भगवानेन छाचला बुल
2 कुरींथी 10
पोलुसेन हक
मे चु पोलुस जे तुंद्रे अगळ लीलघाये, बाकुन आसा पछळ तुंद्री अळी हिम्मत करो; तुहुं काजे मसीन नरम, ने लाड़-परम सी समजाड़ो, मे जी लीलघाया करो, की तुंद्रे अगळ मेसे ताकत वाळु हय्न हिम्मत करनु नी पड़े; जसु मे काय माणसे पर जे हामु काजे डीलेन अनसारे चालने वाळा समजे, हिम्मत देखाड़ने वीच्यार करो। ज्य सय छे की कदी हामु डील मां चालजे ने फीरजे, तेबी डीलेन अनसारे नी लड़ायजे। काहाकी हामरी लड़ाय हत्यार कळीन तसी नी, बाकुन गड़ काजे उदार नाखणे वाटे भगवानेन साहरे ताकत वाळा छे। हेरेसी हामु मनेन उपजाव काजे, ने हरीक एक उचली वात काजे, जी भगवानेन उवखाणेन वीरुद मां उठे, आंग्ये-आंग्ये1 करजे; ने मसीन हरीक एक हुकुम मान्या बणाय देय। ने तीयार रवे की जत्यार तुंद्रा हुकुम पाळनेन दाहड़ा पुरा हय जाय, ती हरीक भातीन हुकुम नी मान्या काजे डंड आपे।
तुहुं ईनीत वात काजे देखु, जे डुळा अगळ छे, ती काहालाक काजे आपणे पर जु भुरसु छे, की मे मसीन छे, ती चु ज बी जाणी लेय, चु मसीन छे, असात हामु बी छे। काहाकी कदी मे हीना हकेन बारामां अळी बी मटाय देखाड़ो, जे मालीक तुंद्रे बीगाड़ने वाटे नी बाकुन बणावणे वाटे हामुक आपलो छे, ती सरमाये नी। ज्य मे हेरेसी कवो, की चिट्ठीन साहरे तुहुंक बीहाड़ने वाळा नी ठेरे। काहाकी चे कवे, “हेरी चिट्ठीया ते बेसका ताकत वाळा ने हिम्मत देखाड़न्या छे; बाकुन जत्यार देखे, ती कहें की चु डीलेन लुलु ने कहणे2 मां हळकु जाणी पड़े।” जु असु कहें, चु ज समज राखे, की जसा आसा पछळ चिट्ठीया मां हामरा बुल छे, असात तुंद्रे अगळ हामरे काम बी हवसे।
काहाकी हामु जी हिम्मत नी की हामु आपणे आप काजे हींद्रे मां सी असा काय साते गीणे, नीते तीनुक आपणु काजे भेळा करे, जे आपणी बड़ाय आपसु करे, ने आपणे आप काजे आंबा-सांबा नापीन तुलीन एक दीसरा सी भेळा करीन डेड़-अकल्या ठेरजे। हामु ते काकड़ सी बाहार मटाय कदी नी करे, बाकुन हीना काकड़ लग जे भगवान हामरे वाटे ठेराय देदला छे, ने हेरे मां तुहुं बी आय गुयला छे। ने हेरे अनसारे मटाय बी करसुन। काहाकी हामु आपणा काकड़ सी बाहार आपणे आप काजे बड़ावु नी चाहतु, जसा की तुंद्रे लग नी पुगणेन दसा मां हवे, बाकुन मसीन खुस-खबर सामळावता जाय्न तुंद्रे धड़े लग आय गुयला छे। हामु काकड़ सी बाहार दीसरान मेहनत पर मटाय नी करजे; बाकुन हामुक आस छे, की जसु-जसु तुंद्रु भुरसु बड़तु जासे असात-असात हामु बी आपणा-आपणा काकड़ेन अनसारे तुंद्रे वजे सी अळी बी बड़ता जासुन। काहाकी हामु तुंद्रा काकड़ सी अगा बड़ीन खुस-खबर सामळ्या, ने ज्य नी, की हामु दीसरान काकड़ेन माहें बणावला काम पर मटाय करजे।
बाकुन जो मटाय करे, चु मालीक पर मटाय करे काहाकी जो आपणी बड़ाय करे, चु नी, बाकुन जेरी बड़ाय मालीक करे, हयुत अगु हवसे।
Source notes (2)
- Footnote आंग्ये-आंग्ये खण्डन
- Footnote कहणे वक्तव्य
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.