Bhadrawahi Bible
भजन संहिता 16:8
Verse 8 is marked below, with the whole chapter around it. Read from the start
परमेशर मेरो हिस्सोए
दाऊदेरू मुक्तरू गीत
हे परमेशर मेरी रक्षा केर,
किजोकि अवं तेरी शरणी मां एवरोईं।
मीं यहोवा सेइं ज़ोवं, “कि तूए मेरो प्रभु आस;
तेरे बगैर मेरी कोन्ची भलियाई नईं।”1
धेरती पुड़ ज़ैना पवित्र लोकन,
तैन्ना आदरारे काबलन,
ते तैन्ने सेइं अवं खुशी आईं।
देबते पूज़ने ते तैन पत्ती च़लनेबालां केरो दुख बद्धतो गालो;
अवं तैन केरि ज़ेरि खूने बाली च़ढ़तल न च़ाढ़ेलो,
ते अपने ऐशी सेइं तैन केरू नवं भी न घिन्नेलो।
यहोवा तू मेरो च़ुनोरो हिस्सो ते मेरो कुटोरो आस;
तूए मेरो हिस्सो हिफाज़ती सेइं रखतस।
मेरे लेई नापरी डोरी मन पसंद ठैरी पुड़ राई,
बल्के मेरी विरासत मने पसंद एजनेबाली आहे।
अवं यहोवारी तारीफ़ केरताईं,
किजोकि तैने मीं सलाह दित्ती;
बल्के मेरो दिल राती भी मीं शिक्षा देते।
मीं यहोवा हमेशा अपने सामने रखोरोए;
एल्हेरेलेइ कि तै मेरे देइने पासे रहते अवं कधे न हिलेलो।
एस्से वजाई सेइं मेरो दिल खुशी
ते मेरी आत्माई भी आरामे;
ते मेरी जान सुरक्षित राली।
किजोकि तू न त मेरी जान पाताले मां राने देलो,
ते न अपने पवित्र भक्ते2 कब्री मां शड़ने देलो।
तू मीं ज़िन्दगरी बत हरालो;
तेरे नेड़े बड़ो आनन्दे,
ते तेरे देइने हथ्थे मां सुख हमेशारे लेई बनेरू रहते3।
Source notes (3)
- Footnote मेरी कोन्ची भलियाई नईं मेरी सारी भलियाई तीं करां एइतीए
- Footnote पवित्र भक्ते यानी यीशु मसीह
- Footnote आयत 8-11 बिलकुल एन्च़रे प्रेरितां केरां कम्मन मां 2:25-28 मां लिखी जेवरिन
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.