Bhadrawahi Bible
भजन संहिता 15
धर्मी मैन्हेरू बियान
दाऊदेरू भजन
हे यहोवा तेरे डेरे मां कौन रालो?1
ते तेरे पवित्र पहाड़ सिय्योने पुड़ कौन रालो?
तैए ज़ै सच़्च़ेरी बत्ती पुड़ च़लते ते धार्मिकतारां कम्मां केरते
ते दिले सेइं सच़ ज़ोते।
कने तै ज़ै एपनी ज़बानी सेइं केन्चेरी तुहीन न केरे,
ते अपने दोस्ते सेइं बुराई न केरे,
ते अपने पड़ोसेरी बदनामी न शुने।
कने तै ज़ेसेरी नज़री मां अधर्मी मैन्हु बिलकुल घटियाए,
पन ज़ैना यहोवा करां डरतन, तैन केरि इज़्ज़त केरते,
कने तै ज़ै कसम केरतां न बेदलोए चाए तैस नुकसान की न भोए।
ते कने तै ज़ै अपने रुपेइये सूते पुड़ न दे,
ते बेकसूरेरो नुकसान केरनेरे लेई रिश्पत न ने:
ज़ै कोई एरू केरते तै कधी न बिछ़ड़ेलो।
Source notes (1)
- Footnote यरूशलेमेरे मन्दरे मां एजने बाले ई सवाल पुछ़तन। डेरेरो मतलब परमेशरेरी हज़ूरी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.