Bhadrawahi Bible
भजन संहिता 111
परमेशर सच़्च़ो ते न्याय केरनेबालोए एल्हेरेलेइ तारीफ़रू गीत
यहोवारी तारीफ़ केरा।1 अवं सिद्धे लोकां केरे टोली मां
ते मेण्डली मां पूरे मने सेइं यहोवारू शुक्र केरेलो।
यहोवारां कम्मां बड़ां महान आन,
ज़ेत्रे तैस सेइं खुश भोतन, तैना तैन पुड़ ध्यान केरतन।
तैसेरां सब कम्मां शानदार ते महिमा बालन,
ते तैसेरो धर्म सदा तगर बनोरो रालो।
तैनी अपने चमत्कार याद कराए,
यहोवा अनुग्रह केरनेबालो ते दया केरनेबालोए।
ज़ैना तैसेरो डर मनतन तैन्न तैनी खाने जो दित्तोरिए,
तै हमेशा तगर अपनो करार याद रखेलो।
तैनी अपने लोकन कौमां-कौमां केरो हिस्सो देनेरे लेई,
अपने कम्मां केरि शक्ति हिरेवरीए।
सच़्च़ाई ते न्याय तैसेरे हथ्थां केरां कम्मन;
तैसेरे सारे हुक्म भरोसेरे काबलन,
तैसेरे शब्द हमेशा-हमेशा अटल राले,
तैना सच़्च़ाई ते सिद्धाई सेइं कियोरन।
तैनी अपने लोकन छुटकारो दित्तोरोए;
तैने अपनो करार हमेशारे लेई रखोरोए।
तैसेरू नवं पवित्र ते डरेरे काबले।2
अक्लरी शुरुआत यहोवारो डरे;
ज़ेत्रे तैसेरे हुक्म मनतन,
तैन केरि समझ़ रोड़ी भोतीए।
तैसेरी तारीफ़ सदा बनोरी राली।
Source notes (2)
- Footnote तारीफ़ केरा हल्लिलूय्याह
- Cross-reference लूक. 1:49,68.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.