भगवानेन छाचला बुल
2 कुरींथी 8
खुला मन सी दान आपणु
हय ए भायसे, हामु तुहुंक भगवानेन हीना गीण-दयान खबर आपजे, जे मकीदुनीयान मंडळी पर हयो। की दुखेन मट्ली पारख मां हींद्रे मटला खुसी ने मटी गरीबी मां हींद्रे खुला मन सी1 बेसकी अदी गुय। हींद्रे बारामां मारी जी गवाय छे, की हीनुक आपणी ताकत भरीन बाकुन ताकत सी बी बाहार मन सी आप देदा। ने हीना दान मां ने चुखला माणसेन चाकरी मां साजल्या हवणेन गीण-दयान बारामां हामरे सी पछात-पछात बेसका लीलघाया। ने जसा हामु ने आस करला हतला, असात नी, बाकुन चे मालीक काजे, अळतेन भगवानेन मरजी सी हामु काजे बी आपणे आप काजे आप देदा। हेरेसी हामु तीतुस काजे समजाड़्या, की जसों हयु पेहल सुरु करलु हतलु, असात तुंद्रे ईचमां हीनी दानेन काम काजे पुरो बी करला। हेरेसी जसा तुहुं आखी वात मां मतलब भुरसु, बुल, अक्कल ने आखी भातीन खुसी मां, ने हीना परम मां, जे हामरे सी राखे, अदता जावु, असात हीना दानेन काम मां बी अदता जावु।
मे हुकुमेन रीत पर ते नी, बाकुन दीसरान खुसी सी तुंद्रे परमेन छाचाय काजे पारखणे वाटे कहो। तुहुं हामरा मालीक ईसु मसीन गीण-दया काजे जाणु, की चु पयस्या वाळु हयन बी तुंद्रे वाटे खाली हय गुयु काहाकी हेरे खाली हय जाणे सी तुहुं पयस्या वाळा हय जावु।
ने हीनी वात मां मारु वीच्यार जु छे। ज्य तुंद्रे वाटे वारलु छे जे एक साल सी नी ते सीरप हीना काम काजे करनेत मां, बाकुन हीनी वातेन चाहावणे मां बी पेहल हतला। हेरेसी हय ज्य काम पुरो करु; की जसी मरजी करने मां तुहुं तीयार हतला, असात आपणी-आपणी कमायन अनसारे पुरा बी करु। काहाकी कदी मनेन तीयारी हय जाय ती दान हेरे अनसारे अगा बी हवे जे हेरे धड़े छे असो नी की हेरे अनसारे जो तेरे धड़े नी हय।
ज्य नी की दीसरा काजे सांती2 ने तुहुं काजे दुख जड़े। बाकुन बराबरेन वीच्यार सी ईनी टेमे तुंद्री बड़ती ने तुंद्री कमी मां काम आवे, काहाकी तुंद्री अदती बी ने तुंद्री कमी मां काम आवे, की बराबर हय जाय। जसों लिखलो छे, “जु बेसका भेळा कर्यु हेरा काम अदुस नी नीकळ्या ने जे थुड़ाक भेळा कर्यु तेरो कम नी नीकळ्यो।”
तीतुस ने हेरु साजल्यु
भगवान काजे तु बेसकु वारु छे करीन कह्वो, जु तुंद्रे वाटे जीत खुसी तीतुसेन मन मां भर देदु। की हयु हामरो समजाड़नु मान लेदु ने बेसकु खुसी हयन चु आपणी मरजी सी तुंद्रे धड़े गुयु। हामु हेरे धड़े हीना भायस काजे बी मकेल्ला जेरो नाव खुस-खबरेन बारामां आखी मंडळी मां फेलाय देदा; ने अतरात नी, बाकुन चु मंडळीन साहरे ठेराया बी गुया की हीना दानेन काम वाटे हामरे भेळा जाय हामु जी चाकरी हेरेसी करजे, की मालीकेन सेक-सींगार ने हामरे मनेन तीयारी देखाव पड़ जाय।
हामु हीनी वात मां चेतीन रवु, की हीनी खुला मन सी कामेन बारामां तींद्री चाकरी हामु करजे, कुय बी हामरे पर गुना नी लागाड़नु चाहजे। काहाकी जी वात मालीक धड़े अतरोत नी, बाकुन माणसेन धड़े बी वारु छे हामु हींद्री फीकुर करजे।
हामु हेरे भेळा आपणा भायस काजे बी मकेल्ला छे, तीना काजे हामु अळी अळीन पारख्या, बेसकी वात मां खुसी हवला देख्या; बाकुन हय तुंद्रे पर हेरु मट्लु भुरसु छे, हीनी वजे सी चु अळी बी जादास खुसी छे। कदी कुय तीतुसेन बारामां पुछे, ती चु मारु साती, ने तुंद्रे वाटे मारु साजल्यु छे। ने कदी हामरा भायसेन बारामां पुछे ती चे मंडळीन नेवताळा ने मसीन सेक-सींगार छे। अळतेन आपणा परम ने हामरु चु मटाय जे तुंद्रे बारामां छे मंडळी अगळ पुरो करीन हीनुक देखाड़े।
Source notes (2)
- Footnote खुला मन सी उदार
- Footnote सांती चैन
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.