भगवानेन छाचला बुल
नेवताळा 3
लंगड़ु भीक मांगण्यु वारु हवे
पतरस ने युहन्नु मांजणीक वेळाय, दुवा करने मंदीर मां जाणे बाजी रवला। ने तीनी टेमे माणसे एक माणुस काजे ली जाणे बाजी रवला, चु जलम सीत लंगड़ु हतलु। चे तीनाक दाहड़ीन लावीन मंदीरेन घाटाळ्ळा नावेन झपलान्चां बठाड़ देदला। ने चु मंदीर मां आवण्या-जाण्या धड़े भीक मांग्या करतेलु। जत्यार चु पतरस ने युहन्ना काजे मंदीर मां भरायतेला देख्यु, ती तींद्रे धड़े जाय्न भीक मांग्यु। पतरस ने युहन्ना तीना भीणी एक-हेट्या देख्या, ने पतरस कह्यु, “हामरे भीणी देख।” ने चु काय जड़से करीन तींद्रे भीणी एक हेट्यु देख्यु।
बाकुन पतरस तीनाक कह्यु, “मार धड़े चांदी ने, नीते सनो हय बाकुन मार धड़े ज छे, च तुसेक आपो ईसु मसी नासरीन नाव सी चाल ने हींड-फीर।” ने पतरस तेरु जेवड़्यु हात धरीन तीनाक उठाड़्यु, ने तत्यारुत लंगड़ान पायेम ने मांडाम ताकत आय गुय। ने चु उछळीन मामार उबु हय गुयु, ने हींडणे-फीरने बाजी गुयु; ने भगवानेन गुण गावतु जाय्न, उच्चु कुद्तु-कुद्तु, पतरस ने युहन्ना पुठ्ये मंदीर मां जाती रयु। आखा माणसे तीनाक हींडतेलु-फीरतेलु ने भगवानेन गुण गावतेलु देख्या, माणसे तीनाक उळखीन कह्या, जु ते हयुत छे, जु मंदीरेन घाटाळ्ळा नावेन झपला पर भीक मांग्या करतेलु। तीना लंगड़ा साते ज काय बी हवलो, तीनाक देखीन चे चकराय गुया।
मंदीर मां जाय्न पतरस माणसे काजे सीकाड़े
जत्यार चु माणुस पतरस ने युहन्नान हात धरीन पुठ्ये जाणे बाजी रवलु। तत्यार आखा माणसे चकरायन सुलेमानेन खपड़ा मां तींद्रेन्चां दवड़ता आया। पतरस तीनुक आवतेला देखीन कह्यु, ए ईस्रायली माणसे! तुहुं ईना माणसेक देखीन काहा चकराय रया, ने हामरे भीणी एक-हेट्या काहा देख रया। तुहुंक असो लाग रयो की हामुक हामरे जुरे ने हामरी भक्तीन जुरे ईनाक हींडतु-फीरतु करला छे, बाकुन असो नी हय। अब्राहमेन, इसाकेन ने याकुपेन भगवान, हामरा डाहा भगवान आपसा चाकर्या ईसु काजे सेक-सींगार भरलु छे। तुहुं ईना ईसु काजे सीपायड़ान हातेम धराय्न पीलातुसेन हात लगु कर देदा ने जत्यार पीलातुस तेरु नीयाव करीन छुड़नेन वीच्यार कर्यु, ती तुहुं हीनाक मां छुड़े करीन नीकारु कर देदा। तुहुं चुखला ने वारलु माणसेक मां छुड़े करीन तेरु नीकारु कर देदा, ने आपसान करता हत्याराक छुड़ दे करीन कह्या। ने असु करीन तुहुं जीवाय आपण्या काजे माराय नाख्या, बाकुन भगवान तीनाक मर्या-सर्याम सी जीवतु करीन बठु कर देदु; ने हामु ईनी वातेन गवा छे। काहाकी हामु ईसु नाव पर भुरसु कर्या, ने ईनात नावेन जुरे ईना माणुस काजे, तीनाक तुहुं देखु, ने जाणु की जुर जड़लु छे। छाचलीन हयुत भुरसु जु ईसुन साहरे छे, ईनाक तुहुं आखा अगळ वारु करलु छे।
ने हय ए भायस्यो! मे जाणो की तुहुं ने तुंद्रा मुखी अनजाण्या हतला, एरेन करीन चे ईसु काजे कुरुस पर चड़ावीन माराड़ नाख्या। बाकुन भगवान आपसा अघी सी आवणे वाळी वात देखाड़न्या माणसेन साहरे पेहले सीत कय देदलु की आवणे बाजी रयु तीना मसी काजे दुख झेलनु पड़से। असु करीन भगवान आपसान कवलो पुरो कर्यु। तेरेसी तुहुं पाप भीणी सी मन फेरवीन भगवान भीणी वळु; ती तुहुं काजे भगवान माफ करसे। तुहुं मालीकेन हजरी मां वारु जीव जीवणेन टेम जड़से। तत्यार भगवान तुंद्रे वाटे पेहले सी ठेहरावला ईसु मसी काजे तुंद्रेन्चां मकलसे। जु मसी तीने टेमे लग सरगे मां रवसे, जत्यार लग चु आखी चीज काजे पेहल हतली तसीत नी बणावे; ईनी टेमेन ने वातेन बारामां, भगवानेन चुखलु अघी सी हवणे वाळी वात देखाड़न्या माणसेन कळी घड़ायी ती सीत कवता आय र्या। जसु मुसु कह्लु, मालीक-भगवान तुंद्रे वाटे तुंद्रा भाय-बेटाम सी एक भगवानेन चुखला अघी सी आवणे वाळी वात देखाड़न्या काजे उबजाड़से, ने चु चुखलु अघी सी आवणे वाळी वात देखाड़न्यान ज काय तुहुं काजे कहें, चत सामळीन तुहुं तेरी वात मांजु। बाकुन काहनु बी तीना चुखला अघी सी आवणे वाळी वात देखान्यान वात सामळीन नी माने, चु तीना काजे चु आपसा असामी मां सी अलग करीन मार देसे। ने समुएल ने तेरे सी अळी आवला आखा भगवानेन अघी सी आवणे वाळी वात बताड़ने वाळा मसीन आवणेन बारामां ईनु दाहड़ान बारामां पेहले सीत कवला हतला। तुहुं ते भगवानेन अघी सी आवणे वाळी वात देखान्यान अवल्यात छे, ने तीना वायदान साजेल्या छे, तीना वायदाक भगवान तुंद्रा डाहा-डाहा वाटे तीनी टेमे ठेहरायु, जत्यार चु अब्राहम काजे कह्यु, तारी अवल्यातेन साहरे धरती पर रवण्या आखी कळीन माणसे संयबरकत हात करसे। भगवान तुंद्रे मायन एकेक जणा काजे कुहराय सी छुड़ावीन संयबरकत आपणे करीन, आपसा पावर्या काजे पेहले तुंद्रेन्चां मकेल्लु छे।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.