Bhilali Bible
नीरगमन 2
मुसान पयदा हवणेन बारामां
लेवी घराणान एक अदमी, लेवी कुळीम सी एक बायरी काजे बणाय लेदु। ची बायरी भारीस हय, ने तेरु एक पुर्यु पयदा हयु, ने ची बायरी तीना पुर्या काजे देखी की, ज्यु पुर्यो ते बेसकु वारु छे करीन, तीना पुर्या काजे तीन मोहना लग डुकाड़ीन राखी।1 जत्यार ची, तीना पुर्याक बेसका दाहड़ा लग नी साताड़ सकी; तत्यार ची बरान फाटान एक चारली बणाय; ने तीनी चारलीक लीपण्या धुळा ने डमर्ये सी लीप देदी। अळतेन तीना पुर्याक चारली मां मेल देदी। ने अळतेन ची चारली नीळ नदी धड़्ये डंगळान ईचमां मेक देदी। तीना पुर्यान बहणीस, तीना पुर्यान हालत देखणे करीन डुकाय्न छेटेस उबी हंय गुई।
फीरोन राजान पुरे उंघळने करीन नीळ नदी धड़े आवी। तेरी पावरनी पुरे नदी धड़्ये-धड़्ये फीरता रया। फीरोन राजान पुरे पाणी मां चारली देख पाड़ी। तत्यार चारली लावणे करीन ची आपसी एक पावरनी काजे मकली। फीरोन राजान पुरे चारली उघाड़ीन देखी ती तीनी चारली मां एक पुर्यो हवतो। चो रड़ने बाजी रवलो। तीनीक तीना पुर्या पर दया आय गुई। ती ची असी कवी, “जो पुर्यो ते काहनाक ईब्रानी माणसेन छे।”
तत्यार पुर्यान बहणीस फीरोन राजान पुरेन्चां आवीन असी कवी, “मे तार वाटे ईना पुर्याक पाळने-पुसणे करीन एक ईब्रानी बायरी काजे बुलाय लावो काय?”
फीरोन राजान पुरे तीनी पुरे काजे असी कय, “जा, ली आव।” ची पुरे गुई ने तीना पुर्यान माय काजे बुलाय लाय। फीरोन राजान पुरे तीना पुर्यान माय काजे असी कवी, “ईना पुर्याक ली जां, ने मार वाटे ईना पुर्याक पाळी-पुसीन मटो कर। मे ईना पुर्या वाटे तुसेक दाहड़की आपीस।” अळतेन ची पुर्याक ली जाती रय। ने तीनाक पाळने-पुसणे बाजी गुई। जत्यार चु पुर्यु थुड़ुक मटु हयु, तत्यार ची बायर पुर्या काजे फीरोन राजान पुरे धड़े लीन गुई, ने चु फीरोन राजान पुरेन पुर्यु ठेहर्यु, ने ची असी कय्न तेरो नाव मुसु पाड़ी, “मे ईना पुर्या काजे पाणीम सी नीकाळ्ळी।”
मुसु मीद्यान देस मां ढासीन जाय
जत्यार मुसु जुवान हयु, तत्यार एक दाहड़ु असो हयो: चु आपसा भाय-बेटान्चां गुयु। चु आपसा भाय-बेटा काजे बेसकु काठो काम करतेला देख्यु। तीनी टेमे मुसु जो देख्यु की, मीस्र देसेम रहण्यु एक माणुस, मुसान भाय-बेटा ईब्रानी माणसे माय्न एक जणा काजे ठुकणे बाजी रयु।2 तत्यार मुसु अथुन-अथु देख्यु की कुई नी हय, अळतेन तीना मीस्री माणसे काजे मार नाख्यु ने बालु रेतळा मां गाड़ देदु। अळतेन दीसरे दाहड़े बाहर जाय्न मुसु देख्यु की, दुय ईब्रानी माणसे आपसात लड़ायणे बाजी रवला, मुसु तीना गुनाळ्ळा काजे कह्यु, “तु तारा भायस काजे काहा ठुकणे बाजी रयु?”
तत्यार चु गुनाळु भाय कह्यु, “कुण तुसेक हामरु मुखी ने नीयाव करन्यु बणायु? जसु तु मीस्र देस वाळा काजे मार नाखलु, तसुत तु मेसेक बी मारने हंय रयु काय?” मुसु तेरी वात सामळीन बीह गुयु, ने असु वीच्यार्यु, “छाचलीन, ची वात ते आखाक पतु चाल गुयली।” जत्यार फीरोन राजु जी वात सामळी लेदु, तत्यार मुसा काजे मारने करीन युजना बणायु, तत्यार मुसु फीरोन राजा अगळ सी ढास पड़्यु, ने मुसु मीद्यान देसेम जाय्न रवणे बाजी गुयु, चां एक कुवा धड़े जाय्न बठी गुयु।3 मीद्यान देस मां एक पुजारु हतलु, तेरी सांत पुरे हतली; ची चां आवीन आपसा गाडरा-बुकड़ाक पाणी पावाणे करीन नांदला मां पाणी भरने बाजी गुई। तत्यार दीसरा थुड़ाक गुवाळ्या आवीन, तीनुक छेटा करने बाजी गुया। तत्यार मुसु आवीन मदत कर्यु, ने तीनु पुरेन गाडरा-बुकड़ा काजे पाणी पीवाड़्यु। जत्यार ची पुरे आपसा बास रुएल धड़े पछी गुई, तत्यार चु तीनुक पुछ्यु, “आज तुहुं अतरी छाटी कसी आय गुई?”
ची पुरे असी जपाप आपी, “एक मीस्री देस वाळु माणुस हामुक गुवाळ्या सी बचाड़्यु, ने कुवाम सी बेसको पाणी लाटी-लाटीन आपणा गाडरा-बुकड़ा काजे पीवाड़्यु।”
तत्यार रुएल आपसी पुरे काजे असु कह्यु, “चु माणुस कां छे? तुहुं तीनाक चांत रहणी दीन काहा आवती रय? तीनाक आपणे पुठे खाणो-खाणे करीन बुलाय लावु।”
ची पुरे मुसाक बुलाय लाय, ती चु मुसु तीना रुएल धड़े आय्न खुस हंय गुयु। अळतेन रुएल आपसी पुरे जीप्पोरीन ईयाव मुसा साते कर देदु। ची भारीस हय, ने आपसु एक पुर्यु हयु, तत्यार मुसु असु कह्यु, मे दीसरा देस मां सी परदेस वाळु छे, असु करीन तेरो नाव गेरसोम पाड़्यु।4
बेसका साल हंय गुया, ने अळतेन मीस्र देसेन राजु मर गुयु। ईस्रायेली माणसे काठो काम करी-करीन हारी पड़्या, ने बेसका दम लेणे बाजी गुया, ने चे कास्ता जाय्न, भगवान धड़े वीन्ती-दुवा करने बाजी गुया। ने तींद्री वीन्ती-दुवा भगवान तक पुग गुई। भगवान तींद्रो आयड़नु, ने रड़नु सामळीन आपणा वादा काजे चु अब्राहम ने ईसाक ने याकुब साते वायदु करलु, चु हेर कर्यु। ने भगवान ईस्रायेली माणसे काजे छुड़ावणेन वीच्यार कर्यु।
Source notes (4)
- Cross-reference नेवताळान काम 7:20; ईब्रानीयो 11:23
- Cross-reference ईब्रानीयो 11:24; नेवताळान काम 7:23-28
- Cross-reference नेवताळान काम 7:29; ईब्रानीयो 11:27
- Footnote गेरसोम मतलब: दीसरा देस वाळु
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.