Bhadrawahi Bible
यहोशू 11
इस्राएली लोक कनानेरे उत्तरेरो हिस्सो ज़ींत्तन
इस्राएली सेनारी ज़ींतनेरी खबर शुन्तां हासोर नगरेरो राज़ो याबीन, मादोन नगरेरो राज़ो योबाब, ते शिम्रोन नगर ते अक्षापत नगरेरे राज़न, ते ज़ैना-ज़ैना राज़े उतरेरे पासे पहाड़ी मुल्खे मां, ते किन्नेरेतेरे दक्षिणे अराबा मां ते बुनीयें मुल्खे मां ते पश्चिमेरे पासे दोर नगरेरे उच्चे मुल्खे मां रहते थिये, तैन्न, ते पूरब पश्चिम दूईये पासन रानेबाले कनानी, एमोरी, हित्ती, परिज्जी लोकन, ते पहाड़ी यबूसी लोकन, ते मिस्पा मैइदाने मां हेर्मोन पहाड़ेरे बुन रानेबाले हिब्बी लोकन जो समाद भेज़ो। ते तैना राज़े अपनि-अपनि सेना समेत मिलतां निस्से, ज़ेसेरी तैदाद समुन्दरेरी रेतरे बराबर थी, ते तैन सेइं साथी बड़े घोड़े ते रथ थिये। तैखन तैना सब राज़े सलाह केरतां अपनि सेना घिन्तां अकोट्ठे भोए, ते इस्राएली लोकन सेइं लड़नेरे लेई मेरोम नंव्वेरे पैनी कां एइतां अकोट्ठे भोइतां डेरे लाए।
तैखन यहोवाए यहोशू सेइं ज़ोवं, “तैन करां न डेरां, किजोकि कालां इस्से मौके अवं तैन इस्राएली लोकां केरे कब्ज़े मां केरतां मारेइलो, तैखन तू तैन केरे घोड़ां केरे ज़ैधू केरि नसां कटेइयां, ते तैन केरां रथां फुक्की छ़ेडां।” ते यहोशूए अपनि सब सेना साथी नेइतां मेरोम नंव्वेरे पैनी पुड़ अचानक तैन पुड़ हमलो कियो। ते यहोवाए तैना सब इस्राएली लोकां केरे हथ्थे मां किये, एल्हेरेलेइ तैनेईं तैना मारे, ते बड्डे नगर सीदोन ते मिस्रपोतमैमे तगर, ते पूर्वेरे मिस्पे नगरेरे मैइदाने तगर तैन केरो पीछो कियो; ते तैना मारे, ते तैन मरां कोई ज़ींतो न छ़डो। तैखन यहोशूए यहोवारे हुक्मेरे मुताबिक तैन सेइं सलूख कियो, मतलब तैन केरे घोड़ां केरे ज़ैधू केरि नसां कटेई, ते तैन केरां रथां अग लेइतां भस्म कियां।
तैस्से मौके यहोशूए घुमतां हासोर नगरे पुड़ भी कब्ज़ो कियो, ज़ैन पेइलू तैन केरू अक खास नगर थियूं, ते तैन केरो राज़ो तलवारी सेइं मारो। ते ज़ेत्रे प्राणी हासोर नगरे मां थिये, तलवारी सेइं मैरतां सत्यानाश किये; ते कोई भी ज़ींतो न छ़डो, ते हासोर नगर यहोशूए अग लेइतां फुक्की छ़डू। ते तैन केरां सब नगरां ते सब राज़न समेत यहोशूए अपने कब्ज़े मां कियां, ते यहोवारे दास मूसेरे हुक्मेरे मुताबिक तैना तलवारी सेइं मैरतां तैन केरो सत्यानाश कियो। पन हासोर नगरेरे अलावा, ज़ैन यहोशूए फुकोरू थियूं, इस्राएली लोकेईं होरू कोई नगर ज़ैन तैन केरे पहैड़ी पुड़ आबाद थियूं, न फुक्कू। ते तैन नगरां केरे जानबर ते तैन केरि सारी लूट-पाट इस्राएली लोकेईं अपनि बनाई; पन मैन्हु तैनेईं तलवारी सेइं मारे, इड़ी तगर तैन केरो सत्यानाश कियो कि तैन मरां अक भी मैन्हु ज़ींतो न छ़डो। ज़ै हुक्म यहोवारे दास मूसे दित्तोरो थियो, तैसेरे मुताबिक मूसे यहोशूए भी दित्तोरो थियो, ते तेन्च़रे यहोशूए भी कियूं, ज़ै-ज़ै हुक्म मूसे दित्तोरो थियो, तैस मरां यहोशूए कोई भी पूरो केरने बगैर न छ़डो।
सारे कनानेरे राज़न समेत ज़ींतू गानू
एन्च़रे सेइं यहोशूए तै सारो मुल्ख, मतलब पहाड़ी मुल्ख, ते सारो दक्षिणी मुल्ख, ते सारो गोशेन मुल्ख, ते बुनियों मुल्ख, अराबा, ते इस्राएलेरो पहाड़ी मुल्ख, ते तैन केरो बुनियों मुल्ख भी, हालाक नंव्वेरे पहाड़े करां लेइतां, ज़ै सेईर एरी चड़ैई पुड़े, बालगाद नगरे तगर, ज़ै लबानोनेरे मैइदाने मां हेर्मोन पहाड़े करां बुन आहे, ज़ेत्रे मुल्खन सब ज़ींती छ़डे, ते तैन मुल्खां केरे सारे राज़े ट्लेइतां मारे। तैन सब राज़न सेइं जंग केरते-केरते यहोशू बड़े दिहाड़े लग्गे। गिबोन नगरेरे रानेबाले हिब्बी लोकां केरे अलावा होरि कोन्ची नगरेरे लोकेईं इस्राएली लोकन सेइं मिलाप न कियो, ते बाकी सारे नगर तैनेईं लेड़तां ज़ींती छ़डे। किजोकि यहोवारी ज़ै मर्ज़ी थी, कि अपने तैस हुक्मेरे मुताबिक ज़ै तैनी मूसे दित्तोरो थियो, तैन पुड़ कोई दया न केरां; बल्के सत्यानाश कियो, एस वजाई सेइं तैनी तैन केरो मन एरहो सखत कियोरो थियो, कि तैनेईं इस्राएली लोकां केरो सामनो केरतां तैन सेइं जंग की।
तैस मौके यहोशू पहाड़ी मुल्खे मां एइतां हेब्रोन नगर, दबीर नगर, अनाब ड्लावं, बल्के यहूदा ते इस्राएल दूईयां केरे पहाड़ी मुल्खे मां रानेबाले अनाकी लोकां1 केरो सत्यानाश कियो, यहोशूए नगरन समेत तैन केरो सत्यानाश कियो। इस्राएली लोकां केरे मुल्खे मां कोई अनाकी न राव, सिर्फ गाज़ा, गत, ते अश्दोद पलिश्ती नगरन मां किछ राए। ज़ेन्च़रे यहोवाए मूसा सेइं ज़ोवरू थियूं, तेन्च़रे यहोशूए तैना सारे मुल्ख अपने कब्ज़े मां किये ते तैना इस्राएली लोकां केरे गोट्लां केरे कुलां केरे मुताबिक बेंटतां तैन दित्ते। ते इस्राएली लोकन मुल्खे मां लड़ैई करां आराम मैल्हो।
Source notes (1)
- Cross-reference अनाकी लोकां गिन. 13:33;व्यव. 2:10-11.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.