Bhadrawahi Bible
यहोशू 9
गिबोनी लोकां केरो इस्राएली लोकन धोखो
एन गल्लां केरे बारे मां शुन्तां हित्ती, एमोरी, कनानी, ते परिज्जी, हिब्बी, यबूसी ज़ेत्रे राज़े यरदन दरियाएरे पार इस पहाड़ी मुल्खे मां ते बुन्हीं मुल्खे मां ते लबानोने तगर भूमध्य-सागरेरे पासेरे सारे इलाकन मां राज़ केरते थिये। तैना अक मन भोइतां यहोशूए ते इस्राएली सिपेहिन सेइं लड़नेरे लेई अकोट्ठे भोए।
ज़ैखन गिबोन नगरेरे रानेबालेईं एन शुनू कि यहोशूए यरीहो ते आई नगरां केरे रानेबालन सेइं कुन-कुन कियोरूए। तैखन तैनेईं इस्राएली लोकन धोखो देनेरो फैसलो कियो, तैनेईं राज दूतां केरू रूप बनेइतां अपने गधन पुड़ पुराने बोरे ते पुराने ज़ोड़ोरे दाछ़रो रस लेदतां अपने पव्वन मां पुरैनी टलोई लेगोरी जुट्टी, ते पुरानां लिगड़ां लेइतां ते अपने खानेरे लेई शुकोरी भुओ लेगोरी रोट्टी साथी नी। तैखन तैना गिलगाल नगरेरे डेरन मां यहोशूए सेइं ते इस्राएली लोकन सेइं ज़ोने लगे, “अस दूर मुल्खेरां एवरेम; एल्हेरेलेइ हुनी तुस असन सेइं करार केरा।” इस्राएली लोकेईं तैन हिब्बी लोकन सेइं ज़ोवं, “कुन पतो तुस इश्शे दरमियाने मां रहते भोथ; फिरी असां तुसन सेइं करार केन्च़रे केरम?” हिब्बी लोकेईं यहोशूए सेइं ज़ोवं, “असां तेरे दास अहम।” तैखन यहोशूए तैन पुछ़ू, “तुस कौन आथ? ते कोट्ठां एवरेथ?” गिबोनी लोकेईं तैस जुवाब दित्तो, “तेरे दास बड़े दूरेरां तेरे परमेशर यहोवारू नवं शुन्तां एवरेम; किजोकि असेईं एन सब शुनेरूए, मतलब, ज़ैन किछ तैनी मिस्र मुल्खे मां कियोरूए। ते ज़ैन किछ तैनी एमोरी लोकां केरे दूईये राज़न सेइं कियूं ज़ैना यरदन दरियारे पार रहते थिये, मतलब, हेशबोन1 मुल्खेरे राज़े सीहोने सेइं, ते बाशान मुल्खेरे राज़े ओगे सेइं ज़ै अश्तारोत नगरे मां थियो। एल्हेरेलेइ इश्शे इठेरे बुज़ुर्ग लोकेईं ते इश्शे मुल्खेरे सेभी रानेबालेईं असन सेइं ज़ोवं, कि बत्तरे लेई एप्पु कां साथी रोट्टी नेथ, ते तैन सेइं मिलने गाथ, ते तैन सेइं ज़ोइयथ, कि असां तुश्शे दासम; एल्हेरेलेइ हुनी तुस असन सेइं करार केरा। ज़ैस दिहाड़े अस तुसन सेइं मिलनेरे लेई निस्से, तैस दिहाड़े त असेईं अपने-अपने घरेरां ई रोट्टी सज़री ते गर्म आनोरी थी; पन हुनी हेरा, ऐह शुक्की जेई ते एसमां बूओ लगोरोए। फिरी इना ज़ैना दाछ़रे रस्सेरी कुप्पी असेईं भेरोरी थी, तैखन त नंव्वी थी, पन हुनी हेरा एना फेटी जेवरिन; ते इश्शां इना लिगड़ां ते पव्वां केरि जुट्टी लम्मू सफर केरतां पुरैनी भोइ जेवरिन।” तैखन तैन इस्राएली लोकेईं यहोवा करां बगैर सलाह नेइतां गिबोनी लोकां केरि रोट्टी मरां किछ खेइ छ़डी। तैखन यहोशूए तैन सेइं मेल मिलाप केरतां तैन सेइं करार कियो, कि तुसन ज़ींते छ़डमेले; ते इस्राएली प्रधानेईं भी तैन सेइं कसम खाई।
ते गिबोनी लोकन सेइं करार केरनेरे ट्लेइयोवं दिहाड़े इस्राएली लोकन ऐह खबर मैल्ही कि तैना इश्शे पड़ोसेरे रानेबालेन, ते इश्शे दरमियाने मां बस्सोरेन। तैखन इस्राएली लोक तैस ठारी जो च़ले ज़ैड़ी गिबोनी लोक रहते थिये। ते ट्लाई दिहाड़न मां इस्राएली गिबोनी लोकां केरे नगरन मां पुज़्ज़ी जे, ज़ैन केरां नंव्वां गिबोन, कपीरा, बेरोत, ते किर्यत्यारीम आहे। पन इस्राएली लोकेईं तैना न मारे, किजोकि इस्राएली लोकां केरे प्रधानेईं तैन सेइं साथी इस्राएलेरे परमेशर यहोवारी कसम खेवरी थी। तैखन सारे इस्राएली लोक प्रधानां केरे खलाफ कुड़कुड़ाने लगे। तैखन सारे प्रधानेईं सैरी इस्राएली लोकन सेइं ज़ोवं, “असेईं तैन सेइं इस्राएलेरे परमेशर यहोवारी कसम खेवरीए, एल्हेरेलेइ हुनी अस तैन केरो नुकसान न केरि सकम। अस तैन सेइं इन्ने केरमेले, कि अस तैस कसमरे मुताबिक तैन ज़ींते छ़डमेले, नईं त इश्शी खेवरी कसम ट्लोड़नेरे वजाई सेइं असन पुड़ यहोवारो क्रोध भड़केलो।” फिरी प्रधानेईं तैन सेइं ज़ोवं, “तैना ज़ींते छ़डे गान।” इना इश्शे गुलाम भोल्हे। तैना इस्राएली लोकां केरे लेई कैड़ु घिराले ते इश्शे सेभी केरे लेई पानी आनेले।
फिरी यहोशूए गिबोनी प्रधान्न कुजेइतां पुछ़ू, “तुस त असने मां रातथ, फिरी तुसेईं असन सेइं एन ज़ोइतां धोखो किजो कियो, कुन असां तुसन करां दूर रहतम? एल्हेरेलेइ हुनी तुस यहोवारे तरफां लानती भोवरेथ, ते तुसन मां एरहो कोई न रालो ज़ै दास, मतलब मेरे परमेशरेरे भवनेरे लेई कैड़ु घराने बालो ते पानी भरने बालो न भोल्हो।” गिबोनी लोकेईं यहोशू जुवाब दित्तो, “तेरे दासन एन सच़्च़े ज़ोवरू थियूं, कि तेरे परमेशर यहोवाए अपने दास मूसे सेइं ज़ोवरू थियूं, कि ई सारो मुल्ख तुसन दे, ते तैसेरे सारे रानेबालन तुश्शे सामनेरां पूरे तरीके सेइं नाश केरे; एल्हेरेलेइ असन लोकन तुश्शी वजाई सेइं अपने प्राणा केरे लाले पेई जे एल्हेरेलेइ असेईं एन कम कियूं। ते हुनी असां तेरे हथ्थे मां अहम, ज़ेरो बर्ताव तीं रोड़ो ते भलो लग्गे, तेरहो बर्ताव असन सेइं केर।” तैखन यहोशूए गिबोनी लोकन सेइं तेन्च़रे कियूं, ते तैना इस्राएली लोकां केरे हथ्थेरां एन्च़रे बच़ाए, कि तैना तैन पुड़ घात न केरि बटन। पन यहोशूए तैस्से दिहाड़े तैना इस्राएली लोकां केरे लेई ते ज़ै ठार यहोवारे लेई च़ुनी तैस मां तैसेरी वेदी बनानेरे लेई कैड़ु घराने बाले ते पानी घराने बाले ठहराए, ज़ैना अज़ तगर भी आन।
Source notes (1)
- Footnote हेशबोन सीहोन राज़ेरे राजधानी, गिन. 21:27
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.