नीरगमन 25

चुखली जागा वाटे भेट

(नीरगमन 35:4-9)

1यहोवा मुसा काजे कह्‌यु, 2ईस्‌रायेली माणसे काजे जो कह्‌जु की, मारे वाटे भेट लावु; जतरा आपणी मरजी सी आपणे हींडे तींद्‌रे धड़े भेट लेजु। 3ने तीनी चीजेन भेट लेणु हय, ची जी छे; मतलब सोनो, चांदी, ने पीतळ, 4नीळ्‌ळा, जामण्‌या, ने रात्‌ला रंगेन पुथल्‌या, पातेळा दुरा सी बन्‌ला पुथल्‌या, ने बुकड़ान कान्‌या, 5रातला रंग सी रंगला गाडरान खालड़ा, सुईसो नावेन मट्‌ली माछीन खालड़ा ने बाबळ्‌यान लाकड़ा, 6दीवा वाटे तेल, अभीसेकेन तेल वाटे, ने गंदायणी धुप वाटे गंधायण्‌यु मसालु, 7एपोद ने छात्‌ये वाळी झीलम मां बसाड़ने वाटे सुलेमानी नावेन मोहंगलु दगड़ु ने दीसरा वारु दगड़ा। 8ने चे मार वाटे एक चुखलु तम्‌बु बणाय मांगजी की मे तींद्‌रे ईचमां रह्‌वो। 9चुखलु तम्‌बु बणावणे करीन, जो समान मे देखाड़ो, चत समान लीन बणाय मांगजी। ने मे कहं तीनेत अनसारे बणाय मांगजी।

वायदान पेटी

(नीरगमन 37:7-9)

10बाबळ्‌यान लाकड़ान एक पेटी बणावु; ची ढाय हात लांबी, ने चवड़ाय ने उचाय डेड़-डेड़ हात लांबी रवे। 11ने तीनाक चुखला सोना सी माहे ने बाहर पालीस कराड़जी, ने पेटीन चारे-मेर सोनान कुर बणावजी। 12ने सोनान च्‌यार कड़ा बणावीन तीना च्‌यारु पाया पर, एक भीणी दुय कड़ा, ने दीसरी भीणी दुय कड़ा लागाड़जी। 13अळतेन बाबळ्‌यान लाकड़ान डेंगा बणावजी, ने तीना डेंगाक बी सोना सी पालीस कराड़जी। 14ने डेंगा काजे पेटी मां दुय भीणी कड़ा मां नाखजी, तेरेसी तेरे साहरे पेटी हाकेलजु। 15तीनु डेंगाक पेटीन कड़ा मात रह्‌णे देजु; ने तेरे मां सी अलग घुण करु। 16ने जी गवान चिट्‌ठी मे तुहुंंक आपीस तीनी चिट्‌ठीक पेटीत मां मेकजु।

17अळी चुखला सोना सी एक पसतावान ढाकणो बणावजी; चो ढाय हात लांबो ने डेड़ हात चवड़ो रह्‌णे देजी।1 18ने सोनो नाखीन दुय करुब नावेन सरगदुत बणावीन पसतावान ढाकणान दुय मुंहडे लागाड़जी। 19एक करुब एक खुणा पर, ने दुसरु दीसरा खुणा पर लागाड़जी: ने करुब ने पसतावान ढाकणा काजे एकुत टुकड़ा सी बणाय्‌न, तेरे दुयु खुणा पर लागाड़जी। 20तीना करुबेन पाखड़ा उपर सी असा फेलावला बणे की पसतावान ढाकणो तींद्‌रेम सी ढाकाय्‌न रह्‌वे, ने तींद्‌रा मुंहडा आंबा-सांबा, ने पसतावान ढाकणा भीणी रह्‌वे। 21ने पसतावान ढाकणा काजे पेटी उपर लागाड़जु, ने जी गवान चिट्‌ठी मे तुहुंंक आपीस, तीनुक पेटी मां मेक्‌जु। 22मे चां तुहुंंक भेट्‌या करीस; ने ईस्‌रायेली माणसे वाटे जतरा हुकुम तुहुंंक आपणे रह्‌वे, तींद्‌रा आखान बारामां पसतावान ढाकणा उपर रय्‌न, ने तीना करुब नावेन सरग दुतेन ईचमां सी, जी गवान चिट्‌ठीन पेटी पर रह्‌वे, तार साते वात कर्‌या करसी।

चुखली टेबल

(नीरगमन 37:10-16)

23अळतेन बाबळ्‌यान लाकड़ान एक टेबल बणावजी; ची लांबी दुय हात, ने चोवड़ाय एक हात, ने उचाय डेड़ हातेन रह्‌वे। 24तीनीक चुखला सोना सी पालीस कराड़जी, ने तेरे आड़े-धड़े सोनान एक कुर बणावजी। 25ने तेरे आड़े-धड़े च्‌यार आंगळी अतरी चवड़ी पटड़ी बणावजी, ने तीनी पटड़ीन चारे-मेर सोनान एक कुर बणावजी। 26ने सोनान च्‌यार कड़ा बणावीन, टेबलेन तीना खुणा मां लागाड़जी जी तीना च्‌यारु पाया मां रह्‌वे। 27चे कड़ा पटड़ी धड़ेत रह्‌वे, ने डेंगान घरेन काम देय की, टेबल तेरेत साहरे हाकले। 28तु बाबळ्‌यान लाकड़ीन डेंगा बणावजी, ने तीनुक सोना सी बणावजी। ने टेबल तेरेत साहरे हाकेलजु। 29ने तीना सोनान परात ने धुप देण्‌यु ठाहरु, ने कड़छी, ने रेचवणेन कटवरा, आखा चुखला सोनान बणावजी। 30ने तु टेबल पर मार अगळ भेट, ने रुटा जलम मेक्‌या करजु।2

सोनान दीवु मेकणेन खुटु

(नीरगमन 37:17-24)

31अळतेन चुखला सोनान एक दीवु मेकणेवाटे दीवाळ्‌यो बणावजी। सोनो नाखाड़ीन चु दीवु मेकणेन खुटु पाया डंडी भेळ बणावजी; तीना फुलेन तसु, गाठ ने फुल आखो एकुत टुकड़ान बणावजी। 32ने तीना खुणा मां सी छव डाळखा नीकळती रह्‌वे, तीन डाळखा ते दीवु मेकणेन खुटान एक धड़े नीकळी रह्‌वे, ने तीन डाळखा दीसरी धड़े नीकळी रह्‌वे। 33एक-एक डाळ्‌ये बदामेन फुलेन तीन-तीन फुल सारका, एक-एक गाठ, ने एक-एक फुल रह्‌णु चाहजे; दीवु मेकणेन खुटा मां सी पुरा छव डाळखा हीनीत भाते रह्‌णु चाहजे; 34ने दीवु मेकणेन खुटान डंडी मां बदामेन फुल सांय च्‌यार बाहार आपणी-आपणी गांठ भेळ फुल रह्‌णु चाहजे। 35ने दीवु मेकणेन खुटा सी नीकळ्‌ळा आखा छव डाळखा मां सी दुय-दुय डाळखा हेटा एक-एक गाठ रह्‌णु चाहजे, ची गाठ ने दीवु मेकणेन खुटु एकुत चीज पर बन्‌ली रह्‌णु चाहजे। 36तींद्‌री गाठ ने डाळखा, आखा दीवु मेकणेन खुटा भेळ एकुत टुकड़ान रह्‌णु चाहजे, चुखलो सोनो नाखाड़ीन पुरु दीवु मेकणेन खुटु एकुत टुकड़ान बणावजी। 37ने सात दीवा बणावजी; ने दीवा काजे धपाड़जी की चु दीवु मेकणेन खुटा अगळ वीजाळो करे। 38तेरा आक्‌ठा उलवण्‌या चीम्‌टा, ने आक्‌ठा मेकण्‌या तळ्‌या आखा चुखला सोनान रह्‌णु चाहजे। 39अळतेन आखी चीज तीस ने च्‌यार कीलु पीवर सोनान बणाय मांगजु। 40ने चेतीन रय्‌न जी आखी चीज काजे तीनीत टेमे बणावजी, जो तुहुंंक मे हीना बयड़ा पर देखाड़लु छे।3