Bhadrawahi Bible
यहोशू 14
यरदन दरियारे पश्चिमी हिस्सेरू बेन्टोनू
ज़ै-ज़ै हिस्सो इस्राएली लोकन कनान मुल्खे मां यरदन दरियारे पश्चिमेरे पासे मैल्हो, तै एलीआजर याजक, ते नूनेरे मट्ठे यहोशू, ते इस्राएलेरे गोट्लां केरे बुज़ुर्गां केरे घराना केरे खास-खास मैन्हेइं तैन दित्तो, तैना इना आन।1 ज़ै हुक्म यहोवाए मूसेरे ज़िरिये सड़े नौ गोट्लां केरे लेई दित्तोरो थियो, तैसेरे मुताबिक तैन केरे हिस्से चिट्ठी छ़ेडतां दित्ते जे। मूसे त बाकी ढाई गोट्लां केरे हिस्से यरदन दरियारे पार दित्तोरे थिये; पन लेवी लोकन तैनी तैन मां कोई हिस्सो न थियो दित्तोरो। यूसुफेरे खानदानेरे त दूई गोट्ल भोइ जेवरे थिये, मतलब, मनश्शे ते एप्रैम; ते तैस मुल्खे मां लेवी लोकन त कोई हिस्सो न थियो दित्तोरो, सिर्फ रानेरे लेई नगर, ते जानबर रखनेरे लेई चरागां मैल्होरी थी। ज़ै हुक्म यहोवा मूसा दित्तोरो थियो, तैसेरे मुताबिक इस्राएली लोकेईं कियूं; ते तैनेईं मुल्ख बन्टो।
तैखन यहूदारे खानदानेरे लोक यहोशू कां गिलगालेरे डेरन मां आए; ते कनजी यपुन्नेरू मट्ठू कालेबे तैस सेइं ज़ोवं, “तू ज़ानतो भोल्हो कि यहोवा कादेशबर्ने नगरे मां परमेशरेरे दास मूसे सेइं मेरे ते तेरे बारे मां कुन ज़ोवरू थियूं।2 ज़ैखन यहोवारे दास मूसे अवं एस मुल्खेरो भेद घिन्नेरे लेई कादेशबर्ने नगरे मरां भेज़ोरो थियो, तैखन अवं 40 सालां केरो थियो; ते अवं सच़्च़े मने सेइं तैस कां बिस्तार घिन्तां अव। ते मेरे साथी ज़ैना मीं सेइं साथी जेवरे थिये, तैनेईं त प्रजारे लोकां केरो दिल उदास कियो, पन मीं अपने परमेशर यहोवारी पूरे तरीके सेइं गल मन्नी। तैखन तैस दिहाड़े मूसे कसम खेइतां मीं सेइं ज़ोवं, ‘तीं पूरे तरीके सेइं मेरे परमेशर यहोवारी गल्लां मेन्नी, एस वजाई सेइं सच़्च़े ज़ैस ज़मीनी पुड़ तू अपने पव रेखतां एवरोस, तै हमेशारे लेई तेरे खानदानेरो हिस्सो भोल्हो।’3 ते हुनी हेर, ज़ैखन यहोवा मूसे सेइं एन वचन ज़ोवरू थियूं, तैखन करां 45 साल भोइ जेवरेन, ज़ैन मां इस्राएली लोक सुनसान ठारी मां हंठते फिरते राए; तैन मां यहोवा अपने ज़ोनेरे मुताबिक अवं ज़ींतो रखोरोइं; ते हुना अवं 85 सालां केरो भोवरोईं। ज़ेत्री ताकत मूसेरे भेज़नेरे दिहाड़े मीं मां थी, तेत्री ताकत हेजू तगर मीं मांए; जंग केरनेरे ते किछ भी केरनेरे लेई ज़ेत्री तैस मौके मीं मां सामर्थ थी, तेत्री हुना भी मीं मांए। एल्हेरेलेइ हुनी तै पहाड़ी मीं दे, ज़ेसेरी चर्चा यहोवाए तैस दिहाड़े कियोरी थी; तीं त तैस दिहाड़े शुनोरू भोल्हु कि तैस मां अनाक खानदानेरे लोक रहतन, ते बड्डे-बड्डे क़िले बाले नगर भी आन; पन कुन पतो भोइ सकते कि यहोवा मीं सेइं साथी राए, ते तैसेरे ज़ोनेरे मुताबिक अवं तैन्न तैन केरे मुल्खे मरां केढी।”
तैखन यहोशूए कालेबे बरकत दित्ती; ते हेब्रोन नगर यपुन्नेरे मट्ठे कालेबेरो हिस्सो केरि दित्तो। एस वजाई सेइं हेब्रोन कनजी यपुन्नेरे मट्ठे कालेबेरो हिस्सो अज़ तगर भी आहे, किजोकि तै इस्राएली लोकां केरे परमेशर यहोवाए पत्ती पूरे तरीके सेइं च़लतो थियो। पेइले हेब्रोन नगरेरू नवं किर्यतअर्बा थियूं; तै अर्बा अनाकी लोकन मां सेभन करां बड्डो मड़द थियो। ते तैस मुल्खे लड़ैई करां आराम मैल्हो।
Source notes (3)
- Cross-reference प्रेरित. 13:19.
- Cross-reference गिन. 14:24.
- Cross-reference व्यव. 1:36.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.