Bhilali Bible
नीरगमन 5
फीरोन राजा अगळ मुसु ने हारुन
अळतेन मुसु ने हारुन जाय्न, फीरोन राजा काजे कह्या, “ईस्रायेलेन यहोवा भगवान असु कह्वे की, ‘मारा माणसे काजे जाणी दे की, चे बयड़ा मां मार वाटे तीहवार मनावसे।’”
फीरोन राजु कह्यु, “यहोवा कुण छे की, मे हेरो बुल मानीन ईस्रायेली माणसे काजे जाणी दम? चु कह्वे मे यहोवा काजे नी जाणो, ने मे ईस्रायेली माणसे काजे नी जाणी दम।”
चे कह्या, “ईब्रानी भगवान हामरे सी मेळी र्यु; हेरेसी हामुक बयड़ा मां तीन दाहड़ान वाटे जाणे दे, हामरा यहोवा भगवान वाटे बादा चड़ावजे असो नी हंय जाय की, चु हामु काजे मारनेन बीमारी फेलावे नीते तलवार सी मारसे।”
मीस्र देसेन राजु हींनुक कह्यु, “ए मुसा ए हारुन तुहुंं, काहा माणसे सी काम छुड़ावणे हींडी रया? तुहुंं जावु आपणो-आपणो काम करु।” ने फीरोन राजु कह्यु, “सामळु ईना देस मां जे माणसे बेसका वद गुयला छे, अळतेन तुहुंं हीनु माणसेन काम बंद कराड़ीन आराम कराड़ने हींड रया काय!”
फीरोन राजु तीनेत दाहड़े हीनुक काम कराड़ने वाळा काजे जे हीनु माणसे उपर हतला, ने हींद्रा मुकड़दाम काजे जी हुकुम आप्यु, तुहुंं जे हंय लग ईटड़ा बणावणे वाटे माणसे काजे चारु आप्या करतेला, चे हंय आपणु बंद कर देजु; चे आपसात जाय्न हींद्रे वाटे चारु भेळा कर्या करसे। तेबी जतरा ईटड़ा हंय लग हीनुक बणावणु पड़तेलो, ततरात ईटड़ा हीनु काजे अळी बी बणावणु पड़से, ईटाड़ान गीणती करनु कम मां करजु, काहाकी चे उजेगला छे, हेरे वजे सी असा कयन आयड़े, हामु जाय्न आपणा भगवान वाटे बादा चड़ावसुन। हीनु माणसे काजे अळी बी काठी मेहनत कराड़ु की, चे मेहनत करता रवे, ने झुठी वात पर मन मां लागाड़ु।
तत्यार माणसे काजे काम कराड़न्या, ने मुकड़दाम बाहर जाय्न हींद्रे सी कह्या, “फीरोन हीने रीते कह्वे मे तुहुंंक चारु नी आपो। तुहुंंत जाय्न जां बी चारु जड़े चां सी पराळ्या काजे भेळा करीन ली आवु, बाकुन तुंद्रो काम काय बी कम नी हवणु चाहजे।” हेरेसी चे माणसे आखा मीस्र देस मां रावण्या-तीवण्या हंय गुया, ने चारु भेळो करने करीन आखा देस मां पुग गुया। काम कराड़ने वाळा असा कय-कयन तींद्रे सी छाटा-छाटा कराड़ता रवे, की हीनी रीते तुहुंं चारु हेरलीन कर्या करतेला, हेरे साय आपणो दाहड़ीन काम हंय बी पुरो कर्या करु। ने ईस्रायेली माणसे मां सी तीनु मुकड़दाम काजे फीरोनेन काम कराड़नेवाळा, हींद्रा हकवाळा ठेरावला, ने चे मार खादा, ने हींनुक पुछ्या, काय वजे छे की तुहुंं आपणा ठेरावला ईटाड़ान गीणतीन अनसारे पेहलेन तसा काल ने आज पुरो नी कराड़्या?
तत्यार ईस्रायलेन मुकड़दाम फीरोन सी वीन्ती करीन ज कह्या की, “तु तारा पावर्या साते असु वेवहार काहा करे?” तारा पावर्या काजे चारु ते आपतात नी, ने हामु काजे कवता रवे, ईटड़ा बणावु, ईटड़ा बणावु, ने तारा पावर्या बी मार खादला छे, बाकुन गुनु तारात माणसेन करला छे।
फीरोन राजु कह्यु, तुहुंं उजेगला छे, उजेगला हेरे वजे सी कह्वु की हामुंक यहोवा भगवान वाटे बादा चड़ावणे जाणी दे। हय जाय्न आपणो काम करु, ने चारु तुहुंं काजे नी आप सकजे, बाकुन ईटड़ान गिन्ती पुरी करनु पड़से। जत्यार ईस्रायेली माणसेन मुकड़दाम जी वात सामळ्या, की हींद्री ईटड़ान गिन्ती कम नी हवे, ने दाहड़ीन अतरोत काम पुरो करनु पड़से तत्यार चे जाणी गुया की, हींद्रा गरान दाहड़ा आय गुयला छे।
जत्यार चे फीरोन राजा अगळ सी बाहर नीकळी आया, तत्यार मुसु ने हारुन जे हींद्रे सी मेळने करीन हुबा हंय रवला, ती हीनुक भेळा हंया। ने चे मुसाक ने हारुन काजे कह्या, “भगवान तुहुंंक देखीन नीयाव करे काहाकी तुहुंं हामु काजे फीरोन राजु ने हेरा काम कराड़न्यान नींगा मां गलत ठेरायन हामुंक मारने वाटे हींद्रा हात मां तलवार आप देदा।”
यहोवा भगवान अगळ मुसु चुगली करे
तत्यार मुसु यहोवा भगवान धड़े जाय्न कह्यु, “ए मालीक तु हीनु माणसे साते असी बुराय काहा करे? ने तु मेसेक जां काहा मकल्यु?” जत्यार ती मे तार नाव सी फीरोन राजा धड़े वात करने वाटे गुयु, तत्यार सी राजु हीनु माणसे साते गलतुत वेवहार करलु, ने तु आपणा माणसेन काय बी छुटकारु नी कर्यु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.