Bhadrawahi Bible
यहोशू 10
दिहाड़ो ते चाँदनी रोकनी
तैस वक्ते यरूशलेम नगरेरे राज़े अदोनीसेदेके1 एन शुनू कि यहोशूए आई नगर अपने कब्ज़े मां कियोरूए, ते तैसेरो सत्यानाश कियो, ते ज़ेन्च़रे तैनी यरीहो नगर ते तैसेरे राज़े सेइं कियोरू थियूं, तेन्च़रे तैनी आई नगर ते तैसेरे राज़े सेइं भी कियोरूए, ते एन भी शुनू कि गिबोनेरे रानेबालेईं इस्राएली लोकन सेइं मिलाप कियोरोए, ते तैन मां राने लगोरेन। तैखन राज़ो ते तैसेरे लोक बड़े डेरि जे, किजोकि गिबोन बड्डू नगर बल्के राज़ नगरे बराबर ते आई नगरे करां बड्डू नगर थियूं, ते तैसेरे सारे रानेबाले बहादर सिपाही थिये। एल्हेरेलेइ यरूशलेमेरे राज़े अदोनीसेदेके हेब्रोनेरे राज़े होहाम, यर्मूतेरे राज़े पिराम, लाकीशेरे राज़े यापी, ते एग्लोनेरे राज़े दबीरे कां ई बिस्तार भेज़ो, “मीं कां एइतां मेरी मद्दत केरा, ते च़ला अस गिबोन नगरे पुड़ हमलो केरम; किजोकि तैनी यहोशू ते इस्राएली लोकन सेइं मेल मिलाप कियोरोए।” एल्हेरेलेइ यरूशलेम, हेब्रोन, यर्मूत, लाकीश, ते एग्लोनेरे पंच़े एमोरी राज़ेईं अपनि-अपनि सारी सेना अकोट्ठी केरतां चढ़ाई की, ते गिबोनेरे सामने डेरे लेइतां तैस सेइं जंग शुरू की।
तांतगर गिबोनेरे रानेबालेईं गिलगालेरे डेरन मां यहोशू कां ऐह समाद भेज़ो, “अपने दासां केरि तरफां तू अपनो हथ पत्रोवं न केरां; लूशी असन कां एइतां असन बच़ा, ते इश्शी मद्दत केर; किजोकि पहाड़ी इलाके पुड़ रानेबाले एमोरी लोकां केरे सारे राज़े इश्शे खलाफ अकोट्ठे भेवरेन।” तैखन यहोशू अपने सारे सिपाही ते अपने सारे शूरबीर साथी नेइतां गिलगाल नगरे मरां च़लो जेव। ते यहोवाए यहोशू सेइं ज़ोवं, “तैन करां न डर, किजोकि मीं तैना तेरे हथ्थे मां दित्तोरेन; तैन मरां अक सिपाही भी तेरे सामने टिकी न सकेलो।” तैखन यहोशू ते इस्राएली सेना रातो-रात गिलगाल नगरे मरां गेइतां अचानक एमोरी सेनाई पुड़ हमलो कियो। तैखन यहोवाए एरू कियूं कि एमोरी सेना इस्राएली सेना करां घेमरोई जेई, ते इस्राएली लोकेईं गिबोन नगरे कां तैन केरो बड़ो मुकाबलो कियो, ते बेथोरोन नगरेरे चड़ैई पुड़ तैन केरो पीछो केरतां अजेका नगरे करां लेइतां मक्केदा नगरे तगर तैन मारते जे। फिरी ज़ैखन एमोरी सेना इस्राएली लोकां केरे सामनेरां नेशतां बेथोरोनेरी उतरैई पुड़ अई, तैखन अजेका नगरे कां पुज़ने तगर यहोवा अम्बरेरां बड़ी-बड़ी आण तैन पुड़ बरसाई, ते तैना मेरि जे; ते ज़ैना आणी सेइं मेरि जे तैन केरि गिनती इस्राएली केरि तलवारी सेइं मारोरेन करां जादे थी।
तैस मौके, मतलब ज़ैस दिहाड़े यहोवा एमोरी लोक इस्राएली लोकां केरे कब्ज़े मां किये, तैस दिहाड़े यहोशूए यहोवा कां इस्राएली लोकां केरे हेरते एन्च़रां सेइं प्राथना की,
“हे दिहाड़ां, तू गिबोने पुड़, ते हे चाँदनी अय्यालोन वैदी पुड़ रुकोरी रह।”2
ते दिहाड़ो तैस मौके तगर रुकोरो राव;
ते चाँदनी तैस मौके तगर रुकोरी राई,
ज़ांतगर तैस कौमरे लोकेईं अपने दुश्मन्न करां बदलो न नियो।
कुन ऐह गल याशार नंव्वेरी किताबी मां नईं लिखोरी कि दिहाड़ो अम्बरेरे मझ़ाटे टिकोरो राव, ते पूरे दिहैड़ी3 न डुब्बो? न त तैस करां पेइले कोई एरी दिहाड़ी भोइ ते न तैसेरां बाद, ज़ैस मां यहोवाए कोन्ची मैन्हेरी शुनोरी भोए; किजोकि यहोवा त इस्राएलेरी तरफां लड़तो थियो।
इसेरे बाद यहोशू सारे इस्राएली सेनाई सने गिलगालेरे डेरन मां वापस जेव।
एमोरी लोकां केरे पंच़ राज़े कब्ज़े मां केरने
लड़ाई केरनेरे दौरान इना पंच़े राज़े नेशतां मक्केदा नगरेरे नेड़े एक्की कुढी मां छ़पोरे थिये। तैखन कोन्चे यहोशू ई खबर दित्ती, “कि पंच़े राज़े मक्केदा नगरेरे नेड़े एक्की कुढी मां छ़पोरे असन मैल्हे।” यहोशूए ज़ोवं, “कुढी अग्गर बडे-बडे घोड़ रेखतां तैन केरो पहरो देनेरे लेई किछ सिपाही रखा। पन तुस न रुकथ, अपने दुश्मना केरो पीछो केरतां तैन मरां ज़ै-ज़ै पत्रोवं राहोरोए तैस मैरी छ़डा, तैन अपने-अपने नगरन मां दाखल भोनेरो मौको न देइयथ; किजोकि तुश्शे परमेशर यहोवाए तैना तुश्शे हथ्थे मां कियोरेन।” ज़ैखन यहोशू ते इस्राएली सेना तैन केरो मुकाबलो केरतां तैना नाश किये, ते तैन मरां ज़ैना बेंच़ी जे तैना अपने-अपने क़िले बाले नगरन मां गेइतां छ़ेप्पी जे, तैखन सारे इस्राएली सिपाही मक्केदा नगरेरे डेरन मां यहोशू कां सुखे सेइं वापस आए; ते इस्राएली लोकां केरे खलाफ केन्चे ज़िभ तगर न हिलेइ बटी।
तैखन यहोशूए अपने सिपेहिन हुक्म दित्तो, “कुढरे दारे पुड़ेरां घोड़ खड़ो केरतां तैना पंच़े राज़े मीं कां केढतां आनां।” त सिपैहेईं एरू कियूं, ते यरूशलेम, हेब्रोन, यर्मूत, लाकीश, ते एग्लोनेरे तैना पंच़े राज़े कुढी मरां केढतां तैस कां आने। ज़ैखन तैना राज़े यहोशू कां केढतां आने, तैखन यहोशूए इस्राएली लोकां केरे सारे सिपाही कुजेइतां एप्पु सेइं साथी च़लनेबाले सिपेही केरे प्रधान्न सेइं ज़ोवं, “नेड़े एइतां अपने-अपने पव एन राज़ां केरे मेट्टन पुड़ रखा” ते तैनेईं नेड़े गेइतां अपने-अपने पव एन राज़ां केरे मेट्टन पुड़ रख्खे। तैखन यहोशूए सेनारे प्रधान्न सेइं ज़ोवं, “डरां न, ते न तुश्शो मन घबराए; हिम्मत रेखतां मज़बूत भोथ; किजोकि यहोवा तुश्शे सारे दुश्मन्न सेइं ज़ैन सेइं तुस लड़ने बालेथ एरू केरेलो।” तैसेरां बाद यहोशू पंच़े राज़े मारेई छ़डे, ते पंच़ बुट्टन पुड़ तैन केरि लाशां टेंगी। ते तैना ड्लवझ़ी तगर तैन बुट्टन पुड़ टंगोरी रेही। दिहाड़ो डुबते-डुबते यहोशूएरे हुक्मेरे मुताबिक सिपैहेईं तैन राज़ां केरि लाशां बुट्टन पुड़ेरां ओसैलतां तैस्से कुढी मां ज़ैड़ी तैना छ़पोरे थिये छ़ेडी, ते तैस कुढी पुड़ बडे-बडे घोड़ रख्खे, तैना अज़ तगर तैड़ी रखोरेन।
तैस्से दिहाड़े यहोशू ते इस्राएली लोकेईं मक्केदा नगर हाराव; तैनेईं राज़ो ते इस नगरेरे लोक मैरी छ़डे। ते तै तलवारी सेइं मारो, ते तैसेरे राज़ेरो सत्यानाश कियो; ते ज़ेत्रे प्राणी तैस मां थिये तैन मरां कोई भी ज़ींतो न छ़डो; ते ज़ेरू तैनी यरीहो नगरेरे राज़े सेइं कियोरू थियूं तेरहु तैनी मक्केदा नगरेरे राज़े सेइं भी कियूं।
तैखन यहोशू सारे इस्राएली लोकन सने मक्केदा नगरेरां च़ेलतां लिब्ना नगरे जो जेव, ते लिब्ना नगरे सेइं लड़ो। ते यहोवा लिब्ना नगरेरे राज़े समेत इस्राएली लोकां केरे हथ्थे मां कियो; ते यहोशूए तैना ते तैस मां सारे जानबर भी तलवारी सेइं मारे; ते तैस मरां कोई भी ज़ींतो न छ़डो; ते तैसेरे राज़े सेइं तेरहु कियूं ज़ेरू तैनी यरीहो नगरेरे राज़े सेइं कियोरू थियूं।
फिरी यहोशू सारे इस्राएली लोकन समेत लिब्ना नगरेरां च़ेलतां लाकीश नगरे जो जेव, ते तैसेरे खलाफ डेरे लेइतां लड़ो; ते यहोवा लाकीश नगर भी इस्राएली केरे हथ्थे मां कियूं; ते दूइयोवं दिहाड़े तैनी तै भी ज़ींती छ़डो; ते ज़ेन्च़रे तैनी लिब्ना नगरेरे सारे जानबर ते लोक तलवारी सेइं मारोरे थिये, तेन्च़रे तैनी लाकीश नगरे सेइं भी कियूं।
तैखन गेजेर नगरेरो राज़ो होराम लाकीश नगरेरी मद्दत केरनेरे लेई च़ेढ़ी अव; पन यहोशूए तै ते तैसेरे सिपाही मारे, ते कोई भी ज़ींतो न छ़डो।
फिरी यहोशू सारे इस्राएली लोकन समेत लाकीश नगरेरां च़ेलतां एग्लोन नगरे जो जेव; ते तैसेरे खलाफ डेरे लेइतां लड़ाई केरने लगो; ते तैस्से दिहाड़े तैनेईं तै भी अपने कब्ज़े मां कियो, ते तै भी तलवारी सेइं मारो; ते तैस्से दिहाड़े ज़ेन्च़रे तैनी लाकीश नगरेरे सारे जानबर ते लोकां केरो सत्यानाश केरतां छ़डोरो थियो तेन्च़रे तैनी एग्लोन नगरेरो भी सत्यानाश कियो।
फिरी यहोशू सारे इस्राएली लोकन समेत एग्लोन नगरेरां च़ेलतां हेब्रोन नगरे जो जेव, ते तैस सेइं लड़ने लगो; ते तैनेईं तैन नगर हाराव, ते तैनेईं इस नगरेरो राज़ो ते लोक तलवारी सेइं मारे; ते ज़ेरू यहोशूए एग्लोन नगरे सेइं कियोरू थियूं तेरहु तैनी हेब्रोन नगरे सेइं भी कियूं ते कोई ज़ींतो न छ़डो; तैनी तैस मां सारे जानबरां ते लोकां केरो सत्यानाश केरतां छ़डो।
तैखन यहोशू सारे इस्राएली लोकन समेत च़ेलतां दबीर नगरे जो जेव, ते तैस नगरे पुड़ हमलो कियो; ते राज़े समेत तै ते तैसेरां सारे ड्लाव्वां भी अपने कब्ज़े मां कियां; ते तैनेईं तैट्ठेरे लोक तलवारी सेइं मारे, ते ज़ेत्रे जानबर ते लोक तैस मां थिये सैरी केरो सत्यानाश केरतां छ़डो; कोई भी ज़ींतो न छ़डो, ज़ेरू यहोशूए हेब्रोन नगर ते लिब्ना नगर ते तैसेरे राज़े सेइं कियोरू थियूं तेरहु तैनी दबीरा नगरे ते तैसेरे राज़े सेइं भी कियूं।
एन्च़रां सेइं यहोशू ते सारे सिपैहेईं तै सारो मुल्ख, मतलब पहाड़ी मुल्ख, दक्षिण मुल्ख, बुनियों मुल्ख, ते ढलानेरो मुल्ख भी, तैन केरे सारे राज़न समेत मारे; ते इस्राएलेरे परमेशर यहोवारे हुक्मेरे मुताबिक कोई भी ज़ींतो न छ़डो, बल्के ज़ेत्रे जानबर ते लोक थिये सेभी केरो सत्यानाश कियो। ते यहोशूए कादेशबर्ने नगरे करां गाज़ा नगरे तगर, ते गिबोन नगरे तगर सारे गोशेन नगरेरे लोक मारे। इना सब राज़े ते तैन केरे इलाकन समेत यहोशू ते तैसेरी सेना एक्की वक्ते मां हाराए, किजोकि इस्राएली लोकां केरो परमेशर यहोवा इस्राएली लोकां केरि तरफां लड़तो थियो। इसेरां बाद यहोशू सारे इस्राएली सिपेहिन समेत गिलगालेरे डेरन मां वापस अव।
Source notes (3)
- Footnote अदोनीसेदेके इब्रानी मां इसेरो मतलबे, “मेरो मालिक धर्मीए।”
- Footnote इना लगभग पुराने ज़मानेरां जंगरां गीतन ज़ैना यशारेरे लिखोरन, 2 शमू. 1:18
- Footnote पूरे दिहैड़ी इड़ी एक्की दिहाड़ेरो मतलब 12 घंटे न कि 24 घंटे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.