Bhilali Bible
उबजाणनी किताप 17
वायदान सहलाणी, फतरी काटणु
जत्यार अब्राम नब्बे ने नव सालेन हयु, तत्यार यहोवा भगवान तीनुक उजेंतु हयु ने कह्यु, “मे आखाम सी मटु ताकत वाळु भगवान छे; तु मारे साते बणीन रव ने अघु बड़तु जा। मे मारा वायदा काजे तारे साते पुरा करीस ने तारा अवल्यात काजे बड़ावीस।” तत्यार अब्राम पाये पड़ीन भगवान काजे आंध्यु ने भगवान कह्यु, तारे साते मारु वादु असु छे की, तु बेसका जातीन माणसेन डाहलु बास कहवायसी। हंय सी तारो नाव अब्राम नी रवे बाकुन अब्राहम रवसे, काहाकी मे तुसेक बेसका जातीन डाहलु बास बणावलु छे। मे तारु बेसकु वेल अधाड़ीस, मे तुसे जाती-जातीन डाहलु बास बणायस ने तारा अवल्यात मां राजा बणसे।
मे तारे ने तारा आवणे वाळा अवल्यात साते पीड़ीडीट असु वादु करों की तारे ने तारे पछेन आवणे वाळान अवल्यातेन बी भगवान रय्स। जो कनान देस छे, जां तु परदेसी बणीस रवे, जो देस तुसे ने तारे पछेन आवणे वाळा अवल्यात काजे जलेमकी अवल्यात रवसे, ने मे तींद्रु भगवान रवीस।1
तत्यार भगवान अब्राहम सी कह्यु, “तु ने तारे पछेन तारा अवल्यातेन माणसे मारा वायदाक छाचलीन लीन चालता रवजु। तारे ने तारे पछेन वाळा अवल्यात साते मारु जु वादु छे ने जीनाक मान्नु जरुड़ी छे; तुंद्रे मां हरेक पुर्यान फतरी काटा कराड़े।2 ने तुहुंं तुंद्री फतरी काटाड़जु, असुत मारे ने तारे ईचमां वादु करनेन सहलाणी रवसे। तारा अवल्यात मां आखा पीड़ी मां हरेक पुर्यान पयदा हवणे सी आठवे दाहड़े तेरो फतरी काटाड़जु, चाहे चो तुंद्रे घरेन पावर्यु हय जु तारे घर मां पयदा हयु हय चाहे तीनाक तुहुंं दीसरा देस सी मुल लेदा हय, चाहे चे तुंद्रा अवल्यात माय्न नी रवे तेरु बी करजु। तुंद्रा घर मां पयदा हयु हय, चाहे पयस्या दीन लेदा हय, तींद्रो बी फतरी काटाड़नु पड़से। तुंद्रा डील मां मारु जु वादु जलमेन वादु छे। बाकुन जु फतरी नी काटाड़े, तीनाक खानदानी सी बाहर कर देजु, काहाकी चु मारा वादा काजे तुड़लु छे।”3
भगवान अब्राहम सी असु बी कह्यु, “तारी घरवाळी सारे काजे हंय सी सारे घुण कह्वे, बाकुन हंय तेरो नाव सारा रवसे। मे तीनीक संयबरकत आपीस, ने मे तुसेक तेरे सी एक पुर्याक आपीस, मे तीनाक संयबरकत आपीस, तेरेसी ची जाती-जातीन डाहली माय बणसे, ने बेसका राजान पयदावारी तींद्री अवल्यात सी हवसे।”
असो सामळीन अब्राहम पाये पड़ीन तीनाक आंध्यु, ने हास्यु, ने मन मांत कहणे लाग्यु, “काय सोव सालेन माणसेन पुर्यु पयदा हय सके? सारा जी नब्बे ने नव सालेन छे, काय ची पुर्याक पयदा कर सकसे?” ने अब्राहम भगवान सी कह्यु, “इस्माएल तारी नींगा मां वारु बणीन रवे! अतरोत बेसको।”
तत्यार भगवान अब्राम सी कह्यु, “नीही! तारी घरवाळी सारा सी एक पुर्यु हवसे, ने तेरो नाव इसाक पाड़जी, मे तेरे साते असु वादु करीस की जे तेरे पछेन आवणे वाळी पीड़ी-पीड़ी लग सदान वादु रवसे। 4 ने इस्माएल बारामां, मे तुंद्री वात सामळ्यु; मे तीनाक बी छाचलीन संयबरकत आपीस; मे तेरा बेसका पुर्या हवसे, ने बेसका अवल्यात बी बणसे। चु बारे राजान मुखी बी बणसे ने मे तेरे सी मटीत जाती बणावीस। बाकुन मारु वादु इसाक साते करीस, तीनाक सारा सी अगले साल ईनात टेम मां पयदा हवसे।” जत्यार भगवान अब्राहम सी जी वात करी लेदलु, तत्यार चु चां सी उपर पछु चहड़ी ज्यु।
तत्यार अब्राहम तीनेत दाहड़े भगवानेन हुकुमेन अनसारे आपसा पुर्यान इस्माएलेन ने आपसा पावर्याक, तींद्रो पयदावारी तेरे खानदानी मां हवलो ने तीनुक चु पयस्या दीन मुल लेदलु, ने घरन्यान हरेक पुर्यान भगवान जसु कह्यु तसु तींद्री फतरी काट्यु। जत्यार अब्राहमेन फतरी काटाड़्यु तत्यार चु नब्बे ने नव सालेन हतलु। ने तेरु पुर्यु इस्माएल दस ने तीन सालेन हतलु, जत्यार तेरी फतरी काट्या; अब्राहम ने तेरा पुर्या इस्माएलेन फतरी काट्या च एकुत दाहड़े हयो। ने तेरा घरन्यान आखा पुर्या, जे तेरा घर मां पयदा हवला, ने जे दीसरा देस सी पयस्या सी मुल लेदला, आखान फतरी काट्या तींद्रे भेळेत हयो।
Source notes (4)
- Cross-reference नेवताळान काम 7:5
- Cross-reference नेवताळान काम 7:8; रोमीयो 4:11
- Cross-reference उबजाणनी किताप 17:24; 21:4
- Cross-reference गलातीयो 4:7-8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.