Bhadrawahi Bible
यहोशू 13
कनान मुल्खेरू इस्राएली केरे गोट्ले-गोट्ले मां बेन्टोई गानू
ज़ैखन यहोशू बड़ो बुढो भोवरो थियो; ते यहोवाए तैस सेइं ज़ोवं, “तू बड़ो बुढो भोवरोस, ते हेजू भी बड़ो मुल्ख रेही जेवरोए, ज़ै इस्राएलेरे कब्ज़े मां हुन्ना तगर नईं एवरोए। ज़ैना इलाके रेही जेवरेन ज़ैना हेजू इस्राएली लोकां केरे कब्ज़े मां नईं एवरे, तैना इना आन पलिश्ती लोकां केरे सारे सूबे, ते सारे गशूरी (मिस्र मुल्खे करां अग्गर शीहोरे करां लेइतां उत्तरेरे पासे एक्रोनेरे बन्ने तगर ज़ै कनानी लोकां केरो हिस्सो गनो गाते; ते पलिश्ती लोकां केरे पंच़े नगर, मतलब गाज़ा, अश्दोद, अश्कलोन, गत, ते एक्रोनेरे लोक), ते दक्षिणेरे पासे अव्वी लोक भी, फिरी अपेक ते एमोरी लोकां केरे बन्ने तगर कनानी लोकां केरो सारो प्रदेश ते सीदोनी लोकां केरू मारा नंव्वेरू नगर, फिरी गबाली लोकां केरो प्रदेश, ते पूर्वेरे पासे हेर्मोन पहाड़ेरे बुन बालगाद नगरे करां लेइतां हमातेरी वैदी तगर सारो लबानोन प्रदेश, फिरी लबानोन प्रदेशे करां लेइतां मिस्रपोतमैम नगरे तगर सीदोनी लोकां केरे पहाड़ी प्रदेशेरे रानेबाले। एन अवं इस्राएली लोकां केरे सामनेरां कढेलो; एत्रू भोल्हु कि तू मेरे हुक्मेरे मुताबिक चिट्ठी छ़ेडी-छ़ेडी तैन केरो मुल्ख इस्राएली लोकन बेंटतां देइयां। एल्हेरेलेइ तू इस मुल्खे 9 गोट्लन ते मनश्शेरे अध्धे गोट्ले तैन केरो हिस्सो भोनेरे लेई बेंटतां देइयां।”
रूबेनी लोकन ते गादी लोकन त तै हिस्सो मैल्ही जेवरो थियो, ज़ै मूसे तैन यरदन दरियारे पूर्वेरे पासे दित्तोरो थियो, किजोकि यहोवारे दास मूसे तैन्ने दित्तोरो थियो, मतलब अर्नोन नंव्वेरी वैदरे बन्ने अरोएर नगरे करां लेइतां, तैस वैदरे मझ़ाटेरे नगरेरे अलावा दीबोन नगरे तगर मेदबारे पासे सारो चौरस इलाको; ते अम्मोनी लोकां केरे बन्ने तगर हेशबोन नगरे मां एजने बाले एमोरी लोकां केरे राज़े सीहोनेरे सारे नगर; ते गिलाद प्रदेश, ते गशूरी लोक ते माकावासी लोकां केरि हद, ते सारू हेर्मोन पहाड़, ते सल्का तगर सारो बाशान प्रदेश, फिरी अश्तारोत ते एद्रेई नगरन मां एजने बाले तैस ओगेरी सारी रियासत ज़ै रपाई लोकन मरां अकैल्लो बेंच़ी जेवरो थियो; किजोकि एना मूसे तैन केरे लोक मैरतां तैस प्रदेशे मरां केढी छ़डोरे थिये। पन इस्राएली लोकेईं गशूरी लोक ते माकी लोक तैन केरे प्रदेशे मरां न कढे; एल्हेरेलेइ गशूरी ते माकी लोक इस्राएली लोकां केरे मझ़ाटे अज़ तगर रहतन। ते लेवी केरे गोट्लेरे लोकन मूसे कोई हिस्सो न दित्तो; किजोकि इस्राएलेरे परमेशर यहोवारे वचनेरे मुताबिक तैसेरी च़ढ़तलां तैन केरे लेई हिस्से ठहरेवरे थिये।
मूसे रूबेनेरे गोट्ले तैन केरे कुलां केरे मुताबिक हिस्सो दित्तो, तैन इना इलाके मैल्हे, अर्नोन नंव्वेरी वैदरे बन्नेरे अरोएर नगरे करां लेइतां तैस वैदरे मझ़ाटेरू नगर छ़ेडतां मेदबारे पासेरो सारो चौरस मुल्ख; फिरी चौरस मुल्खेरू हेशबोन नगर ते तैसेरां सारां ड्लाव्वां; फिरी दीबोन नगर, बामोतबाल इलाको, बेतबाल्मोन नगर, यहस नगर, कदेमोत नगर, मेपात नगर, किर्यातैम नगर, सिबमा नगर, ते वैदरे पहाड़े पुड़ बस्सोरू सेरेथश्शहर नगर, बेतपोर नगर, पिसगारी उतराई ते बेत्यशीमोत, मतलब चौरस मुल्खे मां बस्सोरे हेशबोन नगरे मां एजने बाले एमोरी लोकां केरे तैस राज़े सीहोनेरी रियासतरे सारे नगर ज़ैना मूसे मारोरे थिये। मूसे एवी, रेकेम, सूर, हूर, ते रेबा नंव्वेरे मिद्यानेरे प्रधान लोक भी मैरी छ़डोरे थिये ज़ैना सीहोनेरे रखोरे हाकिम ते तैस मुल्खेरे रानेबाले थिये। ते इस्राएली लोकेईं तैन केरे मारोरे लोकन सेइं साथी बोरेरू मट्ठू ज़ैस जो बिलाम ते नबूवत केरनेबालो भी ज़ोते थिये, तलवारी सेइं मारो। ते रूबेनी लोकां केरो इलाको यरदन दरियारे बन्नो भोव। रूबेनी लोकां केरो हिस्सो तैन केरे कुलां केरे मुताबिक नगरन ते ड्लाव्वन समेत ईए भोव।
फिरी मूसे गादेरे गोट्लन भी कुलां केरे मुताबिक तैन केरो अपनो हिस्सो बेंटतां दित्तो। तैखन इन ठहराव, मतलब याजेर नगर वगेरा गिलाद इलाकेरे सारे नगर, ते रब्बाह नगरेरे सामनेरे अरोएर नगरे तगर अम्मोनी लोकां केरो अध्धो प्रदेश, ते हेशबोन नगरे करां रामत-मिस्पे नगरे ते बतोनीम नगरे तगर, ते महनैम नगरे करां दबीर नगरेरे बन्ने तगर। ते वैदी मां बेतहारम नगर, बेतनिम्रा नगर, सुक्कोत नगर, ते सापोन नगर, ते हेशबोन नगरेरे राज़े सीहोनेरी रियासतरे बच़ोरे हिस्से, ते किन्नेरेत नंव्वेरे झीलरे पासे तगर, यरदन दरियारे पूर्वेरे पासे तै मुल्ख ज़ेसेरो बन्नो यरदन दरियाए। गादी लोकां केरो हिस्सो तैन केरे कुलां केरे मुताबिक नगरन ते ड्लाव्वन समेत ईए राव।
फिरी मूसे मनश्शेरे अध्धे गोट्लेरे लोकन भी तैन केरो अपनो हिस्सो केरतां दित्तो; तै मनश्शेई लोकां केरे अध्धे गोट्लां केरो अपनो हिस्सो तैन केरे कुलां केरे मुताबिक राव। तै ईए, मतलब महनैम नगरे करां लेइतां बाशानेरे राज़े ओगेरी रियासतरो सारो मुल्ख, ते बाशाने मां बेस्सोरी याईरेरी 60 बेसती। ते गिलाद प्रदेशेरो अध्धो हिस्सो, ते अश्तारोत नगर, ते एद्रेई नगर, ज़ैना बाशाने मां ओगेरी राजधानी थी, ई मनश्शेरू मट्ठू माकीरेरे खानदानेरो, मतलब माकीरेरे अध्धे खानदानेरो अपनो हिस्सो कुलां केरे मुताबिक भोव।
ज़ै हिस्सो मूसे मोआबेरे मैइदाने मां यरीहो नगरेरे यरदन दरियारे पूर्वेरे पासे बेंटतां दित्तो, तै ईए आहे। पन लेवी केरे गोट्ले मूसे कोई हिस्सो न दित्तो; इस्राएलेरो परमेशर यहोवाए अपने वाधेरे मुताबिक तैन केरो हिस्सो भोव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.