Bhilali Bible
नीरगमन 4
भगवान मुसाक वारु सक्ती आपे
तत्यार मुसु भगवाने काजे जपाप आप्यु, चे मारी वात पर भुरसु नी करे, ने मारी सामळे बी नी, ने सांबा कवसे, भगवान तुसेक सपना मां नी देखाव पड़्यु।
तत्यार यहोवा तीनाक कह्यु, तार हात मां जो काय छे?
चु कह्यु, “लाकड़ी।”
यहोवा कह्यु, “लाकड़ी काजे धरती पर नाख दे।” जत्यार मुसु लाकड़ी काजे धरती पर नाख्यु, तत्यार ची घड़सु बण गुई, ने मुसु चां सी ढास पड़्यु। तत्यार भगवान मुसा काजे कह्यु, “हात अगु करीन हेरो छेमटी धरी ले, काहाकी चे माणसे भुरसु करसे की तुंद्रा डाहा-डाहान भगवान मतलब अब्राहमेन भगवान ईसाकेन भगवान ने याकुबेयान भगवान, यहोवा तुसेक संयबरकत आप्यु।” जत्यार भगवान मुसाक असु कह्यु तारु हात अगु करीन घड़साक धर, तत्यार चु घड़सु तेरा हात मां अळी पछी लाकड़ी बणी गुई।
अळतेन यहोवा मुसा काजे असु बी कह्यु, तारु हात छाती पर मेकीन ढाकले। अळतेन मुसु तेरु हात छाती पर मेकीन ढाक लेदु, अळतेन जत्यार हात काजे नीकाळ्यु तत्यार देख्यु की, हेरु हात कुड़ायला माणसेन तसो धवळो फक हंय गुयो। तत्यार यहोवा भगवान कह्यु, तारु हात छाती पर फीर सी मेकीन ढाक ले। चु तेरु हात छाती पर मेकीन ढाक लेदु, जत्यार चु आपसा हात काजे छाती पर सी नीकाळीन देख्यु, ती काय तेरु हात फीर सी वारु डीलेन तसु हंय गुयु। तत्यार यहोवा कह्यु, “कदी चे तारी वात पर भुरसु नी करे ने पेहली सहलाणी काजे नी माने, ती दीसरी सहलाणीन भुरसु करसे। ने कदी चे ईनु दुयु सहलाणीन भुरसु नी करे, ने तारी वात काजे नी माने, तत्यार तु नीळ नदी मां सी थुड़ोक पाणी लीन सुकली धरती पर नाखजी, ने ज्य पाणी तु नदीम सी नीकाळसी ती चो सुकली धरती पर खुन बण जासे।”
मुसु यहोवा काजे कह्यु, “ए मारा मालीक मेसेक वारु बुलता बी नी आवड़े, ने नी मे पेहेलुत हतलु, ने नी जत्यार सी तु तारा पावर्या सी वात करने बाजी गुयु, मे ते मारा मुंहडा सी बुलने मां बुबड़ायो।”
यहोवा तीनाक कह्यु, “माणसेन मुंहडा काजे कुण बणावलो छे? ने माणुस काजे गुंगु, नीते बेहरु, नीते देखणेवाळु, नीते आंदळु मेसेक यहोवा काजे छुड़ीन कुण बणावे? हंय जां मे तारे साते हय्न मदत करीस, ने ज्य तुसेक कहणु हसे, चो तुसेक सीकाड़तु जायस।”
बाकुन मुसु कह्यु, “ए मारा मालीक, वीन्ती करीन कह्वो, काहनाक दीसरा काजे मारी जागा पर मकली दे।” तत्यार यहोवा मुसा पर रीसवाय गुयु, ने चु कह्यु, “काय तारु भाय लेवी हारुन नी हय? मेसेक मालुम छे की, चु बुलने मां वारु छे, ने चु तुसेत काजे मीळने वाटे नीकळीन आवणे बाजी रयु, ने तुसेत काजे देखीन मन मां खुस हंय जासे। हेरेसी तु हीनाक जी वात सीकाड़ देजी, ने मे हेरे बुलने मां मदत करीस, ने तु बुलसी चां बी मदत करीस, जो काय बी तुहुंं करसु, चो मे तुहुंं काजे सीकाड़तु जायस। चु तार भीणी सी माणसे सी वात कर्या करसे; ने चु तार वाटे मुंहडो बणसे, ने तु हेरे वाटे भगवान ठेरसी। ने तु हीना डेंगाक लेतु जां, ने हेरे साहरे वारु कामेन सहलाण्या देखाड़जी।”
मुसु मीस्र देस मां पछु आवे
तत्यार मुसु तेरा सेसरास यीतर्या भीणी गुयु, ने चे कह्यु, “मेसे पछु जाणी दे की, मे मीस्र देस मां रवणेवाळा आपणा भाय-बेटान्चां, ने उळखायता हंय तक जीवतेला हंय की नी हय, चो देखणे करीन मेसेक मीस्र देस मां मकली दे।” यीत्रो मुसाक कह्यु, “खुसी सी जा।”
ने यहोवा मीद्यान देस मां मुसा काजे कह्यु, “मीस्र देस मां पछु जां, काहाकी जे माणसे तुसेक मारने हींडतेला, चे आखा मर गुया।”1 तत्यार मुसु तेरी बायरी ने पुर्या-पारी काजे गदड़ा पर उपर बठाड़ीन, मीस्र देस भीणी भगवानेन लाकड़ी काजे हात मां लीन चाल पड़्यु।
तत्यार यहोवा मुसा काजे कह्यु, जत्यार तु मीस्र देस मां पुगी जाय, तत्यार हेर राखजी की, जे मटा-मटा काम मे तारा हक मां करलु छे, हीनु आखा काम काजे फीरोन राजा काजे देखाड़जी, बाकुन मे हेरा मन काजे काठो कर दीस, ने चु मारा माणसे काजे जाणी नी देय। ने तु फीरोन राजा काजे कवजी की यहोवा असु कह्वे, की ईस्रायेल मारु आखा कथु मट्लु पुर्यु छे, ने मे जो तुसेक कय देदलु, की मारा पुर्या काजे जाणी दे, ने चे मारी सेवा-चाकरी करे, ने तु हंय तक हीनाक जाणी नी देदु, हेरे वजे सी मे हंय तारा पुर्या मतलब तारा पेहला पुर्या काजे बी मार नाखीस।2
तत्यार असो हयो की वाटे पर आवणे-जाणे वाळा धरमसाळा मां यहोवा मुसा काजे मेळीन मार नाखणे हींडतेलु। तत्यार सीप्पोरा एक धारवाळु दगड़ु लीन, तेरा पुर्यान फतरी काट नाखी, ने मुसान पाय पर असी कयन उराट देदी, “छाचलीन तु मार वाटे लुहीवाळु मारु अदमी छे।” तत्यार यहोवा मुसाक छुड़ देदु। हीनी टेमे फतरी काटणेन वजे सी ची असी कय, “की तु लुही वाळु अदमी छे।”
तत्यार यहोवा हारुन काजे कह्यु, “मुसा सी मेळ करने करीन जंगल मां जां।” चु गुयु ने भगवानेन चुखला बयड़ा पर मुसाक भेळु हयु, ने आपसे मुंहडे गुळु देदु। तत्यार मुसु हारुन काजे असु बताड़्यु, की यहोवा आखी वात कयन हीनाक मकली रयु, ने काहनी-काहनी सहलाणी देखाड़नेन हुकुम आपलु छे। तत्यार मुसु ने हारुन जाय्न, ईस्रायेली माणसेन आखा डाहा-डाहा काजे भेळा कर्या। ने जतरी वात यहोवा मुसा काजे कह्लु, ची आखी वात हारुन तीनुक सामळाय देदु, ने माणसे अगळ मटी-मटी सहलाणी बी देखाड़्या। ने आखा माणसे भुरसु कर्या, ने जो सामळ्या की यहोवा ईस्रायेली माणसेन खबर लेदु, ने हेर कर्यु, ने हींद्रा दुख तकलीफ काजे देख्यु, ती चे ढंगा वळीन भगवान काजे आंद्या, ने बड़ाय कर्या।
Source notes (2)
- Cross-reference नेवताळान काम 7:34; मत्ती 2:20
- Cross-reference नीरगमन 12:29
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.