Skip to content
BibleKenya

Bhilali Bible

उबजाणनी किताप 16

हाजीरा ने इस्‌माएल

अब्‌रामेन घरवाळी सारे काजे अवल्‌यात हतली, बाकुन तीनीन एक हाजीरा नावेन गुलाम पावरनी मीसर देस वाळी हतली; सारे अब्‌राम सी कय, “मे ते माय नी बण सकती काहाकी मे आंझी छे तेरेमां दया करीन तु मारी पावरनी भीणी जा, ती तेरे साहरे घर वस जासे।” ने अब्‌राम सारे वात काजे मान लेदु। अब्‌राम काजे कनान देस मां रवतेला दस साल हय गुयला, ती अब्‌रामेन लाडी सारे आपसीन पावरनी हाजीरा काजे अब्‌रामेन घरवाळी हवणे करीन सुप देदी। ती अब्‌राम हाजीरा भेळे सुयु, ने हाजीरा भार पाये हय ती जी सारे काजे आपसी नींगा मां फालतु समजणे लागी।

सारे अब्‌राम सी कय, “मारी गुलाम पावरनी मेसे हंय फालतु समजणेन वजे तु छे, मे ते तीनीक वारीस बणने करीन तुसेक सुपली बाकुन हाजीरा भार पाये हवतेत मेसेक फालतु समजणे लागी हंय यहोवात तारे ने मारे ईचमां नीयाव करे।”

अब्‌राम सारे सी कह्‌यु, “सामळ, तारी पावरनी पर तारुत हक छे, तु जसी चाहे तसी तेरे साते कर।” तत्‌यार सारे हाजीरा काजे बी एलहा पाड़ने बाजी गुय, ने हाजीरा परेसान हयन सारे अगळ सी ढास गुय।

जत्‌यार यहोवान सरगेन काहवाळ्‌यु तीनीक बयड़ा मां झीरी धड़े देख्‌यु, ज सुर नावेन वाट पर हतलो, ती सरगेन काहवाळ्‌यु कह्‌यु, ओय, सारेन पावरनी हाजीरा, कां सी आय रय ने कां जाय रय?

हाजीरा जपाप आपी, “मे मारी मालकी सारे भीणी सी ढासीन आय रय।”

यहोवान सरगेन काहवाळ्‌यु कह्‌यु, “आपसी मालकीन चां पछी जाती रव ने तेरे हक मां रव।” ने यहोवान सरगेन काहवाळ्‌यु कह्‌यु, “मे तारा अवल्‌यात काजे बेसकु बड़ावीस, ने अतरा बी की चे गीणाय नी तत्‌रा।” यहोवान सरगेन काहवाळ्‌यु असु बी कह्‌यु, “देख, तारु एक पुर्‌यु पयदा हवसे, तेरो नाव तु इस्‌माएल राखजी। काहाकी यहोवा तुंद्‌रा दुख पर धीयान लागाड़लु छे। चु पुर्‌यु एक जंगली गदड़ान तसलु रवसे; चु आखान वेरी बणसे ने दीसरा बी एरे सी दुसमनी करसे, ने चु आपसा भायसेन ईचमांत काम करसे।”

तत्‌यार हाजीरा, जु तेरे सी वात कर्‌यु तेरो नाव अत्‌ता-एल-रोय पाड़ी (मतलब यहोवा भगवान मारा दुख पर धीयान कर्‌यु ईना जंगल मां मार सी वात कर्‌यु) ईनी वातेन हवणे सी तीना कुवान नाव लहेरोई पड़्‌यु, जो कादेस ने बेरेद मुलुकेन ईचमां छे।

अब्‌राम सी हाजीरान एक पुर्‌यु हयु, ने अब्‌राम तेरा पुर्‌यान नाव इस्‌माएल राख्‌यु, अब्‌राम अस्‌सी ने छव सालेन हतलु, तत्‌यार इस्‌माएल पयदा हवलु।

Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.