भगवानेन छाचला बुल
2 कुरींथी 9
भेळा रवण्या मसी माणसे वाटे मदत
हय तीनी चाकरीन बारामां जे चुखला माणसे वाटे कर र्या, मेसे तुहुं काजे लिखणु जरुड़ी नी हय। काहाकी मे तुंद्रे मनेन तीयारी काजे जाणो, जेरे वजे सी मे तुंद्रे बारामां मकीदुनीयाम रवण्यान अगळ मटाय देखाड़ो, की अखायान माणसे एक साल सी तीयार हवला छे, ने तुंद्री खुसी बेसका काजे उभार्या बी। बाकुन मे भायसे काजे हेरेसी मकेल्लु छे, की हामु जे मटाय तुंद्रे बारामां देखाड़जे, चु ईनी वात मां फालतु नी ठेहरे; बाकुन जसों की मे कहं; असात तुहुं बी तीयार रहु असो नी हवे, की कदी कुय मकीदुनीया वाळा मारे धड़े आया, ने तुहुं तीयार नी रवु, की हय सके की हीना भुरसान वजे सी हामु ज नी कवता की तुहुंक सरमायु1! हेरेसी मे भायसे सी जी लीलघायान करनु जरुड़ी समजी गुयु की जे पेहेल सी तुंद्रे धड़े आया, ने तुंद्रा खुल्ला मन सी फळ तींद्रे बारामां पेहलुत सी बुल आपला हतला, तीयार करीन राखु, की ज दबाव सी नी बाकुन खुले मनेन फळेन तसा तीयार रवु।
बाकुन वात जी छे, जे ईतरोक वेरे चु ईतरोक काटे बी, ने जे बेसको वेरे, चु बेसको काटसे। आखा माणुस जसों मन मां ठाणी लेय असोत दान करे; नी कुड़-कुड़ सी, ने नी दबाव सी, काहाकी भगवान खुसी सी आपणे वाळा सी परम राखे। भगवान आखी भातीन गीण-दया सी बेसकु बड़ीन आप सके जेरे सी आखी वात मां ने आखी टेमे, आखो काय, जो तुहुंक जरुड़ी रवे, तुंद्रे धड़े रवे, आखो वारु काम वाटे तुंद्रे धड़े हवे। जसों लिखलो छे,
“हयु आरवी देदु, ने खाली काजे दान आप्यु,
हेरो धरम जलम बणीन रवसे।”
अळतेन जे एरने वाळा काजे बीज, ने खाणे वाटे रुटा आपे, चु तुहुंक बीज आपसे ने हीनाक फळ वाळु करसे; ने तुंद्रे धरमेन फळे काजे बड़ावसे। तुहुं आखी वात मां आखी भातीन खुला वाटे जे हामरे साहरे भगवान काजे तु बेसकु वारु 2छे करीन कह्वाड़े, पयस्या वाळा हय जावु। काहाकी हीनी चाकरीन पुरो करने सी, चुखला माणसेन मांगे अतरी पुरी नी हवसे, बाकुन माणसे भीणी सी भगवानेन बी बेसकु वारु छे करीन कहवाय्से। काहाकी हीनी चाकरी काजे सबुत काजे माने चे भगवानेन सेक-सींगार देखाड़े करे, की तुहुं मसीन खुस-खबर काजे मानीन हेरे हक मां रवे, ने हींद्री, ने आखी मदत करने मां उदार देखाड़ता रवे। ने चे तुंद्रे वाटे दुवा करे, ने हेरेसी की तुंद्रे पर भगवानेन मट्ली गीण-दया सी, तुंद्री लालच करती रवे। भगवानेन तीना दानेन वाटे जे समज सी बाहार छे, तु बेसकु वारु छे।
Source notes (2)
- Footnote सरमायु लज्जित
- Footnote तु बेसकु वारु धन्यवाद
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.