Bhadrawahi Bible
यहोशू 8
आई नगरे पुड़ कब्ज़ो केरनो
तैखन यहोवाए यहोशू सेइं ज़ोवं, “आई नगरे मां ज़ैन किछ भोवं तैसेरे वजाई सेइं डर न, ते तेरो मन कच़्च़ो न भोए; मझ़ बन्ध ते सारे इस्राएली सिपाही साथी ने, ते आई नगरे पुड़ हमलो केर; शुन, मीं आई नगरेरो राज़ो ते तैसेरे लोक ते तैसेरे नगरे ते मुल्खे समेत तेरे कब्ज़े मां कियोरोए। ते ज़ेरू तीं यरीहो नगरे ते तैसेरे राज़े सेइं कियोरूए तेरहो सलूख आई नगर ते तैसेरे राज़े सेइं भी केरनो; सिर्फ तुस जानबरन समेत तैसेरी लूटी त अपने लेई नेही सकेले; एल्हेरेलेइ तैस नगरेरे पेत्रीएं पासे अपने सिपाही हमलो केरनेरे लेई रेखथ।”
ते यहोशूए सारे सिपेहिन सने आई नगरे पुड़ हमलो केरनेरी तियारी की; ते यहोशूए 3000 सिपाही ज़ैना बहादर थिये च़ुनतां राती हुक्म देइतां भेज़े। तैन केरे गाने करां पेइले यहोशूए तैन ऐह हुक्म दित्तो, “ध्याने सेइं शुना, तुस तैस नगरेरे पेत्रीएं पासे छ़ेपतां हमलो केरनेरे लेई बिश्शी गेइयथ; नगरेरे हछे जादे दूर न गेइयथ, ते सभेरे सब तियार रेइयथ; ते अवं अपने सारे सिपेहिन सने तैस नगरेरे नेड़े गालो। ते ज़ैखन आई नगरेरे सिपाही पेइलेरे ज़ेरे इश्शो मुकाबलो केरनेरे लेई निस्सन, तैखन अस तैन केरे सामनेरां नशमेले; तैखन तैना एन सोचतां, कि तैना पेइलेरे ज़ेरे इश्शे सामनेरां नेश्शी जेवरेन, इश्शो पीछो केरेले; एन्च़रां सेइं अस तैन केरे सामनेरां नेशतां तैस नगरे करां दूर केढतां नेमेले; तैखन तुस बांदे भोइतां नगरे अपने कब्ज़े मां केरथ; किजोकि तुश्शो परमेशर यहोवा तैस नगरे तुश्शे कब्ज़े मां केरेलो। ते ज़ैखन तुस नगरे पुड़ कब्ज़ो केरेले, तैखन तैस मां अग लेइतां फुक्की छ़ेडथ, यहोवारे हुक्मेरे मुताबिके एन कम केरथ; शुना, मीं तुसन हुक्म दित्तोरोए।” तैखन यहोशूए तैना ट्लही हज़ार सिपाही भेज़े; ते तैना हमलो केरनेरे लेई छ़ेपतां बिशनेरे लेई च़ले जे, ते बेतेलेरे आई नगरेरे मझ़ाटे पश्चिमेरे पासे छ़ेपतां बिश्शे; पन यहोशू तैस राती बाकी सिपाही केरे मझ़ाटे रुकोरो राव।
यहोशू होरसां झ़ेझ़ां उठो, ते तै इस्राएलेरे प्रधान सिपेहिन सने लोकां केरे अग्री-अग्री आई नगरेरे पासे च़लो। ते यहोशूएरे साथी सिपाही च़ेढ़ी जे, ते आई नगरे नेड़े पुज़तां तैसेरे सामने उतरेरे पासे अपने डेरे लाए, ते तैन केरे ते आई नगरेरे मझ़ाटे अक वादी थी। तैखन तैनी लगभग 5000 सिपाही च़ुनतां बेतेल नगर ते आई नगरेरे उतरते पासे तैन केरो घात केरनेरे लेई बिशाले। ते ज़ैखन सिपैहेईं नगरेरे उतरेरे पासेरां सारी सेना ते पश्चिमेरे पासे घात केरने लेई बिश्शोरे भी ठिकाने पुड़ किये, तैखन यहोशू तैस राती1 वैदी मां राव। ज़ैखन आई नगरेरे राज़े इस्राएली सेना लाही, तैखन तै जल्दी केरतां झ़ेझ़ां उठ्ठो, ते राज़े अपनि सारी सेना नेइतां इस्राएली सेनारे सामने लड़नेरे लेई निस्तां ठहरेवरी ठारी पुड़ यानी अराबारे सामने पुज़्ज़े, ते तै न थियो ज़ानतो कि पेत्रीं पासे इस्राएली सिपाही हमलो केरनेरे लेई बिशोरेन। तैखन यहोशू ते इस्राएली सेना आई नगरेरे सेनारे सामनेरां सुनसान ठारारे बत्तरे पासे नशनेरो दिखावो कियो। आई नगरेरे राज़े इस्राएली लोकां केरो पीछो केरनेरे लेई अपने सारे सिपाही अकोट्ठे कुजाए। ते तैना यहोशूएरो पीछो केरते-केरते नगरे करां दूर निस्सी जे। ते न आई नगरे मां ते न बेतेल नगरे मां कोई सिपाही राव, ज़ै इस्राएली लोकां केरो पीछो केरनेरे लेई न भोए जेवरो, ते तैनेईं नगरेरो फाटक खुल्लो छ़ेडतां इस्राएली लोकां केरो पीछो कियो।
तैखन यहोवाए यहोशूए सेइं ज़ोवं, “अपने हथ्थेरी बलम आई नगरेरे पासे रख; किजोकि अवं तैस तेरे हथ्थे मां केरि देलो।” ते यहोशूए अपने हथ्थेरी बलम आई नगरेरे पासे रखी। तैसेरो हथ रखते ज़ैना सिपाही हमलो केरनेरे लेई छ़ेपतां बिश्शोरे थिये, तैना अकदम एपनी ठारी पुड़ेरां उट्ठे ते दौड़तां नगरे मां गेइतां अपने कब्ज़े मां कियो; ते अकदम तैस अग लेई दित्ती। ज़ैखन आई नगरेरे सिपैहेईं फिरतां नज़र दित्ती त कुन हेरू कि नगरेरो तूँ अम्बरे तगर पुज़ने लगोरोए; ते न त तैन इरां नशनेरी हिम्मत राई, ते न उरां, ते ज़ैना लोक सुनसान ठारारे पासे नश्शोरे थिये, तैनेईं फिरतां अपने निशान्ने बालन पुड़ हमलो कियो। ज़ैखन यहोशू ते तैस सेइं साथी इस्राएली सेना एन हेरू कि घात लाने बालेईं पूरो नगर कब्ज़े मां कियोरोए, ते तैसेरो तूँ उठी राहोरोए, तैखन फिरतां आई नगरेरे सिपेहिन मारने लगे। ते तैन केरो सामनो केरनेरे लेई इस्राएली सिपाही होरी नगरन मरां भी निस्सी जे, ते तैना इस्राएली सिपाही केरे मझ़ाटे फेसी जे, किछ इस्राएली तैन केरे अग्गर थिये, ते किछ इस्राएली तैन पत्तर थिये; आखरकार तैनेईं एड़ी तगर मारे कि तैन मरां न कोई बच़ो ते न कोई नेश्शी बटो। ते आई नगरेरो राज़ो तैनेईं ज़ींतो ट्लेइतां यहोशू कां आनो।
ते ज़ैखन इस्राएली आई नगरेरे सब रानेबाले मैइदाने मां मतलब तैस सुनसान ठैरी मां ज़ैड़ी तैनेईं तैन केरो पीछो कियोरो थियो, हमलो केरतां मैरी छ़डे, ते तैना सब तलवारी सेइं एड़ी तगर मारे कि तैन केरो अन्त भोइ जेव, तैखन सब इस्राएली लोकेईं आई नगर भी लुटतां तै भी तलवारी सेइं मारो। ते आई नगरेरी सारी तैदाद 12000 थी। तैस दिहाड़े सब कौन्शां मड़द जंगी मां मारे जे। किजोकि ज़ांतगर यहोशूए आई नगरेरे सारे रानेबालां केरो सत्यानाश न कियो, तांतगर तैनी अपनो हथ ज़ैस सेइं तैनी बलम ट्लातोरी थी, फिरी न खिच्चो। यहोवारे हुक्मेरे मुताबिक ज़ै तैनी यहोशूए दित्तोरो थियो, इस्राएली लोकेईं जानबर वगेरा नगरेरी सारी लूट-पाट केरतां आनी। तैखन यहोशूए आई नगर फुक्की छ़डू, ते तैन हमेशारे लेई खण्डर बनेइतां छ़डू, तैन अज़ तगर उज़ड़ोरू आहे। ते आई नगरेरो राज़ो ड्लवझ़ी तगर बुट्टे पुड़ टंगोरो रख्खो; ते दिहाड़ो डुबते-डुबते यहोशूएरे हुक्मेरे मुताबिक तैसेरी लाश बुट्टे पुड़ेरां ओसैलतां नगरेरे फाटकेरे सामने छ़डी, ते तैस पुड़ घोड़ां केरो अक बड्डो ढेर लव, ज़ै अज़ तगर भी आहे।
आशिर्वाद ते श्राप शुनाव गानो
तैखन यहोशूए इस्राएलेरे परमेशर यहोवारे लेई एबाल पहाड़े पुड़ अक वेदी बनाई, ज़ेन्च़रे यहोवारे दास मूसे इस्राएली लोकन हुक्म दित्तोरो थियो, ते ज़ेन्च़रे कानूनेरी किताबी मां लिखेरूए, तैनी सथ्थे घोड़ां केरि अक वेदी बनाई ज़ैस पुड़ कोई हथियार न थियो लेवरो, तैस पुड़ तैनेईं यहोवारे लेई होमबलि च़ाढ़ी, ते मेलबलि भी दित्ती। तैस्से ठारी पुड़ यहोशूए इस्राएली लोकां केरे सामने तैन घोड़न पुड़ मूसेरो कानून ज़ै तैनी लिखोरो थियो, तैसारी नकल कराई। ते तैना कुन देशी ते कुन परदेशी सारे इस्राएली लोकन अपने सियाने लोकन ते प्रधान्न ते न्याय केरनेबालन समेत यहोवारे करारेरे सन्दूखेरे छ़ूनेबाले लेवी याजकां केरे सामने सन्दूखेरे आसे पासे खड़े भोए, मतलब अध्धे लोक गिरिज्जीम पहाड़ेरे सामने, ते अध्धे लोक एबाल पहाड़ेरे सामने खड़े भोए, ज़ेन्च़रे यहोवा परमेशरेरे दासे मूसे पेइलो हुक्म दित्तोरो थियो, कि इस्राएली लोकन आशिर्वाद दित्तो गाए। तैसेरे बाद यहोशूए बरकत ते लानतरे कानूनेरे सारे वचन ज़ेन्च़रे-ज़ेन्च़रे कानूनेरी किताबी मां लिखोरेन, तेन्च़रे-तेन्च़रे पेढ़तां शुनाए। ज़ेत्री गल्लां केरो हुक्म मूसे दित्तोरो थियो, तैन मरां कोई एरी गल न राई ज़ै यहोशूए इस्राएलेरे सैरी सभाई, ते कौन्शन, ते बाल बच्चन, ते तैन सेइं साथी रानेबाले परदेशी लोकां केरे सामने भी पेढ़तां न शुनेई।
Source notes (1)
- Footnote तैस राती यहोशू तैस्से राती वैदी मां जेव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.