Bhilali Bible
उबजाणनी किताप 18
इसाकेन पयदा हवणेन वायदु
अब्राहम तपी वेळाय, मम्रे वाड़ी मां आपसा तम्बु मां बठी रहलु, चां बांज नावेन झाड़का हतला। तत्यार यहोवा भगवान तीना काजे देखाव पड़्यु; अब्राहम असु देख्यु की तेरे अगळ तीन माणसे उभा हय र्या। जत्यार हयु तीनु माणसे काजे देख्यु, तत्यार चु तीनुक भेळु हवणे करीन तम्बुन बारनाम सी दवड़ीन तींद्रे धड़े गुयु, ने पाये पड़ीन आंध्यु। अब्राहम तीनुक कह्यु, “मारा मालीक, कदी मारे पर तारी गीण-दयान नींगा छे ती मे लीलघाय्न कहों, की मे तारु चाकर्यु, छे करीन मारेन थुड़ीक वार थुबीन जाजी। तु ईना झाड़का तळे बठ, मे तारे वाटे पाणी लीन आवों, काहाकी तु आपसा पाय धुय ले। मे तारे वाटे खाणों तीयार करों, काहाकी खाणे तारा जीवेक सांती जड़े, तत्यार तु अघु बी जाय सके- काहाकी तु तार चाकर्यान चां आवलु छे, ती चु अब्राहम सी कह्यु,
“हसुत कर, जसु तु कह्यु।”
अब्राहम तम्बु मां सारा धड़े जाय्न कह्यु, “तीन चवकीन पीठु कुसणीन रुटा कर दे।” अब्राहम दवड़ीन आपसान गावड़ीन-बेलेन टुळा मां जाय्न एक वारलु केवड़ु छाटीन आपसा चाकर्या काजे देदु ने तीनाक कह्यु, मामार चुड़ाया। अळतेन अब्राहम, दही, दुत ने मास जो बणावलो हतलो, तीनुक खावाड़्यु, जत्यार चे तीन्हु खाणेत बाजी रहला, तत्यार अब्राहम झाड़कान साहळे तींद्रे धड़े उबु रह्यु।1
चे अब्राहम सी पुछ्या, “तारी घरवाळी सारा कां छे?”
अब्राहम कह्यु, “ची तम्बु मां छे।”
ईनी वात पर तींद्रेम सी एक जणु कह्यु, “आवते साल ईनात टेमे तारी घरवाळी सारान एक पुर्यु हवसे।” अब्राहमेन आसु तम्बु भीणी फीरीन हतलु, ने तम्बान बारने पर रय्न सारा जी वात सामळी रहली।2 अब्राहम ने सारा बेसका डाहा हय गुयला, ने सारान महना आवणु बंद हय गुयला।3 तेरेमां सारा मन-मन मां हासती जाय्न वीच्यारने लागी, “मे ने मारु धेणी हामु दुयु बेसका डाहा हय ज्या, हंय काय जी खुसी हामरा जीवाय मां आवसे?”
तत्यार यहोवा अब्राहम सी पुछ्यु, “सारा असी कय्न काहा हासी रय की काय छाचलीन मारे सी एक पुर्यु पयदा हवसे, काहाकी मे ते बेसकी डाही हय गुयली छे?” “काय यहोवा वाटे ज काठो छे? मे आवते साले टाकली टेमे तुसे भेळु हवणे आय्स, जत्यार सारान एक पुर्यु हवसे।”
तत्यार सारा बीही गुय, ने असी कय्न झुट मेकणे बाजी गुय की, “मे नी हासी।”
तत्यार भगवानेन सरग काहवाळ्यु कह्यु, “तु छाचलीन हासली।” 4
सदोम ने आखा सहरेन नास हवणु
अळतेन चे माणसे जाणे करीन उठ्या ने सदोम भीणी देखणे लाग्या, अब्राहम तीनुक अघुस मेकणे करीन तींद्रे भेळे चालतु रह्यु। तत्यार यहोवा असु वीच्यार्यु की, “जो काम मे करनेवाळु छे, काय मे जी वात अब्राहम सी साताड़ीन राखों? अब्राहम सी ते छाचलीन एक मट्ली ने ताकुत वाळी जाती बणसे ने तेरेत सी धरतीन परुन आखी जाती संयबरकत काजे हात करसे।5 काहाकी मे हीना काजे असु करीन नेवाड़लु छे की हयु आपसा पुर्याक ने घरेन माणसेक छाचली ने नीयावेन वात सीकाड़े ने चे यहोवान वाटे पर काठा रहे, काहाकी यहोवा अब्राहम सी करला वादा काजे पुरा करे।”
तत्यार यहोवा बताड़्यु, “सदोम ने अमोरान सहरेन आयड़नु ने तींद्रा पाप बेसका हय ज्या तेरेमां मे चां जाय्न देखीस की, तींद्रा काम छाचला छे की नी, कदी नी हय ती मे तीनाक उळखी लीस।”
अळतेन तींद्रेम सी दुय माणसे चां सी पछा वळीन सदोम भीणी चाल पड़्या, बाकुन अब्राहम ते यहोवा अगळ उंबुत रह्यु। अब्राहम यहोवा सी कह्यु, “काय छाचलीन तु भुंडला माणसे भेळे धरमी माणसे काजे बी खत्तम कर देसी? कदी तीना सहर मां पचास जणा धरमी हय, ती काय तु तीना सहर काजे खत्तम कर देसी? काय तीनु पचास धरमीन वजे सी दीसरा माणसे नी बचे? असो काम करने सी तु छेटु रवजी की भुंडला भेळे धरमी काजे मारनु, ने भुंडला ने धरमी साते एक जसु वेहवार करनु। असो तु नी करनु चाहे! काय आखी धरतीन नीयाव करने वाळु नीयाव नी करसे?”
यहोवा कह्यु, “कदीक मेसे सदोम सहर मां पचास धरमी माणसे जड़ जाय, ती मे तींद्रे वजे सी तीना आखा सहर काजे छुड़ दीस।”
अब्राहम अळी कह्यु, “एक कहे ती ते मे धुळु ने रखड़ुत छे, तेबी मे मालीक सी वात करनेन हिम्मत कर्यु, कदी चां पचास मां सी पांच घट जाय, ती काय तु पांच धरमी घट जाणे सी आखा सहर काजे खत्तम कर देसी?”
यहोवा जपाप आप्यु, “कदी मेसे चां चालीस ने पांच बी जड़ जाय, ती मे तीना सहर काजे खत्तम नी करों।”
एक कावु अळी अब्राहम यहोवा सी कह्यु, “कदी चां चाळीस जड़से ती?”
यहोवा जपाप आप्यु, “कदी चालीस बी रवसे तेबी मे तीना सहर काजे खत्तम नी करो।”
तत्यार अब्राहम कह्यु, “मालीक, तु मारे सी नराज मां हवे, ने एक कावु अळी पुछणी दे, कदी चां तीस धरमी रवसे ती?”
यहोवा जपाप आप्यु, “कदी चां तीस बी जड़ जाय, ती तीनुक मे खत्तम नी करों।”
अब्राहम कह्यु, “मालीक, मे तारे सी वात करनेन हिम्मत ते करीत लेदु, ती कदी चां बीसुत रवसे ती?”
यहोवा जपाप आप्यु, “मे तीनु बीसेन वजे सी तीना सहर काजे खत्तम नी करों।”
अळी अब्राहम कह्यु, “ए मालीक, तु रीस घुण माने, आकरी कावा तार सी लीलघाय्न कहों कदी चां तसुत धरमी रवसे ती?”
यहोवा जपाप आप्यु, “ती मे तीनु दसेन वजे सी तीना सहर काजे खत्तम नी करों।” जत्यार यहोवा सी अब्राहम सी वात करीत लेदलु, ती चु चां सी जाती र्यु, ने अब्राहम आपसे घर जाती र्यु।
Source notes (5)
- Cross-reference ईब्रानीयो 13:2
- Cross-reference रोमीयो 9:9
- Cross-reference रोमीयो 4:9
- Cross-reference 1 पतरस 3:6
- Cross-reference उबजाणनी किताप 12:3; नेवताळान काम 3:25; गलातीयो 3:8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.