2 कुरींथी 7

1अळतेन ए लाटेक्‌लु भायसे जत्‌यार की जु वायदु हामुक जड़लु छे, ती आवु, हामु आपणे आप काजे डील ने आत्‌मान आखा पापे सी चुखला करे, ने भगवान काजे बीहता जाय्‌न चुखला काजे पुरो करु।

पोलुसेन खुसी

2हामुक आपणा मन मां जागा आपु; हामु ते तुंद्‌रे मायन काहालान बी हामु बयमानी नी कर्‌या ने काहालाक काजे बीगाड़्‌या, नी काहनाक काजे नी ठग्‌या 3ने तुहुं गुना वाळा ठेराड़ने वाटे ज नी कवतु काहाकी मे पेहेल सी कय देदलु छे, की तुहुं हामरे मन मां असा बसी गुया की हामु तुंद्‌रे साते मरणे जीवणे वाटे बी तीयार छे। 4मे तुंद्‌रे सी बेसकु हिम्‌मतेन साते कय र्‌यु, मेसे तुंद्‌रे पर मटुत घमट छे; मे सांती भराय गुयु; आपणा आखा दुख1 मां सी ने मे बेसकु कायनी खुस छे।

5काहाकी जत्‌यार हामु मकीदुनीया मां आया, तत्‌यार बी हामरा डील काजे आराम नी जड़्‌यो, बाकुन हामुक चारे मेर सी दुख जड़तेला; बाहार झगड़ा हतला, माहें बीहणे वाळी वात हतली। 6तेबी हीनु काजे सांती आपणे वाळु भगवान तीतुसेन आवणे सी हामु काजे सांती आप्‌यु। 7ने हेरे आवणे सी अतरुत नी, बाकुन हीनी सांती सी बी, जे हेरो तुंद्‌रे भीणी सी जड़ली हतली; हयु तुंद्‌री लालच सी, ने तुंद्‌रो दुख ने मारे वाटे तुंद्‌री धुन काजे खबर हामुक सामळावे, जेरे सी मेसेक अळी बी खुसी हवे।

8काहाकी कदी मे आपणी चिट्‌ठी सी तुहुंक दुखी कर्‌यु, बाकुन हेरसी पसतावु नी करतु जसों की पेहेल पसतावु हतलु काहाकी मे देखो की हीनी चिट्‌ठी सी तुहुं काजे दुख ते हयु। बाकुन च थुड़ीक वार वाटे हतलो। 9हय ने खुसी हयु बाकुन हेरेसी नी की तुहुं काजे आफोत आय बाकुन हेरेसी की तुहुं हीना आफोतेन वजे सी मन फीराया, काहाकी तुंद्‌रो आफोत भगवानेन मरजीन अनसारे हतलो, ती हामरे भीणी सी तुहुंक काहनी वात मां नुकसाण नी हवे 10काहाकी भगवान भक्‌तीन आफोत असा पसतावु पयदा करे; की जेरो सबुत छुटकारु छे। ने अळतेन हीनाक पसतावु नी हवे! बाकुन कळीन डीलेन दुख मुत काजे पयदा करे। 11अळतेन देखु, ईनी वात सी की तुहुं भगवानेन भक्‌तीन आफोत हया; तुंद्‌रे मां कतरो खुसीन, जपाप, ए रीस, बीहणु, ने लालच, ने धुन ने डंड आपणेन वीच्‌यार पयदा हवे? तुहुं आखी भाती सी ज चुखो करीन देखाड़्‌या, की तुहुं हीनी वात मां नी-गुना वाळा छे।

12जी चिट्‌ठी जु पाप कर्‌यु तेरे वाटे नी लिख्‌यु ने जु बयमानी कर्‌यु तेरे वाटे बी नी लिख्‌यु, बाकुन तुंद्‌रे वाटे एरेन करीन लिख्‌यु की तुंद्‌री खुसी जी हामरे वाटे छे, ची हवस भगवान अगळ उजेंती हय जाय। 13हेरेसी हामुक सांती जड़े।

हामरी सांती साते तीतुसेन खुसीन वजे सी अळी बी खुसी हवे, काहाकी हेरा जीव तुहुं आखान वजे सी खुसी मां गद-गद हय गुया! 14काहाकी कदी मे हेरे अगळ तुंद्‌रे बारामां काय मटाय देखाड़्‌यु, ती लाजवाये नी, बाकुन जसा हामु तुंद्‌रे सी आखी वात छाचली कय देदला, असात हामरी मटाय देखाय तीतुस अगळ बी छाचली नीकळी। 15जत्‌यार हेरो तुहुं आखान हुकुम मान्‌या2 हवणेन हेर आवे, की कसा तुहुं बीहता जाय्‌न ने घाबरायता जाय्‌न ने भेट कर्‌या; ती हेरा परम अळी बी बड़तो जाय। 16मे खुसी मां छे, काहाकी मेसेक तुंद्‌रे भीणी सी वात मां पुरु भुरसु छे।