भगवानेन छाचला बुल
नेवताळा 4
मट्ली बसक अगळ पतरस ने युहन्नु
पतरस ने युहन्नु माणसेक कवणे बाजी रवला, ती पुजारु, मंदीर मां राखवाळी करन्या सीपायड़ान मुखी, ने सदुकी पंथवाळा माणसे तींद्रेन्चां जुर करीन आय गुया। पतरस ने युहन्नु ईसु मर्या-सर्याम सी जीवतु हय गुयु करीन मर्या-सर्याम सी जीवतु हय्न बठु हवणेन बारामां ईसुन दाखलु देखाड़ीन परचार करीन सीकाड़तेला। तेरेसी चे बेसका रीसाय रवला। अळी चे तीनु काजे धरीन दीसरे दाहड़े लग जेलेम कुंड देदा, काहाकी सांतो हय गुयलो। बाकुन जे तींद्री वात सामळी रवला, तीनु मायन बेसका जणा ईसु पर भुरसु कर्या, ने ईसु पर भुरसु करन्या बायराक-पुर्याक छुड़ीन अदमी-अदमी पांचेक हजार हय गुया।
दीसरे दाहड़े यरुसलेम सहर मां भगवानेन मंदीरेन मुखीन, ने पुडारीन, ने नीयम सीकाड़न्या मास्तर्यान बठक हय। ने चां भगवानेन डाहलु पुजारु हन्ना, ने काइफा, ने युहन्नु, ने सीकन्दर ने मुखी पुजारान घरन्या बी भेळा हतला। चे पतरस ने युहन्ना काजे ईचमां उबा करदीन ज पुछणे बाजी गुया, “तुहुं कुणीन ताकत ने नावे ज काम करला छे?” तत्यार चुखली-आत्मा पतरस मां पुरु भरायन कब्जा मां कर लेदु, ने ती पतरस तीनुक कह्यु, ए माणसेन मुखी ने पुडारी! एक लंगड़ा माणसेन भलो हवलो छे, एरे बारामां आज हामु काजे तुहुं पुछणे बाजी रया की जु कसु वारु हवलु छे। ती तुहुं आखा काजे ने ईस्रायली जातीन माणसे काजे मालुम हय जाणु चाहजे, की जु लंगड़ु माणुस ईसु मसी नासरीन नाव सी वारु हय्न, तुंद्रे अगळ उबु हय रयु। तुहुं तीना ईसु मसी काजे कुरुस पर चड़ाया, बाकुन भगवान तीना ईसु मसी काजे मर्या-सर्याम सी पछु जीवाड़ीन बठु कर देदलु छे। जु ईसु हयुत छे, तीना दगड़ाक “मीस्तर्या” बेकार समजीन बाहर नाख देदा,
चु दगड़ुत घरेन नेहान,
खुणे वाळु दगड़ु बण गुयु।
तेरेसी ईसुक छुड़ीन काहना बी दीसरा माणसेन साहरे पाप सी छुटकारु नी जड़े, काहाकी सरगेन नेचो ईनी आखी कळी मां ईसु नाव छुड़ीन दीसरो नाव नी हय, तीने नावे आपणुक पापेम सी छुटकारु जड़तु हय।
जत्यार यहुदी मुखी पतरस ने युहन्नान हिम्मत देखीन चकराय गुया काहाकी जे ते अनपड़ ने सुदला माणसे छे; बाकुन अळतेन मालुम पड़्यो की जे ते ईसु पुठ्ये रवला हतला; बाकुन वारु हवला माणसे काजे तींद्रे भेळतु उबु हय रवलु देखीन, तीनुक जपाप मां काय नी कह्वायो। बाकुन चे पतरस ने युहन्ना काजे बठक सी बाहर मकली देदा ने आपसा-आपसा जु वीच्यार कर्या, “हामु हीनुक काय करजे ने काय नी? काहाकी यरुसलेम मां रवण्या आखा माणसे काजे जु पतु हय गुयलु छे, की जु एक बेसका वारु कामेन सहलाणी देखाड़ला छे; ने आपणुक हीना कामेन नीकारु करता नी बणे। बाकुन तेबी ईनी वातेन वदु परचार माणसे मां नी हवणु चाहजे, करीन आपणु ईनुक धमकी देदा, की तुहुं ईना ईसुन नाव लीन कुय साते अगा वात मां करु।”
अळी चे पतरस ने युहन्ना काजे अळी बुलावणे मकल्या ने तीनुक हुकुम आपीन कह्या, की तुहुं ईसुन नाव लीन कुय साते वात बी घुण करु, ने कुय काजे सीकाड़ु बी घुण। बाकुन पतरस ने युहन्ना तीनु काजे ज जपाप आप्या, “तुहुंत नीयाव करीन कहं; हामु काजे भगवानेन नींगा मां, भगवानेन सामळने छुड़दीन तुंद्री सामळनु वारु रवसे काय? काहाकी हामु ज देखला ने सामेळला छे, तेरा बारामां नी कवे, ने हुगात हय र्या ती हामुक नी जमे।” तत्यार चे पतरस ने युहन्ना काजे अळी बेसका चेतावीन छुड़ देदा, काहाकी तीनुक डंड आपणेन तीनुक काय बी बाहनो नी जड़्यो, काहाकी ज वारु काम हयो हतलो तीना कामेन साहरे आखा माणसे भगवानेन बड़ाय करने बाजी रवला। काहाकी तीना वारु कामेन सहलाणीन साहरे च माणुस वारु, तेरी उमर चाळीस साल सी वदु हतली।
भुरसु करने वाळा माणसे वाटे हिम्मतेन दुवा
जत्यार चे पतरस ने युहन्ना काजे छुड़ देदा, ती पतरस ने युहन्नु आपसा सातीन्चां आया, ने ज काय पुडारी ने भगवानेन मुख्या पुजारा कवला, च आखो तीनुक कय देदा। ज सामळीन पतरस ने युहन्नु तींद्रा साती आखा मेळीन भगवान सी एक जसी वीन्ती कर्या, ए मालीक, तुत सरगे ने धरतीक, ने समुदर ने समुदर मां ज काय छे, च आखो बणावलु छे। तु चुखली-आत्मान साहरे आपसा पावर्या दावुदेन मुंहडे ज कवलु हतलु,
नी-यहुदी माणसे असलात काहा आयड़े?
आखा देसेन माणसे फालतु वीच्यार काहा कर रया?
धरतीन राजा,
ने देस देसेन राज करन्या आखा भेळा हवे;
चे मालीक भगवान भीणी ने तेरा नेवाड़ला राजा भीणी जुर करे।
काहाकी चे छाचलीन, चुखलु चाकर्या ईसुन वीरुद मां हय्न जाळसांदी बणाय रया, तीना काजे तु नेवाड़लु छे, हेरोदेस ने पुंतीयुस पीलातुस, ने नी-यहुदी ईस्रायली जातीन माणसे सहर मां भेळा हय रया। हव, चे एरेन करीन भेळा हय रया की ज काय तारी ताकत ने मरजी सी पेहले सीत ठहरावलो छे, ज पुरो हय सके। ए मालीक! हय, हींद्री धमकी काजे देख, की तारा पावर्या काजे जु वाटु आप की चे तारा बुल काजे बीहे बीगुर पुरी हिम्मत सी सामळावे। ने तु माणसेक वारु करने करीन आपसुत हात अगु कर; ने तारा चुखला चाकर्या ईसुन नावे, सहलाणी ने भाती-भातीन वारु काम देखाड़? जत्यार चे भगवान धड़े दुवा करीन नवराय गुया, ती चु जागु, जां चे भेळा हय रवला, हाल पड़्यु, ने चुखली-आत्मा तींद्रेम पुरु-पुरु भरायन तीनुक कब्जाम कर लेदु, ने चे हिम्मत सी भगवानेन बुल माणसे काजे सामळावणे बाजी गुया।
ईसुन माणसे हेळी मेळीन रहणु
ईसु पर भुरसु करन्या माणसेन एक टुळु ने एक मन्या ने एक जसा हय्न रवतेला। कुय बी आपसा धन काजे आपसो नी समजतेला। ज काय तींद्रे धड़े रवतेलो, तेरेमां आखान साजु हतलो। ईसुन नेवताळा पर जुर लागाड़ीन मालीक ईसुन मर्या-सर्याम सी जीवतु हय्न बठु हवणेन गवा देदला, ने तीनु आखा पर भगवानेन मट्ली गीण-दया हतली। ने तींद्रेम कुय बी गरीब नी हतलो, काहाकी तींद्रे धड़े खेती नीते घर हतलो, तीनुक चे एच देद्ला, ने तींद्रु दाम लावीन ईसुन नेवताळान पायेन्चां लायन मेल देदला; ने तीनुक ज चाहतेलो च तीनुक वाट देदला।
युसुफ नावेन एक सायपर्सेन लेवी कुळी मायन हतलु, जु कुपरुस मां पयदा हवलु हतलु, तेरो नाव ईसुन नेवताळा बरनाबास पाड़ला हतलो। बरनाबास मतलब दीलासु आपण्यान पुर्यु। तेरु एक जागु हतलु, तीना जागा काजे चु वेचलु हतलु, ने चु जागान रुप्या लावीन ईसुन नेवताळान पाय मां मेल देदु।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.