नीरगमन 3

भगवान आपसा माणसे वाटे मुसा काजे बुलावे

1एक दाहड़ु मुसु आपसा सेसरास यीतर्‌यान गाडरा-बुकड़ा चारने बाजी रवलु; जु यीत्‌रो, मीद्‌यान देस मां पुजारु हतलु, मुसु गाडरा-बुकड़ा चारतु-चारतु उजाड़्‌या बयड़ान बुडवणु भगवानेन होरेब नावेन बयड़े पुग गुयु। 2ती भगवानेन सरगेवाळु चाकर्‌यु तीनाक काटाळ्‌ळा झाड़कान ईचमां आक्‌ठान लवळान तसु देखाव पड़्‌यु; मुसु धीयान लागाड़ीन देख्‌यु, ती तीनाक असो देखाव पड़्‌यो की, झाड़को धपी ते रयो, बाकुन धपीन रुखड़ु नी बणतो। 3तत्‌यार मुसु असु कह्‌यु, “हयो झाड़को धपीन रुखड़ु काहा नी बणतो, मे हयां जाय्‌न ईना मट्‌ला कामेक देखीन जाणो ते खरु।”

4जत्‌यार यहोवा मुसाक झाड़को देखणे आवतेलु देख्‌यु ती भगवान झाड़काम सी आयड़ीन मुसाक असु कह्‌यु, “ए मुसा! ए मुसा!”

मुसु कह्‌यु, “ए मालीक, काय कवे?”

5भगवान असु कह्‌यु, हींकुर धड़े मां आवे, ने तारा पायेन चाट्‌या नीकाळ दे, काहाकी तीनी जागा पर तु हुबु हंय र्‌यु, ची जागा चुखली छे। 6भगवान अळी असु कह्‌यु, “मे तुंद्‌रा आड़ा-बुड़ान मतलब अब्‌राहमेन, ईसाकेन ने याकुब्‌यान भगवान छे।” मुसु ते, भगवान भीणी भाळने बीहतेलु, तेरेमां आपसो मुंहडो ढाक लेदु।

7तत्‌यार भगवान मुसा सी कह्‌यु, “मारा माणसे मीस्‌र देसेम रय रया, मे छाचलीन तीनुक वेला करतेला देख रयु; ने काठो काम कराड़न्‌यान साहरे तींद्‌रो कासणु ने दुवा बी सामळी रयु, मे तींद्‌रा दुख काजे वारुत जाणो। 8हेरेसी मे तीनुक मीस्‌र देस वाळा माणसेन हातेम सी छुड़वणे वाटे, ने मीस्‌र देसेम सी नीकाळीन एक वारलु ने मट्‌ला देसेम ली जाणे करीन सरगे सी उतरीन आय रवलु छे। तीना मट्‌ला देसेम ते उह्‌वे असो बेसको दुद ने भवार छे, हंय चां कनानी, हीत्‌ती, एमोरी, परीज्‌जी, हीव्‌वी, ने यबुसी माणसे वस रया। 9छाचलीन मे ईस्‌रायेली माणसेन आयड़नु सामळाय रयो, ने मीस्‌र देसेन माणसे तीनुक वेला पाड़ रया, चो बी देख रयु। 10हेरेसी आव, मे तुसेक फीरोन राजा धड़े मकलो की, तु मारा ईस्‌रायेली माणसे काजे मीस्‌र देस मां सी बाहर नीकाळ लाव।”

11बाकुन जो सामळीन मुसु, भगवान काजे असु कह्‌यु, “मे कुण छे, ने फीरोन राजान्‌चां जाय्‌न, ईस्‌रायेली माणसेक मीस्‌र देसेम सी नीकाळ लावो?”

12भगवान कह्‌यु, “मे छाचलीन तार पुठे रय्‌स ने तुसेक मकलने वाळु बी मे छे, तेरु पुरावु जु रवसे की, तु तीनुक मीस्‌र देसेम सी नीकाळ लावसी, ने तुहुं ईना बयड़ा पर मारी बड़ाय करसु।”

13भगवानेन वात सामळीन, मुसु भगवानेक असु कह्‌यु, “जत्‌यार मे ईस्‌रायेली माणसेन्‌चां जाय्‌न तीनु काजे कय्‌स, ‘तुंद्‌रा डाहा-डाहान भगवान मेसेक तुंद्‌रेन्‌चां मकेल्‌लु छे।’ ती चे मेसेक पुछसे की, ‘तेरो नाव काय छे?’ ती मे तीनुक काय जपाप आपीस?”1

14भगवान मुसा काजे कह्‌यु, “मे जु छे हयुत छे।” अळतेन चु कह्‌यु तु ईस्‌रायेली माणसे काजे असु कवजी तेरो नाव छे, मे छे हयुत मेसेक तुंद्‌रे धड़े मकली रयु। 15अळी भगवान, मुसाक असु बी कह्‌यु, “तु ईस्‌रायेली माणसे काजे असु कवजी, ‘तुंद्‌रा डाहा-डाहान भगवान मतलब अब्‌राहमेन, ईसाकेन ने याकुबेन भगवानुत मेसेक तुंद्‌रेन्‌चा मकेल्‌लु छे। मारो जलमको नाव जोत रवसे, ने पीड़ी-डीट मारी हेर हीनीत रीती सी हया करसे।’” 16तेरेमां हंय जाय्‌न ईस्‌रायली डाहला काजे भेळा कर, ने तीनुक कव, तुंद्‌रा डाहा-डाहा अब्‌राहम, ने ईसाक, ने याकुब भगवान मेसेक सपना मां देखाव पड़ीन कवलु, मारी नींगा तुंद्‌रे पर छे, मीस्‌र देस मां जो तुंद्‌रे साते हवे, तेरे पर बी मे धीयान लागाड़लु छे; 17ने मे ठाण लेदु की, तुहुंक वेला पाड़न्‌या मीस्‌री माणसेन हातेम सी छुड़वीन कनानी, हीत्‌ती, एमोरी, परीज्‌जी, हीव्‌वी ने यबुसी माणसेन देसेम पुगाड़ीस। तीना देसेम उह्‌वे असो दुद ने भवार छे।

18तत्‌यार चे तारी मानसे ने तु ईस्‌रायेली माणसेन डाहा-डाहा काजे साते लीन मीस्‌र देसेन राजा धड़े जाय्‌न, तेरेसी असा कवजु ईब्‌रानी माणसेन मालीक भगवान सी हामरी आखा जणान भेट हवली छे; हेरेसी हंय हामुक तीन दाहड़ान चाल पर बयड़ा मां जाणी दे की, हामरा मालीक भगवान काजे जनवार्‌या मारीन बादा चड़ावजे। 19मेसेक मालुम छे की, मीस्‌र देसेन राजु तुहुंक नी जाणी देय, जत्‌यार लग मे हेरे भीणी जुर नी करो, तत्‌यार लग हयु नी जाणी देय। 20तेरेमां मे अगु हात करीन भाती-भातीन आपसा कामेन साहरे मीस्‌र देस वाळा माणसेक वेला पाड़ीस, ने पछेन चु तुहुं काजे जाणी देसे।

21“तत्‌यार मे मीस्‌र देस वाळा माणसे काजे तुंद्‌रे पर गीण-दया कराड़ीस; ने जत्‌यार तुहुं नीकळीन आवसु, तत्‌यार ठारलात नी आवु।2 22बाकुन तुंद्‌रा एकेक बायरा आपसा साते वाळा मीस्‌र देस वाळा बायरा धड़े, ने आपसा घरेम रवण्‌या धड़े सोना-चांदीन वजन ने पुथल्‌या मांग लेसे, ने तुहुं चे पुथल्‌या तुंद्‌रा पुर्‌या-पारी काजे पेहरावजु; हीनी रीते तुहुं मीस्‌र देस वाळा माणसे काजे लुट लेसु।”