Bhilali Bible
नीरगमन 24
यहोवा भगवान ने ईस्रायेली माणसेन ईचमां वायदु
अळतेन भगवान मुसा काजे कह्यु, “तु हारुन, नादाब, अबीहु ने ईस्रायेली मां सत्तर डाहला माणसे भेळ यहोवा भगवान काजे चां उपर आवीन छेटु मांड्या वळीन वांदजु। मुसु अतरुत यहोवा साते आवे, बाकुन चु दीसरा साते नी आवे, ने दीसरा माणसे तींद्रे साते उपर नी आवणु चाहजे।”
मुसु माणसेन चां जाय्न, यहोवान आखी वात, ने आखा नीयम सामळाय देदु। चां आखा माणसे एक साते आयड़ीन कहणे बाजी ज्या, “जतरी वात यहोवा कह्लु छे, तीनी आखी वात काजे हामु मानसुन।” तत्यार मुसु यहोवान आखा बुल लिख लेदु, ने संदारे एगुत उठीन बयड़ान एक वेदी, ने ईस्रायेली माणसेन बारे घराणान अनसारे बारे खाम्बा घड़ाय्न उबा कर मांग्यु। तत्यार मुसु ईस्रायेली जुवान माणसे काजे मकल्यु, जे यहोवा वाटे होमबादा ने बेलेन मेलबादा चड़ाया। ने मुसु आधो लुही लीन कटवरा मां राख लेदु, ने आदो वेदी पर छाट देदु। तत्यार वायदान किताप लीन माणसे काजे भणीन सामळायु; तीनाक सामळीन माणसे कह्या, “जो काय यहोवा कह्लु छे, चो आखो हामु करसुन, ने तेरु हुकुम मानसुन।”
तत्यार मुसु लुही लीन माणसे पर छाट देदु, ने तीनुक कह्यु, “देखु जु तीना वायदान लुही छे। तीनाक यहोवा जे आखा वायदा पर तुंद्रे साते बांदलु छे।”1
तत्यार मुसु, हारुन, नादाब, अबीहु ने ईस्रायेलेन सत्तर डाहला माणसे उपर गुया। ने ईस्रायेलेन भगवानेन दरसन कर्या, ने तेरा पाय तळे नीळमणी नावेन नीळ्ळा दगड़ान पाट्लान तसो काय हतलो, जे वादळान तसो उजेळ्ळो हतलो। ने चु ईस्रायेलेन डाहला पर हात नी अगु कर्यु, चां तीना भगवानेन दरसन कर्या, ने खादा-पीदा।
मुसु सीनाय बयड़ा पर
तत्यार यहोवा मुसा काजे कह्यु, “बयड़ा पर मारेन्चा चहड़ीन आव, ने चां मारी वाट देख, ने तुसेक दगड़ान पट्या, ने मारा लिखला नेम ने हुकुम आपीस की तु तीनुक सीकाड़जी।”2 तत्यार मुसु यहोसु नावेन आपसा चाकर्या भेळ भगवानेन बयड़ा पर चहड़ी ज्यु। ने ईस्रायली माणसे डाहा-डाहा काजे ज कय ज्या की, “जत्यार तक हामु तारेन्चां पछा नी आवती रवजे, चां तक तुहुंं हसात मारी वाट देखता रह्जु; ने सामळु हारुन ने हुर तारे साते छे; कदी काहनाकेन काय दुख तकलीप हंय ते चे तींद्रेन्चां जाजु।”
तत्यार मुसु बयड़ा पर चहड़ गुयु, ने वादळो बयड़ा काजे ढाक लेदो। ने यहोवान सेक-सींगार सीनाय बयड़ा पर आयो, ने चो वादळो ते बयड़ा पर छव दाहड़ा तक छावायलो रयो, ने सातवे दाहड़े भगवान मुसा काजे वादळान ईचमां सी आयड़्यु। ईस्रायेली माणसेन नींगा मां यहोवा भगवानेन सेक-सींगार बयड़ान चटी पर बेसको आक्ठान तसो देखाव पड़्यो। तत्यार मुसु वादळान ईचमां भराय्न बयड़ा पर चहड़ गुयु। ने मुसु बयड़ा पर चाळीस दाहड़ा ने चाळीस रात रयु।3
Source notes (3)
- Cross-reference मत्ती 26:28; मरकुस 14:24; लुका 22:20; 1 कुरींथी 11:25; ईब्रानीयो 9:19,20; 10:29
- Cross-reference 2 कुरींथी 3:3
- Cross-reference वेवस्थावीवरन 9:9
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.