Bhilali Bible
नीरगमन 10
आंठवी गरा: टिड्डान हमलु
अळतेन यहोवा मुसा काजे कह्यु, “फीरोन राजा धड़े जा; काहाकी मेत तीनुक ने तीना पावर्यान मन काजे काठो कर देदलु छे, की मारी सहलाणी तींद्रे ईचमां देखाड़ो। ने तुहुंं आपणा पुर्याक ने पुर्यान-पुर्यान पुर्या सी तेरा गुणे गावु की यहोवा मीस्री माणसेन हासी उडाड़्यु, ने हेरी काय-काय सहलाणी तींद्रे ईचमां उजेंती कर्यु; तेरेमां तुहुंं जाण लेसु की मेत यहोवा छे।”
तत्यार मुसु ने हारुन ने फीरोन राजा धड़े जाय्न कह्या, “ईब्री माणसेन यहोवा भगवान तुसेक असु कह्वे; तु का तक मार अगळ नीचळु बणीन हक मां रवसी? मारा माणसे काजे जाणी दे की तारी सेवा-भक्ती करे। कदी तु मारा माणसे काजे नी जाणी देतु ती सामळ, वाहणे मे तारा देस मां टिड्डान टुळु लावीस, ने चे धरती काजे असो ढाक लेसे की, तीनुक देखाव तक नी पड़े; ने तुंद्रो जो काय गारे सी बची रयो, तीनुक चे खाय जासे, ने तुंद्रा जतरा झाड़का खेत मां उंगला छे, तीनुक बी चे खाय जासे, ने चे तारा ने तारा पावर्या जां तक की आखा मीस्री माणसेन घर मां भराय जासे अतरा टिड्डा तारा डाहा-डाहान ने तींद्रा डाहा-डाहा बी जत्यार सी चे धरती पर पयदा हया चां सी आज तक काहनु नी देख्या।” तत्यार मुसु फीरोन चां सी बाहर जाती र्यु।
तत्यार फीरोनेन पावर्या तीनुक कह्णे बाजी गुया, “हयु माणुस कां तक हामरे वाटे फंदु बणीन रवे? तीनु माणसेक जाणे दे की, चे आपसा भगवान यहोवान भक्ती करे। कांय तु हंय तक नी जाणतु की आखो मीस्र देस सरी ज्यो?”
तत्यार मुसु ने हारुन काजे फीरोन धड़े बुलावणे मकल्यु, ने चु तीनुक कह्यु, “जाती रवु, ने तुंद्रा यहोवा भगवानेन भक्ती करु; बाकुन जे जाणे वाळा हतला चे कुण-कुण छे?”
मुसु कह्यु, “हामु ते पुर्या-पारी गाडरा-बुकड़ा, गावड़ी-बेल भेळ ने पुर्या ती लागाड़ीन डाहला तक आखान-आखा जासुन, काहाकी हामुक यहोवा वाटे तीहवार वाळनु छे।”
ने फीरोन राजु तीनुक असु कह्यु, “कदी मे तुंद्रा पुर्या काजे ने तुहुंंक जाणे दम ती यहोवा तुंद्रे साते रह्वे; बाकुन देखु तुंद्रा मन मां बुराय रह्वे। नी असो नी हंय सके; तुहुंं अदमी-अदमी जाय्न यहोवा भगवानेन सेवा-भक्ती करु, ने तुहुं काजे जोत चाहजे।” ने तीनुक फीरोन मुसाक ने हारुन काजे आपसा बंगलाम सी नीकाळ देदु।
तत्यार यहोवा मुसा काजे कह्यु, “मीस्र देस पर तारु हात लांबु कर की मीस्र देस मां टिड्डा आय सके ने मीस्र देसेन जतरा दाणा ने झाड़का गारे सी बच गुयला छे, आखा काजे खाय जासे।” तत्यार मुसु आपसी लाकड़ी काजे मीस्र देस भीणी लांबी कर्यु, ती यहोवा आखु दाहड़ु, ने आखी रात उगेवणु सी वाहळो लायु; ने जत्यार ईजाळो हयो ती चु उगवणो सी वाहळो आयो तीना वाहळा मां टिड्डा आया। ने टिड्डा आवीन मीस्र देसेन आखी जागे बस गुया, ने तीनु टिड्डान टुळु अतरु मटु हतलु, की नीते हींद्रे सी पेहल जे टिड्डा आवला, ने नी तींद्रे पछळ आवे। चे टिड्डा आखी धरती पर छावाय गुया, ने आखा देस मां आंधारो हंय गुयो; ने चे टिड्डा आखा देसेन झाड़का ने फळ काजे खाय गुया, गार सी बच रह्ला, आखा मीस्र देस मां काय बी नीळ्ळो नी बचो, ने नी खेत मां फसल बची।1
तत्यार फीरोन राजु मुसा काजे ने हारुन काजे बुलाय्न कह्यु, “मे तुंद्रा भगवान यहोवा अगळ ने तुंद्रे अगळ बी पाप करलु छे।” हेरेसी हव ईनी कावा मारु पाप माफ करो, ने तुंद्रा यहोवा भगवान धड़े लीलघाया करो की, चु मार पर सी ईनी मोतेन आफत काजे छेटी करे। तत्यार मुसु फीरोन धड़े सी बाहर जाय्न, यहोवा सी दुवा कर्यु। तत्यार यहोवा बुडवणी भीणी सी बेसकी जादा वाहळी लावीन टिड्डा काजे उडाड़ीन रात्ला दर्या मां डुबाड़ देदु, ने मीस्र देसेन काहाना बी जागा मां एक बी टिड्डा नी बच्या। तेबी यहोवा फीरोनेन मन काठु कर देदु, ने पछेन चु ईस्रायेली माणसेक जाणे नी देदु।
नव्वी गरा: आंदारलो
अळतेन यहोवा मुसा काजे कह्यु, “तारु हात सरगे भीणी लांबु कर की, मीस्र देस पर आंदारलो छावाय रयो, जो आंदारलो बेसको रवसे की, तुहुंं हांडीम मुणको भरलो जाणीन हंय जाय तसो।” तत्यार मुसु आपसु हात सरगे भीणी लांबु कर्यु, ने आखा मीस्र देस मां तीन दाहड़ा लग बेसको आंदारलो छावाय रयो।2 तीन दाहड़ा तक कुय बी एक दीसरा काजे देख नी सक्या; बाकुन आखा ईस्रायेली माणसेन घर मां ईजाळो रयो।
ती फीरोन मुसा काजे बुलायन कह्यु, “तुहुंं जावु, यहोवान सेवा करु: तुंद्रा पुर्या काजे बी साते लीन जावु, बाकुन तुंद्रा गाडरा-बुकड़ा ने गावड़ी-बेल काजे रह्णे देवु।”
मुसु कह्यु, “तुसेक हामरी बादा ने होम बादा वाटे जानवर्या बी आपणु पड़से, तीनुक हामु हामरा भगवान यहोवा वाटे चड़ावला छे।” हेरेसी आपणा जानवर्या बी हामरे पुठे जासे, तींद्रो एक खुर्यो तक नी रह्णु चाहजे, काहाकी तींद्रेत मां सी हामु काजे यहोवा भगवानेन सेवा करनेन चीज लावणु पड़से, ने हामु जां तक हया नी जाजे चां तक नी जाणजे की काय-काय लीन यहोवान सेवा करनु पड़से।
बाकुन यहोवा फीरोनेन मन काठो कर देदु, हेरेसी चु तीनुक जाणे नी देदु। तत्यार फीरोन मुसा काजे कह्यु, “मार अगळ सी जाती रव; ने चेतीन रवजी; मेसेक तारो मुंहडो अळी घुण देखाड़जी; काहाकी जीने दाहड़े तु मेसेक मुंहडो देखाड़सी तीनेत दाहड़े मार नाखीस।”
मुसु कह्यु, “तु वारु कह्यु; मे तारो मुंहडो लग नी देखो।”
Source notes (2)
- Cross-reference उजेंता बुले 9:2,3
- Cross-reference भजन सहीता 105:28; उजेंता बुले 16:10
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.