Bhilali Bible
उबजाणनी किताप 20
अब्राहम ने अबीमेलेक
अळतेन अब्राहम चां सी नीकळीन दखणाव वाळा देस मां आवीन कादेस ने सुर मुलुकेन ईचमां रय्न, ने गरार देस मां रहणे लाग्यु। ने अब्राहम आपसान घरवाळी सारान बारामां कहणे लाग्यु, हयी मारी बहणीस छे, तेरेमां गरार देसेन राजु अबीमेलेक आपसा सीपायड़ाक कह्यु की साराक जां बुलाय लावु। रात्ये भगवान सपना मां अबीमेलेक धड़े आयन कह्यु, “सामळ, जीनी बायर काजे तु राख लेदलु छे, तेरे वजे सी तु मर जासी, काहाकी ची दीसरा सी ईयाव करली छे।”1
बाकुन अबीमेलेक तेरे धड़े जाय्न नी सुयु, तेरेमां चु असु कह्यु, “ए मालीक, काय तु नी-गुनाळा वाळा काजे खत्तम कर देसी? काहाकी हयुत ते असु कह्यु, हयी मारी बहणीस छे, ने हयी बायर बी असी कय की हयु मारु भायस छे, मे ते मारा मनेन छाचाय ने खराय सी असो काम कर्यु।”
भगवान तीनाक सपना मां असु कह्यु, “हव, मे जाणों की तु वारु मनेन खराय सी असो काम करलु छे ने मे तुसेक रुकीन बी राख र्यु की तु मार नींगा मां असु पाप नी करे; तेरेमां तुसे तीनीक हात नी लागाड़ने देदु। तेरेमां हंय तीना अदमीन बायर काजे पछु दी दे, काहाकी चु भगवानेन वाती बी छे, ने तार वाटे बी दुवा करसे, ने तु जीवतु रवसी बाकुन कदी तु पछु नी आपे ती हेर राख, की तु, ने तारा जतरा बी माणसे छे, आखा मरीत जासु।”
संदारे अबीमेलेक एगुत उठीन आपसा आखा पावर्या काजे बुलायन जी आखी वात सामळायु, ने चे माणसे बीही ज्या। तत्यार अबीमेलेक अब्राहम काजे बुलायन कह्यु, “तु हामरे साते असो ज काय कर्यु? ने मे तारो काय बीगाड़्लु की तु मारे ने मारा राज्य पर असु मटु पाप नाख देदु? तु मारे साते असो काम कर्यु जो करनु नी हतलो।” अळतेन अबीमेलेक अब्राहम सी पुछ्यु, “तु कायन वजे सी असो काम कर्यु?”
अब्राहम असु कह्यु, “मे असु समजी रहलु की ईना जागा पर भगवानेन काय बी धाक नी हसे; तेरेमां मारी घरवाळीन वजे सी जे माणसे मेसेक मार नाखसे। एक कहे छाचलीन ची मारी बहणीस छे, हयी मारा बासेन पुरे ते छे बाकुन मारी मायन पुरे नी हय; तेबी ची मारी घरवाळी बण गुय। ने असो हयो की जत्यार भगवान मेसे मारा बासेन घर काजे छुड़ीन बाहर नीकळनेन हुकुम आप्यु, तत्यार मे तीनीक कह्यु, अतरी दया मार पर करजी की आपणु दुयु जां बी जाजे चां-चां तु मारा बारामां कवजी की जु मारु भायस छे।”
तत्यार अबीमेलेक गाडरा-बुकड़ा, गावड़ी-बेल, ने पावर-पावरनी बी अब्राहम काजे आप्यु, ने तेरी घरवाळी सारा बी तेर हातेम सुप देदु। ने अबीमेलेक कह्यु, देख, “मारो देस तारे अगळ छे, जां तुसेक भावे चां रव।” ने अबीमेलेक साराक कह्यु, “देख, मे तारा भाय काजे हजार चांदीन टका देदलु छे। जे तारी ईज्जतेन पयस्या छे, कुय बी तुसेक गुनाळी करीन वाक नी नीकाळनु चाहजे।” तत्यार अब्राहम यहोवा भगवान सी दुवा कर्यु की अबीमेलेकेन, ने तेरी घरवाळीन, ने पावरनी कुख खुल जाय ने तींद्रो कुख खुल गुय ने पुर्या हवणे लाग्या। काहाकी यहोवा अब्राहमेन घरवाळीन सारान वजे सी अबीमेलेकेन घरेन आखा बायरान कुखे बंद कर देदलु।
Source notes (1)
- Cross-reference उबजाणनी किताप 12:13; 26:7
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.