Bhadrawahi Bible
कहावतां 4
अक्लरे फैइदे
हे मेरे मट्ठव, बाजी केरि शिक्षा शुना,
ते समझ़ हासिल केरने मां मन लाथ।
किजोकि मीं तुसन रोड़ी शिक्षा दित्तोरीए;
मेरी शिक्षा न शारा।
हेरा, अवं भी अपने बाजी केरू मट्ठू थियूं,
ते अम्मरू अक्के लाडोलू थियूं,
ते मेरो बाजी मीं इन ज़ोइतां शिखालतो थियो,
“तेरो मन मेरी गल्लन पुड़ लगोरो राए;
तू मेरे हुक्मन मन्न, तैखन ज़ींतो रालो।
अक्ल हासिल केर, समझ़ भी हासिल केर;
तैन बिसरां न, ते मेरी गल्लां न शैरां।
अक्ल न शार ते तै तेरी हिफाज़त केरेली;
तैस सेइं प्यार रख ते तै तेरो पहरो देली।
अक्ल उच्चीए एल्हेरेलेइ तैस हासिल केरनेरे लेई कोशिश केर;
अपनु सब किछ खर्च़ केर ताके ज़ैन किछ तीं मैल्हे तैस मां समझ़ हासिल केरि सकस।
तैसेरी बडीयाई केर, तै तीं बधाली;
ज़ैखन तू तैस सेइं लिपटस, तैखन तै तेरी आदर केरेली।
तै तेरे दोग्गे पुड़ शोभारो साफो;
ते तीं खूबसूरत ताज देली।”
हे मेरे मट्ठा, मेरी गल्लां शुन्तां कबूल केर,
तैखन तू बड़े सालन तगर ज़ींतो रालो।
मीं तीं अक्लरी बत ज़ोवरीए;
ते सच़्च़ेरे बत्ती पुड़ च़लावरोस।
ज़ैस मां च़लने पुड़ तीं रोक टोक न भोल्ही,
ते चाहे तू दौड़स, फिर भी ठोकर न खालो।
शिक्षाई ट्लेइतां रख, तैस न शार;
तैसेरी हिफाज़त केर, किजोकि तैए तेरी ज़िन्दगीए।
दुष्टां केरि बत्ती मां पव न रख,
ते न बुरे लोकां केरे बत्ती पुड़ च़लनू।
तैस शार, तैसेरे नेड़े भी न च़ल,
तैसेरे नेड़ेरां मुड़तां अग्रोवं च़लो गा।
किजोकि दुष्ट लोक अगर बुराई न केरन, त तैन्न निड्ल न एज्जे;
ते ज़ांतगर तैना कोन्ची ठोकर न खुवान, तांतगर तैन्न निड्ल न एज्जे।
किजोकि तैना दुष्टेरी रोट्टी खातन,
ते फसादेरो दाछ़रो रस पीतन।
पन धर्मी लोकां केरि चाल, झ़ेझ़ेरे लौअरी ज़ेरिए,
ज़ेसेरी चमक दुपहरन तगर बद्धती गाचे।
दुष्टां केरि बत गुप आंधरू भोते;
तैना न ज़ानन कि तैना कोस सेइं ठोकर खातन।
हे मेरे मट्ठा मेरे वचन ध्याने सेइं शुन,
ते अपनो कन मेरी गल्लन पुड़ ला।
इन्न एपनी एछ़्छ़न करां दूर न भोने दे;
बल्के अपने मने मां बसा।
किजोकि ज़ैन्न तैना हासिल भोतिन, तैना तैन केरे ज़ींते रानेरे,
ते तैन केरे सैरी जानी सझ़र रानेरी वजा भोतिन।
सेभना करां जादे अपने मनेरी हिफाज़त केर;
किजोकि ज़िन्दगरो असली ज़िरियो तैए आहे।
टारी गल अपने ऐशी सेइं न ज़ो,
ते चालबाज़ी गल्लां ज़ोनी तीं करां दूर रान।
तेरी एछ़्छ़ी सामनेरे पासे लगोरी रान,
ते तेरां पुनठां अग्रोवं जो खुल्ला रान।
अपने पव रखनेरे लेई बत सिद्धी केर,
तैखन तेरी सब बत्तां ठीक रहेली।
न त देइने पासे मुड़नू, ते न बांए पासे;
अपने पव्वन बुरैइारे बत्ती पुड़ च़लने करां हटा।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.