Bhilali Bible
नीरगमन 7
तत्यार यहोवा मुसा काजे कह्यु, देख मे तुसे काजे फीरोन वाटे भगवानेन तसु ठेरावो; ने तारु भाय हारुन तारु अघी सी आवणे वाळी वात बताड़न्यु बणसे। जु-जु हुकुम मे तुसेत काजे आपो, चत तु कवजी ने हारुन फीरोन राजा काजे कवसे, तेरेसी चु ईस्रायेली माणसे काजे आपणा देस मां सी नीकळीन जाणी दे। बाकुन मे फीरोन राजान मन काजे काठो कर दीस, ने आपसी बेसकी सहलाणी ने चकराड़े असा काम काजे मीस्र देस मां देखाड़ीस।1 तेबी फीरोन राजा तुंद्री वात नी सामळे; ने मे मीस्र देस पर मारु हात बड़ायन मीस्री माणसेन बारामां नीयाव करीन डंड आपीन सेना मतलब आपणा ईस्रायेली माणसे काजे मीस्र देस मां सी नीकाळ लाय्स। ने जत्यार मे मीस्री माणसे पर हात अगु करीन, ईस्रायेली माणसे काजे तींद्रे ईचमां सी नीकाळीस, तत्यार मीस्री माणसे जाण लेसे की मे यहोवा छे। तत्यार मुसु ने हारुन यहोवा भगवानेन हुकुमेन अनसारे कर्या। जत्यार मुसु ने हारुन फीरोन सी वात करने बाजी रवला, तत्यार मुसु अस्सी सालेन ने हारुन अस्सी ने तीन सालेन हतलु।
हारुनेन लाकड़ी
अळतेन यहोवा मुसा ने हारुन काजे हीनी रीते कह्यु, जत्यार फीरोन राजु तुहुं काजे कह्यु, आपणा सबुतेन कुई छेलभात्या काम देखाड़ु, तत्यार तु हारुन काजे कवजी, “तारी लाकड़ी लीन फीरोन राजा अगळ नाख दे की, तत्यार ची लाकड़ी घड़सु बण जाय।” तत्यार मुसु ने हारुन फीरोन धड़े जाय्न, यहोवान हुकुमेन अनसारे कर्या; ने जत्यार हारुन आपसी लाकड़ी फीरोन ने तेरा काम करन्या अगळ नाख देदु, तत्यार ची लाकड़ी घड़सु बण गुई। तत्यार फीरोन राजु रासी देखणे वाळा काजे, ने जादु-टुना करने वाळा काजे बुलायु; ने मीस्र देसेन जादु-टुना करने वाळा आवीन आपणा-आपणा मंत्र सी तसात कर्या। चे बी आपसा-आपसान लाकड़ी काजे नाख देदा, ने चे बी घड़सु बण गुई। ने हारुनेन लाकड़ी, तींद्री लाकड़्या काजे गीळ गुई। बाकुन फीरोनेन मन अळी नीस्वड़ो हंय गुयो, ने यहोवा बुलेन अनसारे चु मुसान ने हारुनेन वात काजे नी मान्या।
पेहली गरा: मीस्री माणसे पर दस गरा आवणेन बारामां
पाणीन लुही बणनु
तत्यार यहोवा मुसा काजे कह्यु, फीरोन राजान मन काठो हंय गुयो, ने चु हीनु माणसे काजे जाणे नी देय। तेरेमां जत्यार संदारेन टेमे फीरोन राजा धड़े जां, चु ते पाणी भीणी बाहार आवसे; ने जी लाकड़ी घड़सु बण गुयली, हीनीक हात मां लीन नीळ नदीन धड़े हीनाक भेळु हवणे करीन हुबु रवजी। ने तीनाक हेरे साय कवजी, ईब्री माणसेन यहोवा भगवान मेसेक असु कवणे वाटे तारे धड़े मकली रयु की, मारा माणसे काजे जाणी दे, तेरेसी चे बयड़ा मां मारी बड़ाय करसे; ने हंय लग तु मारी वात नी मान्यु। यहोवा भगवान असु कह्वे, तु जाण लेसी की मेत भगवान छे; देख, मे मारा हाते माय्न लाकड़ी काजे नीळ नदीन पाणी पर दीस, ने पाणी लुही बण जासे।2 ने जे माछा नीळ नदी मां छे, चे मरी जासे, ने नीळ नदीन पाणी गंदायणे बाजी जासे, ने नदीन पाणी पीणे वाटे मीस्री माणसेन जीव नी करे।
अळतेन यहोवा मुसा काजे कह्यु, हारुन काजे कवजी की आपणी लाकड़ी लीन मीस्र देस मां जतरो पाणी छे, मतलब हेरी नद्या, नेहेर, तळावे, डाबरा, आखान उपर आपणा हात बड़ाव की हींद्रो पाणी लुही बणी जाय, ने आखा मीस्र देस मां लाकड़ा ने दगड़ा दुयु भातीन पाणीन ठाहरा मां लुहीत-लुही हंय जासे।
तत्यार मुसु ने हारुन यहोवान हुकुमेन अनसारे कर्या, मतलब हयु लाकड़ी काजे हाकलीन फीरोन ने हेरा काम करन्या अगळ नीळ नदीन पाणी पर देदु, ने नदीन आखो पाणी लुही बण गुयो। ने नीळ नदी मां जे माछा हतला चे मर गुया; ने नदीम सी गंद आवणे बाजी गुई, ने मीस्री माणसे नदीन पाणी नी पी सके; ने आखा मीस्र देस मां लुही बण गुयो। तत्यार मीस्र देसेन जादु-टुना करन्या बी आपणा जंत्र-मंत्र सी असात कर्या; तेबी फीरोनेन मन नीस्वड़ो हंय गुयो, ने यहोवा भगवानेन कवणेन अनसारे हयु मुसान ने हारुनेन नी सामळ्यु। फीरोन राजु हेरे पर बी धीयान नी देदु, ने मुंहडो फेरवीन आपसे घर जाती रयु। ने आखा मीस्री माणसे पाणी पीणे वाटे नीळ नदीन आड़े-धड़े कुवु खुदणे बाजी गुया, काहाकी चे नदीन पाणी नी पी सकतेला।
जत्यार यहोवा भगवान नीळ नदी काजे देदलु, तत्यार सी सात दाहड़ा हंय गुयला।
Source notes (2)
- Cross-reference नेवताळान काम 7:36
- Cross-reference उजेंता बुले 16:4
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.