Bhilali Bible
नीरगमन 9
पांचवी गरा: जानवर्यान मरनु
अळी यहोवा मुसा काजे कह्यु, “फीरोन राजा धड़े जाय्न कव, ईब्रानी माणसेन यहोवा भगवान तुसेक असु कह्यु, मारा टुळान माणसे काजे जाणे दे, ने चे मारी सेवा भक्ती करसे। ने कदी तु तीनुक जाणे नी देय, ने हंय बी रुकी राखसी, ती सामळ तारा जी घुल्ला, गदड़ा, उटड़ा, गावड़ी, बेल, गाडरा ने बुकड़ा आखा जानवर्या पर यहोवा हात बड़ावसे, ने एक बेसकी गरा फेलसे। बाकुन यहोवा ईस्रायेली जानवर्या, ने मीस्री माणसेन जानवर्या, मां जु फरक राखसे की, जे ईस्रायेली छे, तींद्रेम सी एक बी नी मरे।” अळी यहोवा जो कय्न एक टेम टाक्यु, “मे जो काम ईना देस मां वाहणे करीस।”
दीसरे दाहड़े यहोवा असुत कर्यु, ने मीस्र देसेन आखा जानवर्या मर गुया, बाकुन ईस्रायेली माणसेन एक बी जानवार्या नी मर्या। ने फीरोन राजु माणसे काजे मकल्यु, बाकुन ईस्रायेली माणसेन एक बी जानवर्या मां सी एक बी नी मरलो हतलो, तेबी फीरोन राजान मन काठु बणलु रयु, ने चु ईस्रायली माणसे काजे जाणे नी देदु।
छट्वी गरा: फुफला ने फुड़ान नीकळनु
अळतेन यहोवा मुसा ने हारुन काजे कह्यु, “तुहुंं दुयु जणा चुला मां सी एक-एक मुठ रखड़ु ली आवु, ने मुसु तीना रखड़ा काजे फीरोन राजा अगळ वादळा मां उडाड़ देसे। तत्यार चु रखड़ु छयड़ु बणीन आखा मीस्र देस मां माणसे, ने जानवर्या दुयु पर फुड़ा ने फुफला बण जासे।” हेरेसी चे तीना चुला माय्न रखड़ु लीन फीरोन राजा अगळ उबा हया, ने मुसु तीना रखड़ा काजे वादळा मां उडाड़ देदु, ने चु रखड़ु माणसे ने जानवर्या दुयु पर फुड़ा ने फुफला हंय गुया।1 तीना फुड़ान साहरे जादुगर मुसा अगळ उबा नी रय सक्या, काहाकी आखा मीस्री माणसेन फुड़ान तसात तीनु जादुगर माणसेन बी फुड़ा नीकळी रवला। तत्यार यहोवा फीरोन राजान मन काठु कर देदु, ने जसु यहोवा मुसा काजे कह्यु, तसुत चु तींद्री वात नी सामळ्यु।
सांतवी गरा: गारे ने पाणी
अळतेन यहोवा मुसा काजे कह्यु, “संदारे उठीन फीरोन राजा अगळ उबु हव ने तीनुक कव की, ईब्रानी माणसेन भगवान यहोवा असु कह्वे: की मारा माणसे काजे जाणे दे की चे मारी सेवा करे। ने ते हव मे तारे पर2 ने तारा पावर्या पर, ने तारा माणसे पर आखी भातीन गरा मकलीस, तींद्रे सी तु जाण लेसी की आखी धरती पर मारेन तसु कुय नी हय। मे हंय तक हात बड़ाय्न तुसेक, ने तारा माणसे काजे मट्ली बीमारी सी मार नाख्यु, ने तु धरती पर सी मरीन सरी जातु। बाकुन मे तुसेक छाचलीन हेरेन करीन जीवतु राख्यु, की तुसेक मारी ताकत देखाड़ो, ने मार नाव सी आखी धरती पर बड़ाय हवे।3 काय तु हंय बी मारा माणसे अगळ आपसा काजे मटु समजे, ने तीनुक जाणे नी देतु? सामळ, वाहणे मे हीनीत टेमे असा मट्ला गारे पाड़ीस, जसो मीस्री देस वस्यो तीने दाहड़े सी आज तक नी पड़्या। हेरेसी हंय माणसे काजे मकलीन आपसा जानवर्या काजे ने चवगान मां जो काय तारो छे, आखा काजे मामार डुकाड़ी ले; नी ते जत्रा माणसे नीते जानवर्या चवगान मां रवे, ने घर मां भेळा नी करे, तींद्रे पर गारे पड़से, ने चे मर जासे।” अळतेन फीरोन राजान पावर्या माय्न जे माणसे यहोवान बुल काजे बीहता जाय्न मानतेला, चे आपसा-आपसा पावर्या, ने जानवर्या काजे आसरु लेणे करीन घर मां ढासाड़ देदा। बाकुन जे यहोवान बुल पर मन नी लागाड़्या, चे आपसा पावर्या ने जानवर्या काजे खळा मां रहणे देदा।
तत्यार यहोवा मुसा काजे कह्यु, “तारु हात वादळा भीणी लांबु कर की, आखा मीस्र देसेन माणसे, जानवर्या, ने खेतेन आखी मेर पर गारे पड़े।” तत्यार मुसु आपसी लाकड़ी काजे वादळा भीणी उची कर्यु, ने यहोवान ताकत सी गाजणु ने गारे पड़ने बाजी गुया, ने ईजळी धरती पर पड़ी, ईने रीते यहोवा मीस्र देस पर गारे पाड़्यु। जी गारे पड़तेली तींद्रे साते ईजळी बी भेसकायली हतली, ने ची गरा अतरी भारी हतली की, जत्यार सी मीस्र देस वसलो हतलो, चां सी आज तक आखा मीस्र देस मां गारे कदी नी पड़ी।4 हेरेसी आखा मीस्र देस मां जतरा बी माणसे, ने जानवर्या बाहर हतला आखा गारे पड़्या ती मर ज्या, ने आखी फसल खत्तम हंय गुई, ने आखा खयड़ान झाड़का बी भागी गुया। गोसेन देस मां अतरात गारे नी पड़्या, जां ईस्रायली माणसे रवतेला।
तत्यार फीरोन राजु मुसा काजे ने हारुन काजे बुलावणे मकल्यु, “ने तीनुक कह्यु, हीनी कावा मे पाप करलु छे, बाकुन यहोवा सयं छे, मे ने मारा माणसे गुनाळा छे।” वादळान गाजणु ने गारे ने पाणी ते बेसकु पड़तेलु, हंय यहोवा भगवान धड़े वीन्ती करो, ती मे तुहुंक जाणे दीस ने तुहुंंक नी रुको।
मुसु तीनुक कह्यु, “सहर मां सी नीकळतेत मे यहोवा भीणी मारा हात लांबा करीस, ती वादळान गाजणु बंद हंय जाय, ने गारे अळी नी पड़े, हेरेसी तु जाण लेसु की धरती यहोवान छे। बाकुन मे जाणो की नीते तु ने नीते तारा पावर्या यहोवान बीहाणा काजे माने।”
सण ने जळ गंहुन मेर ते गारे सी खत्तम हंय गुई, काहाकी जळ गंहु पाक गुयला ने सण मां फुल आय गुयला। बाकुन काहना बी गंहु खत्तम नी हया, काहाकी चे अळतेन पाके।
मुसु फीरोन राजा धड़े सी सहरेन बाहर नीकळीन यहोवा भीणी हात लांबु कर्यु, तत्यार वादळान गाजणु, ने गारे पड़नु बंद हंय गुयो, ने पछेन धरती पर पाणी नी पड़्यु। बाकुन जो देखीन पाणी ने गारे ने वादळान गाजणु बंद हंय गुयो, ने फीरोन आपसा चाकर्या पुठे अळी आपसा मन काजे काठु करीन पाप कर्यु। ने फीरोन राजान मन एकहेट्यु हवतु गुयु। ने चु ईस्रायली माणसे काजे जाणे नी देदु, जसु की यहोवा मुसान साहरे कवाड़लु।
Source notes (4)
- Cross-reference उजेंता बुले 16:2
- Footnote मन
- Cross-reference रोमीयो 9:17
- Cross-reference उजेंता बुले 8:7; 16:21
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.