नीरगमन 1

मीस्‌र देसेन माणसे ईस्‌राएली माणसेक वेला पाड़े

1ईस्‌रायेल मतलब याकुब, आपसा पुर्‌या भेळ मीस्‌र देसेम गुयलु। तीनु आखा पुर्‌या भेळ तींद्‌रो आपसो-आपसो घराणो बी हतलो। ईस्‌रायेली तीनु पुर्‌यान नाव जो छे: 2रुबेन, ने सीमोन, ने लेवी, ने यहुदा, 3ईस्‌साकार, ने जबुलुन्‌यु, ने बीन्‌यामीन, 4दान, ने नप्‌ताली, ने गाद ने आसेर्‌यु।1 5युसुफ ते पेहलुत मीस्‌र देस मां आत रवलु, याकुब्‌यान अवल्‌यात मां जे पयदा हवला चे आखा मेळीन सत्‌तर जणा हतला। 6अळतेन युसुफ ने तेरा आखा भाय्‌स ने तीनी पीड़ीन आखा माणसे मर गुया। 7बाकुन ईस्‌रायेली अवल्‌यातेन वेल वदणे बाजी गुय; ने चे गीणती मां बेसका हंय गुया; ने चे ताकतवाळा बण गुया। ने तींद्‌रु वेल मीस्‌र देसेम आखे छावाय गुयु2।

8बेसका साल वीत गुया ने मीस्‌र देस मां एक दीसरु नवलु राजु बण्‌यु, चु युसुफ्‌यान बारामां नी जाणतेलु।3 9ने चु नवलु राजु तेरा माणसे काजे असु कह्‌यु, “देखु ते खरा ईस्‌रायेली माणसे वेल वदीन गीणती मां बेसका वद गुया, ने आपणे सी वदु ताकत वाळा हंय गुया, ने चे हामरे वाटे खतरु बण गुया। 10हेरेसी चालु आपणु काळजी करीन असी युजना बणावजे की, जे वेल वदीन गीणती मां अळी नी वदे। नीते कांखुर माय्‌न चे वदु हंय जासे, ने जत्‌यार लड़ाय-करनेन टेम आवसे, ती चे आपणा वेरी साते भेसकाय्‌न आपणे साते लड़ाय-करने बाजी जासे, ने आपणा कबजाम सी छुटीन ढासी जासे।”4 11तेरेमां मीस्‌र देसेन माणसे, ईस्‌रायेली माणसे काजे बेसको काम कराड़ीन वेला पाड़ने करीन मुकड़दाम ठेराय देदा। ने चे मुकड़दाम, ईस्‌रायेली माणसेक बेसका काम कराड़ीन वेला पाड़ने बाजी गुया। तीनी टेमे चे ईस्‌रायेली माणसे पीतोम ने रामसेस नावेन सहर बणाया। तीनु सहर मां फीरोन राजा वाटे दाणा ने बीडारु मेल तेला। 12बाकुन मुकड़दाम ईस्‌रायेली माणसेक जतरा वेला पाड़्‌या, तत्‌रा वदु हवता गुया, ने मीस्‌र देस मां छावायता गुया; तेरेमां मीस्‌र देसेन माणसे तीनुक देखीन बीहणे बाजी गुया। 13ते बी मीस्‌र देसेन माणसे, ईस्‌रायेली माणसे काजे अळी वदुस काठो काम कराड़्‌या। 14ने तींद्‌री जीवाय ने ईटड़ा बणावणेन गारु ने खेतीन, भाती-भातीन कामेन काठी सेवा सी जीवणे काठो कर देदा; जे बी काम मां चे तीनुक सेवा कराड़तेला तींद्‌रे मां चे काठु वेहवार करतेला।

15अळतेन मीस्‌र देसेन नवलु राजु ईब्‌रानी सफीरा दायण ने पुवा दायण काजे बुलायु ने तीनी दुयु जणीक असु हुकुम आप्‌यु, 16“जत्‌यार तुहुं ईब्‌रानी भारपाये बायराक पाखरायला दगड़ा पर फवरा कराड़ने ली जावु, तत्‌यार पुर्‌यु हवे, ती तीनाक मार नाखजु; ने पुरे हवे, ती जीवतेली रहणी देजु।” 17बाकुन ची दायण ते भगवानेक बीहतेली; अळतेन चे मीस्‌र देसेन राजान हुकुमेन नीकारु करीन पुर्‌या हवे तीनुक बी जीवतेलात रहणी देतली। 18चो जाणीन मीस्‌र देसेन नवलु राजु, तीनी दुयु दायण काजे बुलायु ने तीनी दुयुक जणीक असु पुछ्‌यु, “तुहुं पुर्‌या काजे जीवतेला काहा रहणी दी रया। तुहुं असो काहा करने बाजी रया?”

19ची दायण तीना फीरोन राजा काजे असु जपाप आपी,“ईब्‌रानी बायरा मीस्‌र देस वाळा बायरान तसा नी हय; चे ते बेसका ताकतवाळा छे, तेरेमां हामुक जाते-जातेत पुर्‌यो हंय गुयो।” 20तेरेमां भगवान तीनी दायण साते भलाय कर्‌यु, ने चे ईस्‌रायेली माणसे बड़ीन बेसका ताकत वाळा हंय गुया। 21तेरेमां ची दायण यहोवा भगवान काजे बीहतेली, ने भगवान हींद्‌रो भलो कर्‌यु; ने हींद्‌रो घर बार वाळ देदु। 22तत्‌यार फीरोन राजु आपसा आखा माणसे काजे असु हुकुम आप्‌यु, “ईब्‌री माणसेन जतरा बी पुर्‌या हवे, तीनुक नीळ नदी मां नाख देवु, ने पुरे काजे जीवतेला रहणी देवु।”