Bhilali Bible
नीरगमन 8
दुसरी गरा: डेडरान हमलु
तत्यार मालीक अळी मुसा काजे कह्यु, फीरोन राजा धड़े जाय्न कह्यु, यहोवा तार सी हेरे साय कह्वे; मारा माणसे काजे जाणी दे, तेरेसी चे मारी सेवा भक्ती करे। बाकुन कदी हीनुक जाणी नी देय ती सामळ, मे डेडराक मकलीन तेरा आखा देस काजे नुकसाण कराड़ने वाळु छे। ने नीळ नदी डेडरा सी भराय जासे, ने चे तारा घर मां, ने तारा आथेरना पर, ने तारा काम करन्यान घर मां, ने तारा माणसे मां, ने तारा चुल्हा मां, ने तरबाणा मां बी चहड़ी जासे; ने तारा डील पर, ने तारा माणसे पर, ने तारा काम करन्या, आखा पर डेडरा चहड़ी जासे।
अळतेन यहोवा मुसा काजे हुकुम आप्यु, “हारुन राजा काजे कय दे की, नदी, नेहेर ने दर्या पर, लाकड़ी लीन आपसान हात लांबु करीन डेडरा काजे मीस्र देस मां ली आवे।” तत्यार हारुन मीस्र देसेन आखे जागेन पाणी पर आप्सु हात लांबु कर्यु; ने डेडरा पुरा मीस्र देस मां जाय्न, तींद्रे पर छावाय ज्या।1 ने जादु-टुना करने वाळा माणसे बी आपसान जादु-टुना सी तसात कर्या, ने मीस्र देस पर डेडरा ली आया।
ती फीरोन राजु मुसा ने हारुन काजे बुलाय्न कह्यु, “यहोवा धड़े दुवा करु की, चु डेडरा काजे मारेन्चां सी, ने मारा माणसेन्चा सी छेटा करे, ने मे ईस्रायेली माणसे काजे जाणी दीस। जेरेसी चे यहोवा धड़े बादा चड़ावे।”
ती मुसा फीरोन राजा काजे कह्यु, “तु मेसेक हुकुम आप की हंय तार वाटे, ने तारा पावर्या, ने तारा माणसे वाटे दुवा करो की, यहोवा तारेन्चां सी, ने तारा घर मां सी डेडरा काजे छेटा करे, ने चे आखा नीळ नदी मात रवे।”
ने चु कह्यु, “वाहणे।” मुसु कह्यु, “जो तु कह्यु चत हवे, तेरेसी तुहुंंक जो मालम पड़ जाय की, हामरा भगवान काजे छुड़ीन दीसरु कुय नी हय। ने डेडरा तारेन्चां सी ने तारा घर मां सी ने पावर्यान्चा, ने तारा माणसेन्चां सी छेटा हंय जासे, ने नीळ नदी मां अतरात रवे।” तत्यार मुसु ने हारुन फीरोन राजान चां सी जाती रया; ने तत्यार मुसु डेडरान बारामां, यहोवा धड़े वीन्ती कर्यु, ने जे तत्यार फीरोन राजा काजे चां मकल्या। ने यहोवा मुसाक कह्यु, तेरेत अनसारे कर्यु; ने डेडरा, घर, आंगणा, खेत मां ने गांव मां मर गुया। ने माणसे एक्ठा करीन तींद्रा ढेर लागाड़ देदा, ने आखो देस बेसको गंदायणे बाजी गुयो। बाकुन फीरोन राजु देख्यु की हंय आराम जड़ ज्यु, ती यहोवा भगवान कह्यु, तीनीत अनसारे अळी आप्सु मन काठु कर लेदु, ने मुसु हारुनेन वात नी सामळ्यु।
तीसरी गरा: पीसळान टुळु
पछेन यहोवा मुसा सी कह्यु, हारुन काजे हुकुम आप, तु तारी लाकड़ी ईछीन धरतीन धुळा पर दे, तींद्रे सी आखा मीस्र देसेन धुळा पीसळा बण गुया। ने चे भगवान कह्यु तसात कर्या। हारुन आपसु डेंगु धरती पर धुळाम देदु, ती माणसेम बेसका पीसळा ने जुटा पड़ गुया ने पाळन्या जनवार्याम बेसका पीसळा, गुचड़ा ने बग्या पड़ गुया। हव, आखा मीस्र देसेम धुळान मीस्री बण गुया। ती जादुगर माणुस बी आपसी जादु-टुना सी मीचर्या लावणे करीन कुसीत कर्या, बाकुन तीनुक नी आपो, ने माणसे मां ने जानवर्या दुयु मां पीसळान तसात रया। ती जादुगर माणसे फीरोन काजे कह्यु, “ज ते भगवानेन हातेन काम छे।” तेबी भगवानेन कह्णेन अनसारे फीरोन राजान मन काठु हवतु गुयु, ने चु मुसान ने हारुन राजान वात नी मान्या।2
चोवथी गरा: ढास्यान टुळु
अळतेन यहोवा मुसा काजे कह्यु, “संदारे उठीन फीरोन राजा अगळ उबु हवजी, ने चु नीळ नदी भीणी आवसे, ने फीरोनेन वाट देखजी, ने चु चां आवसे तत्यार तु तीनाक ज कवजी, यहोवा तार सी ज कवे: मारा माणसे काजे जाणी दे की चे मारी भक्ती करे। कदी तु मारा माणसे काजे नी जाणी देय ती सामळ, मे तार पर, ने तारा पावर्या पर, ने तारा माणसे पर, ने तारा घर मां टुळान-टुळा ढास्या मकलीस, ने मीस्री माणसे पर घर, ने रवणेन जागु बी ढास्या सी भराय जासे। तीने दाहड़े मे गोसेन देस मां जां मारा माणसे रवे अलग करीस, ने तींद्रे मां ढास्यान टुळा नी रवे, तेरेसी तु जाण लेय की धरतीन ईचमां मेत यहोवा छे। ने मे मारा माणसे, ने तारा माणसे मां फरक ठेहरावीस। जी सहलाणी वाहणे हवसे।” ने यहोवा भगवान तसुत कर्यु, ने फीरोन राजान घर ने तीना पावर्यान घर मां, ने आखा मीस्र देस मां टुळान-टुळा भराय गुया, ने ढास्यान वजे सी तीना देस मां नुकसान हंय गुयो।
ती फीरोन राजु मुसा ने हारुन काजे बुलाय्न कह्यु, “तुहुंं जाय्न तुंद्रा भगवान वाटे ईना देस मां बादा चड़ावु।”
मुसु कह्यु, “असु करनु वारु नी हय; काहाकी हामु हामरा यहोवा भगवान काजे ईनी चीजेन बादा चड़ावु; कदी हामु मीस्री माणसे काजे देखतात तींद्री बेकार चीजेन चड़ावु चड़ावजे ती काय तत्यार चे हामुक दगड़ाटे नी? हामु बयड़ा मां तीन दाहड़ान चाल-चालता जाय्न, हामरा भगवान यहोवा वाटे जसु चु हामुक कह्वे तसात बादा चहड़ावसुन।”
फीरोन राजु कह्यु, “मे तुहुंंक बयड़ा मां जाणे दम की, तुहुंं हामरा भगवान यहोवा वाटे बयड़ा मां लांबे घुण जावु, ने तुहुंं मार वाटे दुवा कर्या करु।”
जी वात सामळीन मुसु, फीरोन काजे असु कह्यु, “हय मे जा सी जाणे बाजी रयु, ने यहोवा भगवान धड़े तार वाटे असी दुवा करीस: ‘ए यहोवा भगवान, तु फीरोनेन्चां सी ने तेरा पावर्यान्चा सी ने तेरा असामीन्चा सी ढास्या छेटा कर दे; हेरेन करीन की, चु अळी पछु ठगीन तारा असामीक नी रुके’।”
ने मुसु फीरोन धड़े सी बाहर जाय्न, यहोवा धड़े वीन्ती कर्यु। ने यहोवा मुसान कह्णे अनसारे ढास्यान टुळा काजे ने फीरोन काजे तीना पावर्या, ने तीना माणसेन्चा सी छेटा कर्यु; ने एक बी डास्यु नी रयु। ती फीरोन राजु बी ईनी कावा आपसा मन काजे काठु कर लेदु, ने तीनु माणसे काजे जाणे नी देदु।
Source notes (2)
- Cross-reference भजन सहीता 78:45; 105:30
- Cross-reference लुका 11:20
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.