Bhadrawahi Bible
भजन संहिता 127
परमेशरेरो आशिर्वाद
सुलैमानेरे सफरेरू गीत
अगर यहोवा घर न बनाए,
त बनाने बालेरी मेहनत बेकारे।
ते अगर यहोवा नगरेरी हिफाज़त न केरे,
त पहरेदारेरू बींझ़ू बिशनू बेकार भोल्हु।
तुस ज़ैना बींझ़तथ ते च़िरे तगर आराम केरतथ
ते सैरी बड़ी मेहनत केरतां रोट्टी खातथ, इन सब तुश्शे लेई बेकारे;
किजोकि यहोवा अपने ट्लारन एन्च़रे निड्ल देते।
हेरा, बच्चे यहोवारे तरफां दित्तोरो हिस्सोए,
गर्भेरो फल तैसेरे तरफां फले।
ज़ेन्च़रे बहादरेरे हथ्थे मां तीर,
तेन्च़रे जुवैनरां मट्ठां भोतन।
केत्रो धने तै मैन्हु ज़ैने अपनो तरकश तीरन सेइं भरोरो भोए!
तै नगरेरे फाटके कां अपने दुश्मन्न सेइं गल्लां केरतां शरमिन्दा न भोल्हो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.