो नी देखी, मे तीनुक बाहर ली आवों। तींद्रे साते तुहुंंक जसों बी लागे तसों वेहवार कर लेवु, बाकुन ईनु माणसे साते असा मां करु, काहाकी जे मारा मेजवान्या छे।”
चे कह्या, “छेटे हय जां!” ने कहणे लाग्या, तु ते पारकु बणीन जां रय र्यु बाकुन हंय तु नीयाय करने वाळु बन्ने कर र्यु! हामु तारु हाल तीनु माणसे सी बी अदुस गलत करसुन। चे लुत काजे बीहाड़ने लाग्या ने बारनाक तुड़ने करीन अगास गुया। बाकुन चे मेजवान्या लुत काजे धरीन घरमा भर लेदा ने बारनो लागाड़ देदा। चे मेजवान्या तीनु पर, जे बारना पर हतला, नानला सी मटला लग, आखा काजे आंदळा कर देदा, ती चे बारनाक हेरता-हेरता हारी पड़्या।1
लुत सदोम सी नीकळे
तत्यार चे दुय मेजवान्या लुत सी कह्या, “जां तारा अळी कुण-कुण छे? जवायलास, पुर्या, पुरे हय मतलब ईना सहर मां जे बी हय, तीनुक ईना जागा पर सी कान्खुर ली जाती रव, काहाकी हामु ईना जागा काजे खत्तम करने वाळा छे। यहोवा भगवान माणसे काजे एला पाड़नेन ने आयड़नु तेरे अगळ बेसको जादा हय ज्यो तेरेमां हयु हामुक ईनु काजे खत्तम करने करीन मकेल्लु छे।”
लुत जाय्न आपसान हवणे वाळा तीनु जवायलास सी वात कर्यु, जींद्रे साते तेरी पुरेन मांगणी हय गुयली। तीनुक कह्यु, “उठु, जां सी बाहर जाती रहु, यहोवा ईना सहर काजे खत्तम करने वाळु छे!” बाकुन लुतेन जवायलास समज्या की जु असलुत कय र्यु।2
जत्यार वीजाळो हवणे लाग्यो, तत्यार काहवाळ्या लुत काजे मामार करु करीन कह्यु ने कह्यु की, “उठ, तारी घरवाळीक ने दुयु पुरेक जे जां छे तीनुक ली जां। नीते तु बी ईना सहरेन डंड भेळे खत्तम हय जासी।” बाकुन लुत वारुत लागाड़तु रह्यु, तत्यार मेजवान्या तीनाक ने तेरी घरवाळीक ने दुयु पुरेन हात धरीन तीनुक बचाड़ीन बाहर ली ज्यु, काहाकी यहोवा भगवानेन दया तींद्रे पर हतली। जत्यार चे बाहर ली आया, ती तींद्रेम सी एक जणु कह्यु, “आपणा जीव बचाड़ीन ढासु! पछु फीरीन घुण देखु ने घाट्ये घुण उभा रहु! बयड़ा मां जाती रहु, नीही ते तुहुंं आखा खत्तम हय जासु।”
बाकुन लुत तींद्रे सी लीलघाय्न कह्यु, “ए मारा मालीक असु मां करे! जत्यार तारा सेवक तारी गीण-दया हेरीत लेदु ने तु मारा जीव काजे बचाड़ने सी मारी परम ने दया काजे बड़ावलु छे, बयड़ा मां सातायणु मार वाटे काठो रवसे, कांखुर मां असो नी हय जाय की मार पर परेसानी आय जाय, ने मे मर जाम। देखु, एक सहर असो छे की मे चां ढासी सको, ने चो नानलो बी छे। मेसेक चांत ढासणी दे, काय जो सहर नानलो छे? ने मारु जीव बची जासे।”
हयु तीनाक कह्यु, “देख, मे ईनी वात मां बी तारी लीलघाय काजे मानो की जीना सहरेन वात तु कर्यु, तीनाक मे खत्तम नी करो। छाटुस चां ढासी जा, काहाकी जत्यार लग तु चां नी पुगे तत्यार लग मे काय बी नी कर सकीस।”
तेरेसी तीना सहरेन नाव सोवर पड़्यो।
सदोम ने अमोरान नास
लुत सोवर धड़े जातेत धरती पर दाहड़ु उंग्यु। तत्यार यहोवा आपसा भीणी सी सदोम ने अमोरा पर सरग सी आकठो ने गंधकेन ईंगाळा पाड़्यु, ने तीनु सहर काजे ने आखा घाट्या मां रहण्या ने आखा सहरेम रहण्या आखा माणसे काजे, खेतेन आखी मेर भेळा खत्तम कर देदु। लुतेन घरवाळी जी तेरे पछळ हतली ची पछी फीरीन देखी, ने ची नणेन खांबु बण गुय।3
संदारे अब्राहम उठीन तीना जागा पर गुयु, जां चु यहोवा अगळ उबु हतलु, ने सदोम ने अमोरा, ने तीनु घाट्यान पुरा देस भीणी नजर नाखीन असु देख्यु, की तीना देस मां सी भाटीन तसु कुळ्ळु नीकळी र्यु। ने असो हयो की जत्यार भगवान तीनु घाट्यान सहर काजे, जां लुत रवतेलु, उलट-पुलट करीन खत्तम कर देदु, तत्यार अब्राहम काजे हेर करीन लुत काजे तीनी परेसानी सी बचाड़ी लेदु।
मोआबी ने अम्मोन्यान कळ
लुत सोवर सहर काजे छुड़ देदु, ने बयड़ा पर आपसी दुयु पुरे भेळे रहणे लाग्यु, काहाकी हयु सोवर मां रहणे सी बीहतेलु, तेरेमां हयु ने तेरी दुयु पुरे तीना एक दर मां रहणे लाग्यु। तत्यार मट्ली बहणीस नानली बहणीस सी कय, “हामरु बास डाहु हय ज्यु, ने धरती पर असु असा काहना पुर्या नी हय की हामु तेरे भेळे सुवजे ने अवल्यात पयदा करजे। तेरेमां आव, आपणु आपणा बास काजे अंगुरेन रस पावीन, तेरे भेळे सुवजे, काहाकी आपणा बासेन अवल्यात काजे बड़ावजे।” तेरेमां चे तीनेत रात्ये आपसा बास काजे अंगुरेन रस पाया, तत्यार मट्ली बेटीस जाय्न आपसा बास भेळे सुय गुय, बाकुन चु नी जाण्यु, की ची कत्यार सुय, ने कत्यार उठ गुय।
ने असो हयो की दीसरे दाहड़े मट्ली बेटीस नानली सी कय, देख, काल रात्ये मे आपणा बास भेळे सुय, तेरेमां आज बी रात्ये अंगुरेन रस पावजे ने तु जाय्न तेर भेळे सुव काहाकी आपणा बासे सी अवल्यात बड़ावजे। तेरेमां ची तीने रात्ये बी आपसा बास काजे अंगुरेन रस पावी, ने नानली बेटीस जाय्न तेरे भेळे सुय, बाकुन तीनाक तत्यार बी मालम नी पड़्यो की ची कत्यार सुय ने कत्यार उठ गुय। असी करीन लुतेन साहरे, लुतेन दुयु पुरे भार पाय हय गुय। मट्लीन एक पुर्यु हयु ने तेरो नाव मोआब पाड़ी, ची मोआब जाती आज लग छे ने डाहलु बास बण्यु। ने नानलीन बी एक पुर्यु हयु, ने तेरो नाव बेआनमी पाड़ी, ने ची अमोन जाती आज लग छे, ने तींद्रु डाहलु बास बण्यु।
Source notes (3)
- Cross-reference 2 राजा 6:18
- Cross-reference लुका 17:28-29
- Cross-reference लुका 17:32
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.