Bhadrawahi Bible
भजन संहिता 128
परमेशरेरो डर मन्नेरी बरकत
सफरेरू गीत
केत्रो धने तै मैन्हु ज़ै यहोवारो डर मन्ते,
ते तैसेरे बत्तन पुड़ च़लते!
तू अपनि कमाई पक्की खेइ बटेलो;
तू धन भोल्हो, ते तेरू भलू भोल्हु।
तेरे घरे मां तेरी कौन्श फलदार दाछ़रे बड़हेरी ज़ेरि भोल्ही,
तेरी रोट्टरे मेज़ेरे च़ेवरे पासन तेरे बच्चे ज़ैतूनेरे बुट्टां केरे ज़ेरे भोल्हे।
शुन, ज़ै मैन्हु यहोवारो डर मन्तो भोए,
तैस एरी ज़ेरी बरकत मैल्हेली।
यहोवा तीं सिय्योने मरां बरकत देलो,
ते तू ज़िन्दगी भर यरूशलेमेरू सुख हेरतो रास!
बल्के तू अपने पोट्लड़न-धिहोड़न भी हेरेलो!
इस्राएले शान्ति मैल्हे!
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.