Bhadrawahi Bible
भजन संहिता 110
मसीह राज़ केरनेरे बारे मां एलान
दाऊदेरू भजन
यहोवा मेरे प्रभु सेइं ज़ोवं, “तू मेरे देइने पासे बिश,
ज़ांतगर अवं तेरे दुश्मन तेरे पव्वां केरि चौकी न बनेई।”
तेरे शेक्तरो राज़दण्ड यहोवा सिय्योनेरां भेज़ेलो।
तू अपने दुश्मना केरे दरमियाने मां राज़ केर।
तेरे लोक तेरे शेक्तरे दिहाड़े अपने मेर्ज़री बलि बनतन;
तेरे जुवान लोक पवित्रता सेइं सज़ोरेन,
ते झ़ेझ़ेरे गर्भे सेइं ज़र्मोरी ओशरे ज़ेरे तीं कां आन।
यहोवा कसम खेवरीए, तै न पसतालो,
“तू मलिकिसिदकेरे रीति पुड़ हमेशारो याजक आस।”
प्रभु तेरे देइने पासे भोइतां
अपने क्रोधेरे दिहाड़े राज़न चूर केरेलो।
तै कौमां केरो न्याय केरेलो, ते मैइदान लाशन सेइं भेरोलू;
तै लम्मे चौड़े मुल्खन मां प्रधान्न चूर-चूर केरेलो।
बत्ते च़लते तै दरियाएरू पानी पीलो
ते तैखन तै ज़ींतनेरां बाद एपनी क्रोड़ी उच्चो केरेलो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.