Bhilali Bible
नीरगमन 6
तत्यार यहोवा मुसा काजे कह्यु, हंय तु देखसी की मे फीरोन राजा सी काय करीस, तेरेसी चु हीनुक ताकत सी बाहर नीकाळसे, चु ते तेरा देस सी बाहर नीकाळ देसे।
भगवान मुसाक बुलावे
भगवान मुसा काजे कह्यु, “मेत यहोवा छे।1 मे ताकतवाळा भगवानेन नाव सी अब्राहमेन, ईसाक ने याकुब काजे संयबरकत आपतेलु, बाकुन यहोवा भगवानेन नाव सी मे हींद्रे पर उजेंतु नी हयु। ने मे हींद्रे साते आपणु वायदु काठु करलु छे, मतलब कनान देस, तेरेमां चे दीसरे देस वाळु हय्न रवतेला, हीनुक मे आप दम। ईस्रायेली तीनुक मीस्री माणसे गुलाम बणाय्न राखे, हींद्रो दुख बी सामळीन मे आपणा वायदा काजे हेर कर्यु। हेरे वजे सी तु ईस्रायेली माणसे काजे कव, मे यहोवा छे, ने तुहुंं काजे मीस्री माणसेन गुलामी मां सी बाहर छुड़ावीस, ने मे मारु हात बड़ावीन तीनुक बेसकु डंड आपीस, ने तुहुंंक छुड़ाय लीस, मे तुहुंं काजे मारा माणसे बणावणे वाटे खुळे ली लीस, ने मे तुंद्रु भगवान ठेरीस; ने तुहुंं जाण लेसु की मेत तुंद्रु भगवान छे, ने चु हामुक मीस्री माणसेन गुलामी मां सी छुड़ाय्न ली आयु, ने तीना देस काजे आपणेन सगुन मे अब्राहम, ईसाक ने याकुब अगळ खादलु, हेरेत मां मे तुहुंंक पुगाड़ीन हीनाक तुंद्रु जाहंगरीन भाग कर दीस, मे ते यहोवा छे।” मुसु जी वात ईस्रायेली माणसे काजे सामळायु, बाकुन चे उतवाळ्या जीवनेन साहरे गुलामी मां काठला कामेन वजेसी तेरी वात नी मान्या, ने चे घांगवाय गुया।
तत्यार यहोवा मुसा सी कह्यु, “तु जाय्न मीस्र देसेन राजा फीरोन सी कव की, ईस्रायेली माणसे काजे तारा देसेम सी बाहर नीकळीन जाणी दे।”
बाकुन मुसु यहोवा काजे कह्यु, “देख ईस्रायेली माणसे मारी वात नी सामळ्या, ती फीरोन राजु मारी बुबड़ा बुलन्यान कसु सामळसे?” तत्यार यहोवा मुसा ने हारुन काजे ईस्रायेली ने मीस्र देसेन राजा फीरोन राजा काजे कह्यु, की भगवान हामुक, ईस्रायेली माणसे काजे मीस्र देस सी बाहर नीकाळीन ली जाय।
मुसा ने हारुनेन घराणान खानदानी
हींद्रा डाहा-डाहान घराणान मुख्या अदमी जे छे: ईस्रायेलेन पेहलु पुर्यु रुबेन्यान पुर्यु हनोक, पल्लु, हेस्रोन ने करम्यु हतला; तेरेत मां सी रुबेनेन कुळी नीकळी। सीमोनेन पुर्यु यमुयेल, यामीन, ओहद, याकीन ने सोहर ने एक कनानी बायरीन पुर्यु सावुल हींद्रेत मां सी सीमोनेन कुळ नीकळी। लेवीन पुर्या तींद्रे सी हींद्री खानदानी चालती आय रय हींद्रो नाव ज्यो छे : मतलब गेरसोन, कहात, मरारी ने लेवीन आखी जीवाय एक सोव सयतीस सालेन हय।2 गेरसोनेन पुर्या तींद्रे सी हींद्री कुळी चाली: लीबनी ने सीमी हतला। कहातेन पुर्या अमराम, यीसहार, हेब्रोन, उज्जीएल ने कहातेन पुरी उमर एक सोव तीस ने तीन साल हवी।3 मरारीन पुर्या महली ने मुसी। लेव्यान कुळी तींद्रे सी हींद्री खानदानी चाली जीत छे।4
अमराम तेरी फुय योकेबेदी सी ईयाव कर्यु, ने हेरेसी हारुन ने मुसु पयदा हयु; ने अमरामेन आखु बुड़ापु एक सोव तीस ने सात सालेन हवी। यीसहारेन पुर्या: कोरह, नेपेग ने जीक्री। उज्जीएल्यान पुर्या: मीसायेल, ने एलसापन ने सीत्री।
हारुन ने अम्मीनादाबेन पुरे, ने नहसोनेन बहणीस सी एलीसीबा सी ईयाव कर्यु; ने हेरेसी नादाब, अबीहु, एलाजार ने ईतामार पयदा हया। कोरहन पुर्या: अस्सीर, एल्काना ने अबीआसाप ने हींद्रे मां सी कोरह्यान कुळी नीकळी। हारुनेन पुर्यु एलाजार ने पुतीयेलेन एक पुरे सी ईयाव कर्यु; ने हेरे सी पीनहास पयदा हयु। हींद्रे मां सी कुळी चाली। लेव्यान डाहा-डाहान घरणान मुख्या जेत छे।
हारुन ने मुसु जेत छे, तीनुक यहोवा भगवान जु हुकुम आप्यु: ईस्रायेली माणसे काजे टुळान-टुळा करीन हींद्रा टुळान अनसारे मीस्र देस सी बाहर नीकाळ लावु। जे चेत मुसु ने हारुन छे, जे मीस्र देसेन राजा फीरोन काजे कह्या की हामु ईस्रायेली माणसे काजे मीस्र देस मां सी बाहर नीकाळीन ली आवु।
मुसाक ने हारुन काजे यहोवान हुकुम
जत्यार यहोवा मीस्र देस मां सी मुसा काजे जी वात कह्यु, “मे यहोवा छे; हेरेसी जो काय मे मुसाक कयस, चो आखो मीस्र देसेन राजा फीरोन काजे कवजी।”
बाकुन मुसु यहोवा काजे जपाप आप्यु, “मे बुलने मां बुबड़ु छे, ने फीरोन राजु मारी वात कसी सामळसे?”
Source notes (4)
- Cross-reference उबजाणनी किताप 17:6; 28:3; 35:11; नीरगमन 3:13-15
- Cross-reference गिन्ती 33:17; उबजाणनी किताप 46:11
- Cross-reference गिन्ती 26:57; 1 ईतीहास 6:18
- Cross-reference गिन्ती 3:17-20; 26:57,58; 1 ईतीहास 6:16-19
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.