Bhadrawahi Bible
भजन संहिता 109
झूठे इलज़ाम लाने बालां केरे खलाफ बिनती
प्रधान बज़ानेबालेरे लेई दाऊदेरू भजन
हे परमेशर तू, ज़ेसेरी अवं तारीफ़ केरताईं, च़ुप न रा!
किजोकि दुष्ट ते कपटी मैन्हेईं मेरे खलाफ आशी खोलोरूए,
तैना मेरे बारे मां झूठ ज़ोतन
तैना मेरे च़ेवरे पासन नफरतरी गल्लन सेइं साथी आन,
ते बेफैइदे मीं सेइं लड़तन।
मेरे प्यारेरे बदले मां तैना मेरी चोगली केरतन,
पन अवं तैन केरे लेई प्राथना केरताईं।
तैनेईं भलियाई केरनेरे बदले मां मीं सेइं बुराई की
ते मेरे प्यारेरे बदले मीं सेइं बैर कियोरोए।
मेरे दुश्मन ज़ोतन, तू तैस कोन्ची दुष्टेरे अधिकारे मां रख,
ते कोई मुखालफ तैसेरे देइने पासे खड़ो राए।
ज़ैखन तैसेरो न्याय कियो गाए, तैखन तै दोषी निस्से,
ते तैसेरी प्राथना पाप गनी गाए!
तैसेरे दिहाड़े थोड़े भोन,
ते तैसेरी पदवी होरो ने!
तैसेरे बच्चे अनाथ भोइ गान,
ते तैसेरी कौन्श विधवा भोए।
तैसेरे बच्चे दरबदर फिरन हंठन, ते भीख मघन,
तैन अपने उज़ड़ोरे घरे करां दूर गेइतां रोट्टी मगनी पे!
ज़ैस करां तैनी कर्ज़ो आनोरो थियो, तै तैसेरे सैरी माले पुड़ कब्ज़ो केरे,
ते परदेशी तैसेरी कमाई लुटतां नेन।
कोई न भोए कि ज़ै तैस पुड़ महरबानी केरे,
ते तैसेरे अनाथ बच्चन पुड़ कोई तरस न खाए!
तैसेरी औलाद नाश भोइ गाए,
दूइयोवं पीढ़ी मां तैसेरू नवं मिटी गाए!
तैसेरे सियांनां केरो अधर्म यहोवा याद राए,
ते तैसेरी अम्मरो पाप न मिटे!
तैन केरो पाप लगातार यहोवारे सामने राए,
तैन केरू नवं ज़मीनी पुड़ेरां मिटेई दे।
किजोकि तै दुष्ट दया केरनी बिसरी जेव
बल्के गरीबन ते ज़रूरतमन्दन सतातो थियो
ते मनेरी इच्छाई सेइं दुखी मने बालन पत्ती पेवरो थियो।
तै लानत देने सेइं प्यार केरतो थियो, ते लानत तैस पुड़ आई;
तै आशिर्वाद देने सेइं खुशी न थियो,
एल्हेरेलेइ आशिर्वाद तैस करां दूर राव।
तै लानत देनी लिगड़ेरो ज़ेरो लातो थियो,
ते तै तैसेरे पेटे मां पैनेरे ज़ेरे
ते तैसेरी हेड्डन मां तेलेरे ज़ेरे समेई जेव।
तै कपड़ेरी ज़ेरि तैन सेइं पिलैटोरी राए,
पटकेरी ज़ेरि तैन केरे लख्खे सेइं पिलैट्टोरी राए।
यहोवारे तरफां मेरे खलाफत केरनेबालन,
ते मेरे खलाफ बुरू ज़ोनेबालन ई बदलो मैल्हे!
पन हे यहोवा प्रभु, तू अपने नंव्वेरे खातर मीं सेइं बर्ताव केर;
तेरी दया बड़ीए, एल्हेरेलेइ तू मीं छुटकारो दे।
किजोकि अवं गरीब ते ज़रूरतमन्द आईं,
ते मेरो दिल बड़ो ज़खमी भोवरोए।
अवं ड्लवझ़री छावरो ज़ेरो खतम भोनेबालो आईं;
अवं टिट्टां केरो ज़ेरो उडारो जेवरोईं।
बरत रखते-रखते मेरां ज़ैंधू थरकने लगोरन;
ते मीं मां चर्भी न राने सेइं अवं शुक्की जेवरोईं।
मेरी त तैन लोकन सेइं बदनामी भोतीए;
ज़ैखन तैना मीं हेरतन, तैखन क्रोड़ी हिलातन।
हे मेरे परमेशर यहोवा, मेरी मद्दत केर!
अपने प्यारेरे मुताबिक मेरी मद्दत केर।
ज़ैस सेइं मेरे दुश्मन्न पतो लग्गे कि इन तेरू कम्मे,
ते हे यहोवा, तींए इन कियोरूए!
तैना मीं लानत देते त राए, पन तू मीं बरकत देइयां,
ते तैना हमलो केरनेरे लेई खड़े भोते शरमिन्दा भोन, पन तेरो दास खुश भोए।
मेरे मुखालफन बेइज़्ज़तरां लिगड़ां लुवां गान,
ते तैना एपनी बेज़ती कम्बलेरी ज़ेरि पिलैट्टन।
अवं यहोवारू बड़ू शुक्र केरेलो,
ते बड़े लोकन मां तैसेरी तारीफ़ केरेलो।
किजोकि यहोवा गरीबेरे देइने पासे खड़ो रालो,
ताके तैस मौतरी सज़ाह देनेबालन करां बच़ाए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.