Bhadrawahi Bible
यहोशू 12
मूसेरे ज़िरिये राज़न पुड़ ज़ींत
यरदन दरियाए पार पूर्वेरे पासे, मतलब अर्नोनेरे इलाके करां लेइतां हेर्मोनेरे पहाड़े तगर ज़ै मुल्खे, ते सारे पूर्वेरे पासेरे अराबा करां लेइतां ज़ैना राज़े इस्राएली लोकेईं मैरतां तैन केरे सारे मुल्ख अपने कब्ज़े मां कियोरे थिये, तैना इना आन: एमोरी लोकां केरो हेशबोन नगरे मां रानेबालो राज़ो सीहोन, ज़ै अर्नोन वैदरे अरोएर नगरे करां लेइतां, ते तैस्से वैदरे मझ़ाटे नगरेरे अलावा यब्बोक दरियाए तगर, ज़ै अम्मोनी लोकां केरि हद्दे, अध्धे गिलाद इलाके पुड़, ते किन्नेरेत नंव्वेरे झीली करां लेइतां बेत्यशीमोते करां लेइतां अराबारे समुन्दरे तगर, ज़ैस जो खारो समुन्दर भी ज़ोतन, पूरबेरे पासे अराबा, ते दक्षिणेरे पासे पिसगा पहाड़ेरी उतरैई करां बुनीयें मुल्खे पुड़ हुकूमत केरतो थियो। फिरी बच़ोरे रपाई लोकन मरां बाशान नगरेरो राज़ो ओगेरो मुल्ख थियो ज़ै अश्तारोत नगर ते एद्रेई नगरे मां रहतो थियो, ते हेर्मोन पहाड़ सल्का नगर, ते गशूरी लोकेईं ते माकी लोकां केरे सरहद्दी तगर सारे बाशान नगरे मां, ते हेशबोनेरे राज़े सीहोनेरे सरहद्दी तगर अध्धे गिलाद नगरे मां भी हुकूमत केरतो थियो। इस्राएली लोकेईं ते यहोवारे सेवक मूसे तैना मारे; ते यहोवारे दास मूसे तैन केरो मुल्ख रूबेनी लोकन ते गादी लोकन ते मनश्शेरे अध्धे गोट्लेरे लोकन दित्तो।1
यहोशूएरे ज़िरिये राज़न पुड़ ज़ींत
यरदन दरियारे पश्चिमेरे पासे, लबानोनेरे मैइदानेरे बालगाद नगरे करां लेइतां सेईरेरी चड़ैई करां हालाक पहाड़े तगर मुल्खेरे ज़ैन राज़े यहोशूए ते इस्राएली लोकेईं मैरतां तैन केरे मुल्ख इस्राएली लोकां केरे गोट्लां ते कुलां केरे मुताबिक हिस्सो केरतां दित्तोरो थियो, तैना इना आन: हित्ती, एमोरी, कनानी, परिज्जी, हिब्बी ते यबूसी, ज़ैना पहाड़ी मुल्खे मां, ते बुनीयें मुल्खे, ते अराबा मां, ते वैदरे मुल्खे मां ते सुनसान ठैरी मां, ते दक्षिणी मुल्खे मां रहते थिये। ज़ैना राज़े हारे तैना इना आन: यरीहो नगरेरो राज़ो; ते बेतेल नगरेरे पासेरो आई नगरेरो राज़ो; यरूशलेम नगरेरो राज़ो; ते हेब्रोन नगरेरो राज़ो; यर्मूत नगरेरो राज़ो; ते लाकीश नगरेरो राज़ो; एग्लोन नगरेरो राज़ो; ते गेजेर नगरेरो राज़ो; दबीर नगरेरो राज़ो; ते गेदेर नगरेरो राज़ो; होर्मा नगरेरो राज़ो; ते अराद नगरेरो राज़ो; लिब्ना नगरेरो राज़ो; ते अदुल्लाम नगरेरो राज़ो। मक्केदा नगरेरो राज़ो; ते बेतेल नगरेरो राज़ो; तप्पूह नगरेरो राज़ो; ते हेपेर नगरेरो राज़ो; अपेक नगरेरो राज़ो; ते लश्शारोन नगरेरो राज़ो; मादोन नगरेरो राज़ो; ते हासोर नगरेरो राज़ो; शिम्रोन्मरोन नगरेरो राज़ो; ते अक्षाप नगरेरो राज़ो; तानाक नगरेरो राज़ो; ते मगिद्दो नगरेरो राज़ो; केदेश नगरेरो राज़ो; ते कर्मेले मां योकनाम नगरेरो राज़ो। दोर नंव्वेरो उच्चे मुल्खेरो राज़ो; ते गिलगालेरे गोयीमेरो राज़ो। ते तिर्सा नगरेरो राज़ो; एस तरीके सेइं एना सब 31 राज़े भोए।
Source notes (1)
- Cross-reference यहो. 13:8-32.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.